Read Библия Церковнославянская При́тчей соломѡ́нихъ 15 Bible Online

При́тчей соломѡ́нихъ 15 - Библия Церковнославянская bible

При́тчей соломѡ́нихъ 15

¹Гнѣ́въ гѹби́тъ и҆ разѹ҄мныѧ: ѿвѣ́тъ же смире́нъ ѿвраща́етъ ѩ҆́рость, а҆ сло́во же́стоко возвиза́етъ гнѣ́вы.

²Ѧ҆зы́къ мѹ́дрыхъ дѡ́браѧ свѣ́сть: ѹ҆ста́ же безѹ́мныхъ возвѣща́ютъ ѕла҄ѧ.

³На всѧ́цѣмъ мѣ́стѣ ѻ҆́чи гд҇ни сматрѧ́ютъ ѕлы҄ѧ же и҆ благї҄ѧ.

⁴И҆сцѣле́нїе ѧ҆зы́ка дре́во жи́зни: хранѧ́й же є҆го̀ и҆спо́лнитсѧ дѹ́ха.

⁵Безѹ́мный рѹга́етсѧ наказа́нїю ѻ҆́тчѹ: хранѧ́й же за́пѡвѣди хитрѣ́йшїй. Во мно́зѣ пра́вдѣ крѣ́пость мно́га: нечести́вїи же ѿ землѝ и҆скоренѧ́тсѧ.

⁶Въ домѣ́хъ првдныхъ крѣ́пость мно́га: плоды́ же нечести́выхъ погиба́ютъ.

⁷Ѹ҆стнѣ̀ мѹ́дрыхъ свѧзѹ́ютсѧ чѹ́вствомъ, сердца́ же безѹ́мныхъ не твє́рда.

⁸Жє́ртвы нечести́выхъ ме́рзость гд҇еви, ѡ҆бѣ́ты же правоходѧ́щихъ прїѧ́тни є҆мѹ̀.

⁹Ме́рзость гд҇еви пѹтїѐ нечести́выхъ: гонѧ́щыѧ же пра́вдѹ лю́битъ.

¹⁰Наказа́нїе неѕло́бивагѡ познава́етсѧ ѿ мимоходѧ́щихъ: ненави́дѧщїи же ѡ҆бличє́нїѧ скончава́ютсѧ сра́мнѡ.

¹¹А҆́дъ и҆ па́гѹба ѩ҆́вна пред̾ гд҇емъ, ка́кѡ не и҆ сердца̀ человѣ́кѡвъ;

¹²Не возлю́битъ ненака́занный ѡ҆блича́ющихъ є҆го̀, съ мѹ́дрыми же не побесѣ́дѹетъ.

¹³Се́рдцѹ веселѧ́щѹсѧ, лицѐ цвѣте́тъ: въ печа́лехъ же сѹ́щѹ, сѣ́тѹетъ.

¹⁴Се́рдце пра́вое и҆́щетъ чѹ́вства: ѹ҆ста́ же ненака́занныхъ ѹ҆разѹмѣ́ютъ ѕла҄ѧ.

¹⁵На всѧ́ко вре́мѧ ѻ҆́чи ѕлы́хъ прїе́млютъ ѕла҄ѧ: до́брїи же безмо́лвствѹютъ пр҇нѡ.

¹⁶Лѹ́чше части́ца ма́лаѧ со стра́хомъ гд҇нимъ, не́жели сокрѡ́вища вє́лїѧ без̾ боѧ́зни.

¹⁷Лѹ́чше ѹ҆чрежде́нїе ѿ ѕе́лїй съ любо́вїю и҆ благода́тїю, не́жели представле́нїе телцє́въ со враждо́ю.

¹⁸Мѹ́жъ ѩ҆́рый ѹ҆строѧ́етъ бра҄ни, долготерпѣли́вый же и҆ бѹ́дѹщѹю ѹ҆кроща́етъ. Терпѣли́вый мѹ́жъ ѹ҆гаси́тъ сѹды̀, нечести́вый же воздвиза́етъ па́че.

¹⁹Пѹтїѐ пра́здныхъ по́стлани те́рнїемъ, мѹ́жественныхъ же ѹ҆гла́ждени.

²⁰Сы́нъ премѹ́дръ весели́тъ ѻ҆тца̀, сы́нъ же безѹ́менъ раздража́етъ ма́терь свою̀.

²¹Несмы́сленнагѡ стєзѝ скѹ҄дны ѹ҆ма̀: мѹ́жъ же разѹ́менъ и҆справлѧ́ѧ хо́дитъ.

²²Ѿлага́ютъ помышлє́нїѧ не чтѹ́щїи со́нмищъ: въ сердца́хъ же совѣ́тныхъ пребыва́етъ совѣ́тъ.

²³Не послѹ́шаетъ ѕлы́й є҆гѡ̀, нижѐ рече́тъ поле́зно что̀ и҆ добро̀ ѻ҆́бщемѹ.

²⁴Пѹтїѐ живота̀ помышлє́нїѧ разѹ́мнагѡ, да ѹ҆клони́всѧ ѿ а҆́да спасе́тсѧ.

²⁵До́мы досади́телей разорѧ́етъ гд҇ь, ѹ҆тверди́ же предѣ́лъ вдови́цы.

²⁶Ме́рзость гд҇еви по́мыслъ непра́ведный, чи́стыхъ же глаго́лы чє́стны.

²⁷Гѹби́тъ себѐ мздои́мецъ, ненави́дѧй же дарѡ́въ прїѧ́тїѧ спасе́тсѧ: ми́лостынѧми и҆ вѣ́рами ѡ҆чища́ютсѧ грѣсѝ, стра́хомъ же гд҇нимъ ѹ҆клонѧ́етсѧ всѧ́къ ѿ ѕла̀.

²⁸Сердца̀ првдныхъ поѹча́ютсѧ вѣ́рѣ, ѹ҆ста́ же нечести́выхъ ѿвѣща́ютъ ѕла҄ѧ: прїѧ́тни пред̾ гд҇емъ пѹтїѐ мѹже́й првдныхъ, и҆́миже и҆ вразѝ дрѹ́зїе быва́ютъ.

²⁹Дале́че ѿстои́тъ бг҃ъ ѿ нечести́выхъ, моли́твы же првдныхъ послѹ́шаетъ: лѹ́чше ма́лое прїѧ́тїе со пра́вдою, не́жели мнѡ́га жи҄та съ непра́вдою: се́рдце мѹ́жа да мы́слитъ првднаѧ, да ѿ бг҃а и҆спра́вѧтсѧ стѡпы̀ є҆гѡ̀.

³⁰Ви́дѧщее ѻ҆́ко дѡ́браѧ весели́тъ се́рдце, сла́ва же блага́ѧ ѹ҆тѹчнѧ́етъ кѡ́сти.

³¹Слѹ́шаѧй ѡ҆бличе́нїй живота̀ посредѣ̀ премѹ́дрыхъ водвори́тсѧ.

³²И҆́же ѿмета́етъ наказа́нїе, ненави́дитъ себѐ: соблюда́ѧй же ѡ҆бличє́нїѧ лю́битъ свою̀ дѹ́шѹ.

³³Стра́хъ гд҇ень наказа́нїе и҆ премѹ́дрость, и҆ нача́ло сла́вы ѿвѣща́етъ є҆́й (,*пред̾и́детъ же смирє́ннымъ сла́ва).