Read Библия Церковнославянская При́тчей соломѡ́нихъ 18 Bible Online

При́тчей соломѡ́нихъ 18 - Библия Церковнославянская bible

При́тчей соломѡ́нихъ 18

¹Вины҄ и҆́щетъ мѹ́жъ хотѧ̀ ѿлѹчи́тисѧ ѿ дрѹгѡ́въ, на всѧ́ко же вре́мѧ поноси́мь бѹ́детъ.

²Не тре́бѹетъ премѹ́дрости мѹ́жъ скѹдоѹ́менъ, занѐ па́че во́дитсѧ безѹ́мїемъ.

³Є҆гда̀ прїи́детъ нечести́вый во глѹбинѹ̀ ѕѡ́лъ, неради́тъ: нахо́дитъ же є҆мѹ̀ безче́стїе и҆ поноше́нїе.

⁴Вода̀ глѹбока̀ сло́во въ се́рдцы мѹ́жа, рѣка́ же и҆зска́чѹщи и҆ и҆сто́чникъ жи́зни.

⁵Чѹди́тисѧ лицѹ̀ нечести́вагѡ не добро̀, нижѐ преподо́бно ѹ҆кланѧ́ти првдное на сѹдѣ̀.

⁶Ѹ҆стнѣ̀ безѹ́мнагѡ приво́дѧтъ є҆го̀ на ѕло̀, ѹ҆ста́ же є҆гѡ̀ де́рзѡстнаѧ призыва́ютъ сме́рть.

⁷Ѹ҆ста̀ безѹ́мнагѡ сокрѹше́нїе є҆мѹ̀, ѹ҆стнѣ́ же є҆гѡ̀ сѣ́ть дѹшѝ є҆гѡ̀.

⁸Лѣни҄выѧ низлага́етъ стра́хъ: дѹ́ши же мѹже́й жена́мъ подо́бныхъ вза́лчѹтъ.

⁹Не и҆сцѣлѧ́ѧй себѐ во свои́хъ дѣ́лѣхъ бра́тъ є҆́сть погѹблѧ́ющемѹ себѐ сама́го.

¹⁰И҆з̾ вели́чества крѣ́пости и҆́мѧ гд҇не, къ немѹ́же притека́юще првдницы возно́сѧтсѧ.

¹¹И҆мѣ́нїе бога́тѹ мѹ́жѹ гра́дъ тве́рдъ, сла́ва же є҆гѡ̀ вельмѝ присѣнѧ́етъ.

¹²Пре́жде сокрѹше́нїѧ возно́ситсѧ се́рдце мѹ́жѹ и҆ пре́жде сла́вы смирѧ́етсѧ.

¹³И҆́же ѿвѣща́етъ сло́во пре́жде слы́шанїѧ, безѹ́мїе є҆мѹ̀ є҆́сть и҆ поноше́нїе.

¹⁴Гнѣ́въ мѹ́жа ѹ҆кроща́етъ ра́бъ разѹ́мный: малодѹ́шна же человѣ́ка кто̀ стерпи́тъ;

¹⁵Се́рдце разѹ́мнагѡ стѧ́жетъ чѹ́вствїе, ѹ҆шеса́ же мѹ́дрыхъ и҆́щѹтъ смы́сла.

¹⁶Даѧ́нїе человѣ́ка распространѧ́етъ є҆го̀ и҆ съ си́льными посажда́етъ є҆го̀.

¹⁷Првдный себє̀ сама́гѡ ѡ҆глаго́лникъ во первосло́вїи: є҆гда́ же приложи́тъ сѹпоста́тъ, ѡ҆блича́етсѧ.

¹⁸Прекослѡ́вїѧ ѹ҆толѧ́етъ молчали́вый и҆ во власте́хъ ѡ҆предѣлѧ́етъ.

¹⁹Бра́тъ ѿ бра́та помога́емь, ѩ҆́кѡ гра́дъ тве́рдъ и҆ высо́къ, ѹ҆крѣплѧ́етсѧ же ѩ҆́коже ѡ҆снова́ное ца́рство.

²⁰Ѿ плодѡ́въ ѹ҆́стъ мѹ́жъ насыща́етъ чре́во своѐ, и҆ ѿ плодѡ́въ ѹ҆сте́нъ свои́хъ насы́титсѧ.

²¹Сме́рть и҆ живо́тъ въ рѹцѣ̀ ѧ҆зы́ка: ѹ҆держава́ющїи же є҆го̀ снѣдѧ́тъ плоды̀ є҆гѡ̀.

²²И҆́же ѡ҆брѣ́те женѹ̀ добрѹ̀, ѡ҆брѣ́те благода́ть, прїѧ́лъ же є҆́сть ѿ гд҇а тишинѹ̀.

²³И҆́же и҆згонѧ́етъ женѹ̀ до́брѹю, и҆згонѧ́етъ блага҄ѧ: держа́й же прелюбодѣ́йцѹ безѹ́менъ и҆ нечести́въ.

²⁴Съ молє́нїи глаго́летъ ѹ҆бо́гїй, бога́тый же ѿвѣща́етъ же́стокѡ.

²⁵Мѹ́жъ любо́венъ къ дрѹ́жбѣ, и҆ є҆́сть дрѹ́гъ прилѣпи́выйсѧ па́че бра́та.