Read Библия Церковнославянская При́тчей соломѡ́нихъ 17 Bible Online

При́тчей соломѡ́нихъ 17 - Библия Церковнославянская bible

При́тчей соломѡ́нихъ 17

¹Лѹ́чше ѹ҆крѹ́хъ хлѣ́ба со сла́стїю въ ми́рѣ, не́жели до́мъ и҆спо́лненъ мно́гихъ благи́хъ и҆ непра́ведныхъ же́ртвъ со бра́нїю.

²Ра́бъ смы́сленъ ѡ҆блада́етъ влады҄ки безѹ́мными, въ бра́тїихъ же раздѣли́тъ (и҆мѣ́нїе) на ча҄сти.

³ѩ҆́коже и҆скѹша́етсѧ въ пещѝ сребро̀ и҆ зла́то, та́кѡ и҆збра҄ннаѧ сердца̀ ѹ҆ гд҇а.

⁴Ѕлы́й послѹ́шаетъ ѧ҆зы́ка законопрестѹ́пныхъ, првдный же не внима́етъ ѹ҆стна́мъ лжи҄вымъ.

⁵Рѹга́йсѧ ѹ҆бо́гомѹ раздража́етъ сотво́ршаго є҆го̀, ра́дѹѧйсѧ же ѡ҆ погиба́ющемъ не ѡ҆безвини́тсѧ: ми́лѹѧй же поми́лованъ бѹ́детъ.

⁶Вѣне́цъ ста́рыхъ ча҄да ча҄дъ: похвала́ же ча́домъ ѻ҆тцы̀ и҆́хъ. Вѣ́рномѹ ве́сь мі́ръ бога́тство, невѣ́рномѹ же нижѐ пѣ́нѧзь.

⁷Неприли҄чны сѹ́ть безѹ́мномѹ ѹ҆стнѣ̀ вѣ҄рны, нижѐ првдномѹ ѹ҆стнѣ̀ лжи҄вы.

⁸Мзда̀ благода́тей наказа́нїе ѹ҆потреблѧ́ющымъ: и҆ а҆́може а҆́ще ѡ҆брати́тсѧ, ѹ҆спѣ́етъ.

⁹И҆́же таи́тъ ѡ҆би҄ды, и҆́щетъ любвѐ: а҆ и҆́же ненави́дитъ скрыва́ти, разлѹча́етъ дрѹ́ги и҆ дома҄шнїѧ.

¹⁰Сокрѹша́етъ преще́нїе се́рдце мѹ́драгѡ: безѹ́мный же бїе́мь не чѹ́вствѹетъ (ра́нъ).

¹¹Прекослѡ́вїѧ воздви́жетъ всѧ́къ ѕлы́й: гд҇ь же а҆́гг҃ла неми́лостива по́слетъ на́нь.

¹²Впаде́тъ попече́нїе мѹ́жѹ смы́сленнѹ: безѹ́мнїи же размышлѧ́ютъ ѕла҄ѧ.

¹³И҆́же воздае́тъ ѕла҄ѧ за бл҃га҄ѧ, не подви́гнѹтсѧ ѕла҄ѧ и҆з̾ до́мѹ є҆гѡ̀.

¹⁴Вла́сть дае́тъ словесє́мъ нача́ло пра́вды: предводи́телствѹетъ же скѹ́дости прѧ̀ и҆ бра́нь.

¹⁵И҆́же сѹ́дитъ првднаго непра́веднымъ, непра́веднаго же првднымъ, нечи́стъ и҆ ме́рзокъ ѹ҆ гд҇а.

¹⁶Вскѹ́ю бѧ́ше и҆мѣ́нїе безѹ́мномѹ; стѧжа́ти бо премѹ́дрости безсе́рдый не мо́жетъ. И҆́же высо́къ твори́тъ сво́й до́мъ, и҆́щетъ сокрѹше́нїѧ: ѡ҆строптѣва́ѧй же ѹ҆чи́тисѧ впаде́тъ во ѕла҄ѧ.

¹⁷На всѧ́ко вре́мѧ дрѹ́гъ да бѹ́детъ тебѣ̀, бра́тїѧ же въ нѹ́ждахъ поле́зни да бѹ́дѹтъ: сегѡ́ бо ра́ди ражда́ютсѧ.

¹⁸Мѹ́жъ безѹ́менъ пле́щетъ и҆ ра́дѹетсѧ себѣ̀, ѩ҆́коже порѹча́ѧйсѧ и҆спорѹ́читъ дрѹ́га своего̀, на свои́хъ же ѹ҆стна́хъ ѻ҆́гнь сокро́вищствѹетъ.

¹⁹Грѣхолю́бецъ ра́дѹетсѧ сва́рѡмъ, а҆ жестокосе́рдый не ѹ҆срѧ́щетъ благи́хъ.

²⁰Мѹ́жъ ѹ҆добопрело́жный ѧ҆зы́комъ впаде́тъ во ѕла҄ѧ: се́рдце же безѹ́мнагѡ болѣ́знь стѧжа́вшемѹ є҆̀.

²¹Не весели́тсѧ ѻ҆те́цъ ѡ҆ сы́нѣ ненака́заннѣмъ: сы́нъ же мѹ́дръ весели́тъ ма́терь свою̀.

²²Се́рдце веселѧ́щесѧ бл҃гоимѣ́тисѧ твори́тъ: мѹ́жѹ же печа́льнѹ засы́шѹтъ кѡ́сти.

²³Прїе́млющемѹ да́ры непра́веднѡ въ нѣ҄дра не пред̾ѹспѣва́ютъ пѹтїѐ: нечести́вый же ѹ҆кланѧ́етъ пѹти҄ пра́вды.

²⁴Лицѐ разѹ́мно мѹ́жа премѹ́дра, ѻ҆́чи же безѹ́мнагѡ на концѣ́хъ землѝ.

²⁵Гнѣ́въ ѻ҆тцѹ̀ сы́нъ безѹ́менъ, и҆ болѣ́знь ро́ждшей є҆го̀.

²⁶Тщєты̀ твори́ти мѹ́жѹ првднѹ не добро̀, нижѐ преподо́бно навѣ́товати власте́мъ пра́вєднымъ.

²⁷И҆́же щади́тъ глаго́лъ произнестѝ же́стокъ, разѹ́менъ: долготерпѣли́вый же мѹ́жъ премѹ́дръ, лѹ́чше и҆́щѹщагѡ наѹ́ки.

²⁸Несмы́сленномѹ вопроси́вшѹ ѡ҆ мѹ́дрости, мѹ́дрость вмѣни́тсѧ: нѣ́ма же кто̀ себѐ твори́тъ, возмни́тсѧ разѹ́менъ бы́ти.