Read Библия Церковнославянская При́тчей соломѡ́нихъ 14 Bible Online

При́тчей соломѡ́нихъ 14 - Библия Церковнославянская bible

При́тчей соломѡ́нихъ 14

¹Мѹ҄дрыѧ жєны̀ созда́ша до́мы: безѹ́мнаѧ же раскопа̀ рѹка́ма свои́ма.

²Ходѧ́й пра́вѡ бои́тсѧ гд҇а: развраща́ѧй же пѹти҄ своѧ҄ ѡ҆безче́ститсѧ.

³И҆з̾ ѹ҆́стъ безѹ́мныхъ же́злъ досажде́нїѧ: ѹ҆стнѣ́ же мѹ́дрыхъ хранѧ́тъ ѧ҆̀.

⁴И҆дѣ́же нѣ́сть волѡ́въ, ѩ҆́сли чи҄сты: а҆ и҆дѣ́же жи҄та мнѡ́га, ѩ҆́вна волѹ̀ крѣ́пость.

⁵Свидѣ́тель вѣ́ренъ не лже́тъ: разжиза́етъ же лѡ́жнаѧ свидѣ́тель непра́веденъ.

⁶Взы́щеши премѹ́дрости ѹ҆ ѕлы́хъ, и҆ не ѡ҆брѧ́щеши: чѹ́вство же ѹ҆ мѹ́дрыхъ ѹ҆до́бно.

⁷Всѧ҄ проти҄вна (сѹ́ть) мѹ́жеви безѹ́мнѹ: ѻ҆рѹ́жїе же чѹ́вствїѧ ѹ҆стнѣ̀ премѹ҄дры.

⁸Премѹ́дрость кова́рныхъ ѹ҆разѹмѣ́етъ пѹти҄ и҆́хъ: бѹ́йство же безѹ́мныхъ въ заблѹжде́нїи.

⁹До́мове беззако́нныхъ тре́бѹютъ ѡ҆чище́нїѧ, до́мове же првдныхъ прїѧ́тни.

¹⁰Се́рдце мѹ́жа чѹ́вственно печа́ль дѹшѝ є҆гѡ̀: є҆гда́ же весели́тсѧ, не примѣша́етсѧ досажде́нїю.

¹¹До́мове нечести́выхъ и҆сче́знѹтъ, селє́нїѧ же пра́вѡ творѧ́щихъ пребѹ́дѹтъ.

¹²Є҆́сть пѹ́ть, и҆́же мни́тсѧ человѣ́кѡмъ пра́въ бы́ти, послѣ҄днѧѧ же є҆гѡ̀ прихо́дѧтъ во дно̀ а҆́да.

¹³Ко весе́лїємъ не примѣшава́етсѧ печа́ль: послѣ҄днѧѧ же ра́дости въ пла́чь прихо́дѧтъ.

¹⁴Пѹті́й свои́хъ насы́титсѧ дерзосе́рдый, ѿ размышле́нїй же свои́хъ мѹ́жъ бла́гъ.

¹⁵Неѕло́бивый вѣ́рѹ є҆́млетъ всѧ́комѹ словесѝ, кова́рный же прихо́дитъ въ раска́ѧнїе.

¹⁶Премѹ́дръ ѹ҆боѧ́всѧ ѹ҆клони́тсѧ ѿ ѕла̀, безѹ́мный же на себѐ надѣ́ѧвсѧ смѣшава́етсѧ со беззако́ннымъ.

¹⁷Ѻ҆строѧ́ростный без̾ совѣ́та твори́тъ, мѹ́жъ же мѹ́дрый мнѡ́гаѧ терпи́тъ.

¹⁸Раздѣлѧ́ютъ безѹ́мнїи ѕло́бѹ, кова́рнїи же ѹ҆держа́тъ чѹ́вство.

¹⁹Попо́лзнѹтсѧ ѕлі́и пред̾ бл҃ги́ми, и҆ нечести́вїи послѹ́жатъ пред̾ две́рьми првдныхъ.

²⁰Дрѹ́зїе возненави́дѧтъ дрѹгѡ́въ ѹ҆бо́гихъ: дрѹ́зїе же бога́тыхъ мно́зи.

²¹Безче́стѧй ѹ҆бѡ́гїѧ согрѣша́етъ, ми́лѹѧй же ни́щыѧ бл҃же́нъ.

²²Заблѹжда́ющїи (непра́вєдницы) дѣ́лаютъ ѕла҄ѧ, мл҇ть же и҆ и҆́стинѹ дѣ́лаютъ бл҃гі́и. Не вѣ́дѧтъ мл҇ти и҆ вѣ́ры дѣ́лателїе ѕлы́хъ: ми́лѡстыни же и҆ вѣ҄ры ѹ҆ дѣ́лателей бл҃ги́хъ.

²³Во всѧ́цѣмъ пекѹ́щемсѧ є҆́сть и҆з̾ѻби́лїе: любосла́стный же и҆ безпеча́льный въ скѹ́дости бѹ́детъ.

²⁴Вѣне́цъ премѹ́дрыхъ бога́тство и҆́хъ, житїе́ же безѹ́мныхъ ѕло̀.

²⁵И҆зба́витъ ѿ ѕлы́хъ дѹ́шѹ свидѣ́тель вѣ́ренъ, разжиза́етъ же лжи҄ваѧ ле́стный.

²⁶Во стра́сѣ гд҇ни ѹ҆пова́нїе крѣ́пости, ча́дѡмъ же свои҄мъ ѡ҆ста́витъ ѹ҆твержде́нїе (ми́ра).

²⁷Стра́хъ гд҇ень и҆сто́чникъ жи́зни, твори́тъ же ѹ҆кланѧ́тисѧ ѿ сѣ́ти сме́ртныѧ.

²⁸Во мно́зѣ ѩ҆зы́цѣ сла́ва царю̀: во ѡ҆скѹдѣ́нїи же лю́дстѣ сокрѹше́нїе си́льномѹ.

²⁹Долготерпѣли́въ мѹ́жъ мно́гъ въ ра́зѹмѣ, малодѹ́шный же крѣ́пкѡ безѹ́менъ.

³⁰Кро́ткїй мѹ́жъ се́рдцѹ вра́чь: мо́ль же косте́мъ се́рдце чѹ́вственно.

³¹Ѡ҆клевета́ѧй ѹ҆бо́гаго раздража́етъ сотво́ршаго и҆̀, почита́ѧй же є҆го̀ ми́лѹетъ ни́щаго.

³²Во ѕло́бѣ свое́й ѿри́нетсѧ нечести́вый: надѣ́ѧйжесѧ на гд҇а свои́мъ преподо́бїемъ пра́веденъ.

³³Въ се́рдцы бла́зѣ мѹ́жа почі́етъ премѹ́дрость, въ се́рдцы же безѹ́мныхъ не познава́етсѧ.

³⁴Пра́вда возвыша́етъ ѩ҆зы́къ: ѹ҆малѧ́ютъ же племена̀ грѣсѝ.

³⁵Прїѧ́тенъ царе́ви слѹга̀ разѹ́мный, свои́мъ же благоѡбраще́нїемъ ѿе́млетъ безче́стїе.