Read Библия Церковнославянская При́тчей соломѡ́нихъ 16 Bible Online

При́тчей соломѡ́нихъ 16 - Библия Церковнославянская bible

При́тчей соломѡ́нихъ 16

¹Человѣ́кѹ предложе́нїе се́рдца: и҆ ѿ гд҇а ѿвѣ́тъ ѧ҆зы́ка.

²Всѧ҄ дѣла̀ смире́ннагѡ ѩ҆влє́нна пред̾ бг҃омъ, и҆ ѹ҆крѣплѧ́ѧй дѹ́хи гд҇ь.

³Прибли́жи ко гд҇ѹ дѣла̀ твоѧ҄, и҆ ѹ҆твердѧ́тсѧ помышлє́нїѧ твоѧ҄.

⁴Всѧ҄ содѣ́ла гд҇ь себє̀ ра́ди: нечести́вїи же въ де́нь ѕо́лъ поги́бнѹтъ.

⁵Нечи́стъ пред̾ бг҃омъ всѧ́къ высокосе́рдый: въ рѹ́кѹ же рѹ́цѣ влага́ѧй непра́веднѡ не ѡ҆безвини́тсѧ.

⁶Нача́ло пѹтѝ бла́га, є҆́же твори́ти првднаѧ, прїѧ҄тна же пред̾ бг҃омъ па́че, не́жели жре́ти жє́ртвы.

⁷И҆ща́й гд҇а ѡ҆брѧ́щетъ ра́зѹмъ со пра́вдою:

⁸пра́вѣ же и҆́щѹщїи є҆го̀ ѡ҆брѧ́щѹтъ ми́ръ.

⁹Всѧ҄ дѣла̀ гд҇нѧ со пра́вдою: храни́тсѧ же нечести́вый на де́нь ѕо́лъ.

¹⁰Про҇ро́чество во ѹ҆стнѣ́хъ царе́выхъ, въ сѹди́щи же не погрѣша́тъ ѹ҆ста̀ є҆гѡ̀.

¹¹Превѣ́са мѣ́рила пра́вда ѹ҆ гд҇а: дѣла́ же є҆гѡ̀ мѣ҄рила првднаѧ.

¹²Ме́рзость царе́ви творѧ́й ѕла҄ѧ: со пра́вдою бо ѹ҆готовлѧ́етсѧ престо́лъ нача́лства.

¹³Прїѧ҄тны царю̀ ѹ҆стнѣ̀ првдны, словеса́ же пра҄ваѧ лю́битъ гд҇ь.

¹⁴ѩ҆́рость царе́ва вѣ́стникъ сме́рти: мѹ́жъ же премѹ́дръ ѹ҆толи́тъ є҆го̀.

¹⁵Во свѣ́тѣ жи́зни сы́нъ царе́въ: прїѧ́тнїи же є҆мѹ̀ ѩ҆́кѡ ѡ҆́блакъ по́зденъ.

¹⁶Ѹ҆гнѣждє́нїѧ премѹ́дрости и҆збра́ннѣе зла́та: вселє́нїѧ же ра́зѹма дража́йши сребра̀.

¹⁷Пѹтїѐ жи́зни ѹ҆кланѧ́ютсѧ ѿ ѕлы́хъ: долгота́ же житїѧ̀ пѹтїѐ првдни. Прїе́млѧй наказа́нїе во бл҃ги́хъ бѹ́детъ, хранѧ́й же ѡ҆бличє́нїѧ ѹ҆мѹдри́тсѧ. И҆́же храни́тъ своѧ҄ пѹти҄, соблюда́етъ свою̀ дѹ́шѹ: любѧ́й же живо́тъ сво́й щади́тъ своѧ҄ ѹ҆ста̀.

¹⁸Пре́жде сокрѹше́нїѧ предварѧ́етъ досажде́нїе, пре́жде же паде́нїѧ ѕлопомышле́нїе.

¹⁹Лѹ́чше кроткодѹ́шенъ со смире́нїемъ, не́жели и҆́же раздѣлѧ́етъ коры҄сти съ досади́тельми.

²⁰Разѹ́мный въ ве́щехъ ѡ҆брѣта́тель бл҃ги́хъ, надѣ́ѧйсѧ же на гд҇а бл҃же́нъ.

²¹Премѹ҄дрыѧ и҆ разѹ҄мныѧ ѕлы́ми нари́чѹтъ, сла́дцїи же въ словесѝ мно́жае ѹ҆слы́шани бѹ́дѹтъ.

²²И҆сто́чникъ живо́тенъ ра́зѹмъ стѧжа́вшымъ, наказа́нїе же безѹ́мныхъ ѕло̀.

²³Се́рдце премѹ́драгѡ ѹ҆разѹмѣ́етъ ѩ҆̀же ѿ свои́хъ є҆мѹ̀ ѹ҆́стъ, во ѹ҆стна́хъ же но́ситъ ра́зѹмъ.

²⁴Со́тове медо́внїи словеса̀ дѡ́браѧ, сла́дость же и҆́хъ и҆сцѣле́нїе дѹшѝ.

²⁵Сѹ́ть пѹтїѐ мнѧ́щїисѧ пра́ви бы́ти мѹ́жѹ, ѻ҆ба́че послѣ҄днѧѧ и҆́хъ зрѧ́тъ во дно̀ а҆́дово.

²⁶Мѹ́жъ въ трѹдѣ́хъ трѹжда́етсѧ себѣ̀ и҆ и҆знѹжда́етъ поги́бель свою̀: стропти́вый во свои́хъ ѹ҆ста́хъ но́ситъ поги́бель.

²⁷Мѹ́жъ безѹ́менъ копа́етъ себѣ̀ ѕла҄ѧ и҆ во ѹ҆стна́хъ свои́хъ сокро́вищствѹетъ ѻ҆́гнь.

²⁸Мѹ́жъ стропти́вый разсыла́етъ ѕла҄ѧ, и҆ свѣти́лникъ льстѝ вжига́етъ ѕлы҄мъ, и҆ разлѹча́етъ дрѹ́ги.

²⁹Мѹ́жъ законопрестѹ́пенъ прельща́етъ дрѹ́ги и҆ ѿво́дитъ и҆̀хъ въ пѹти҄ не бла҄ги.

³⁰Ѹ҆твержда́ѧй ѻ҆́чи своѝ мы́слитъ развращє́ннаѧ, грызы́й же ѹ҆стнѣ̀ своѝ ѡ҆предѣлѧ́етъ всѧ҄ ѕла҄ѧ: се́й пе́щь є҆́сть ѕло́бы.

³¹Вѣне́цъ хвалы̀ ста́рость, на пѹте́хъ же пра́вды ѡ҆брѣта́етсѧ.

³²Лѹ́чше мѹ́жъ долготерпѣли́въ па́че крѣ́пкагѡ, (*и҆ мѹ́жъ ра́зѹмъ и҆мѣ́ѧй па́че земледѣ́лца вели́кагѡ:) ѹ҆держава́ѧй же гнѣ́въ па́че взе́млющагѡ гра́дъ.

³³Въ нѣ҄дра вхо́дѧтъ всѧ҄ непра́вєднымъ: ѿ гд҇а же всѧ҄ првднаѧ.