Read Библия Церковнославянская При́тчей соломѡ́нихъ 13 Bible Online

При́тчей соломѡ́нихъ 13 - Библия Церковнославянская bible

При́тчей соломѡ́нихъ 13

¹Сы́нъ бл҃горазѹ́мный послѹшли́въ ѻ҆тцѹ̀, сы́нъ же непокорли́вый въ поги́бель.

²Ѿ плодѡ́въ пра́вды снѣ́сть бл҃гі́й: дѹ́шы же беззако́нныхъ погиба́ютъ безвре́меннѡ.

³И҆́же храни́тъ своѧ҄ ѹ҆ста̀, соблюда́етъ свою̀ дѹ́шѹ: проде́рзивый же ѹ҆стна́ма ѹ҆страши́тъ себѐ.

⁴Въ по́хотехъ є҆́сть всѧ́къ пра́здный: рѹ́ки же мѹ́жественныхъ въ прилѣжа́нїи.

⁵Словесѐ непра́ведна ненави́дитъ првдникъ: нечести́вый же стыди́тсѧ и҆ не воз̾имѣ́тъ дерзнове́нїѧ.

⁶Пра́вда храни́тъ неѕлѡ́бивыѧ: нечести҄выѧ же ѕлы҄ твори́тъ грѣ́хъ.

⁷Сѹ́ть богатѧ́ще себѐ, ничесѡ́же и҆мѹ́ще: и҆ сѹ́ть смирѧ́ющесѧ во мно́зѣ бога́тствѣ.

⁸И҆збавле́нїе мѹ́жа дѹшѝ своѐ є҆мѹ̀ бога́тство: ни́щїй же не терпи́тъ преще́нїѧ.

⁹Свѣ́тъ првднымъ всегда̀, свѣ́тъ же нечести́выхъ ѹ҆гаса́етъ: дѹ́ши льсти҄выѧ заблѹжда́ютъ во грѣсѣ́хъ, првднїи же ще́дрѧтъ и҆ ми́лѹютъ.

¹⁰Ѕлы́й съ досажде́нїемъ твори́тъ ѕла҄ѧ: себе́ же зна́ющїи премѹ́дри (сѹ́ть).

¹¹И҆мѣ́нїе поспѣша́емо со беззако́нїемъ ѹ҆ма́лено быва́етъ, собира́ѧй же себѣ̀ со бл҃гоче́стїемъ и҆зѡби́лствовати бѹ́детъ: првдный ще́дритъ и҆ дае́тъ.

¹²Лѹ́чше начина́ѧй помога́ти се́рдцемъ ѡ҆бѣща́ющагѡ и҆ въ наде́ждѹ ведѹ́щагѡ: дре́во бо жи́зни жела́нїе до́брое.

¹³И҆́же презира́етъ ве́щь, презрѣ́нъ бѹ́детъ ѿ неѧ̀: а҆ боѧ́йсѧ за́повѣди, се́й здра́вствѹетъ.

¹⁴Сы́нѹ лѹка́вомѹ ничто́же є҆́сть бла́го: рабѹ́ же мѹ́дрѹ благопоспѣ҄шна бѹ́дѹтъ дѣла̀, и҆ и҆спра́витсѧ пѹ́ть є҆гѡ̀.

¹⁵Зако́нъ мѹ́дромѹ и҆сто́чникъ жи́зни: безѹ́мный же ѿ сѣ́ти ѹ҆́мретъ.

¹⁶Ра́зѹмъ бл҃гъ дае́тъ блгдть: разѹмѣ́ти же зако́нъ, мы́сли є҆́сть благі́ѧ: пѹтїе́ же презира́ющихъ въ поги́бели.

¹⁷Всѧ́къ хи́трый твори́тъ съ ра́зѹмомъ, безѹ́мный же простре́тъ свою̀ ѕло́бѹ.

¹⁸Ца́рь де́рзостенъ впаде́тъ во ѕла҄ѧ, вѣ́стникъ же мѹ́дръ и҆зба́витъ є҆го̀.

¹⁹Нищетѹ̀ и҆ безче́стїе ѿе́млетъ наказа́нїе: хранѧ́й же ѡ҆бличє́нїѧ просла́витсѧ.

²⁰Жела҄нїѧ бл҃гочести́выхъ наслажда́ютъ дѹ́шѹ, дѣла́ же нечести́выхъ дале́че ѿ ра́зѹма.

²¹Ходѧ́й съ премѹ́дрыми премѹ́дръ бѹ́детъ, ходѧ́й же съ безѹ́мными позна́нъ бѹ́детъ.

²²Согрѣша́ющихъ пости́гнѹтъ ѕла҄ѧ, првдныхъ же пости́гнѹтъ бл҃га҄ѧ.

²³Бл҃гъ мѹ́жъ наслѣ́дитъ сы́ны сынѡ́въ: сокро́вищствѹетсѧ же првднымъ бога́тство нечести́выхъ.

²⁴Првднїи насладѧ́тсѧ въ бога́тствѣ лѣ҄та мнѡ́га: непра́веднїи же поги́бнѹтъ вско́рѣ.

²⁵И҆́же щади́тъ же́злъ (сво́й), ненави́дитъ сы́на своего̀: любѧ́й же наказѹ́етъ прилѣ́жнѡ.

²⁶Првдный ѩ҆ды́й насыща́етъ дѹ́шѹ свою̀: дѹ́шы же нечести́выхъ скѹ҄дны.