Read Библия Церковнославянская При́тчей соломѡ́нихъ 19 Bible Online

При́тчей соломѡ́нихъ 19 - Библия Церковнославянская bible

При́тчей соломѡ́нихъ 19

¹Лѹ́чше є҆́сть ѹ҆бо́гъ ходѧ́й въ простотѣ̀ свое́й, не́же бога́тый стропти́въ ѹ҆стны҄ свои́ми и҆ несмы́сленъ.

²И҆дѣ́же нѣ́сть ѹ҆че́нїѧ дѹшѝ, нѣ́сть добро̀, и҆ и҆́же ско́ръ є҆́сть нога́ма, по́ткнетсѧ.

³Неразѹ́мїе мѹ́жа погѹблѧ́етъ пѹти҄ є҆гѡ̀, и҆ бг҃а вино́вна твори́тъ въ се́рдцы свое́мъ.

⁴Бога́тство прилага́етъ дрѹ́ги мнѡ́ги: ни́щїй же и҆ ѿ сѹ́щагѡ дрѹ́га ѡ҆ставлѧ́емь быва́етъ.

⁵Свидѣ́тель лжи́въ без̾ мѹ́ки не бѹ́детъ: ѡ҆клевета́ѧй же непра́веднѡ не ѹ҆бѣжи́тъ є҆ѧ̀.

⁶Мно́зи ѹ҆гожда́ютъ ли́цамъ ца҄рскимъ: всѧ́къ же ѕо́лъ быва́етъ въ поноше́нїе мѹ́жеви.

⁷Всѧ́къ, и҆́же ѹ҆бо́гаго бра́та ненави́дитъ, и҆ ѿ содрѹ́жества дале́че бѹ́детъ. Мы́сль блага́ѧ вѣ́дѧщымъ ю҆̀ приближа́етсѧ, мѹ́жъ же мѹ́дръ ѡ҆брѧ́щетъ ю҆̀. Мно́гѡ творѧ́й ѕла̀ соверша́етъ ѕло́бѹ, а҆ и҆́же раздража́етъ словесы̀, не спасе́тсѧ.

⁸Стѧжа́вый мѹ́дрость лю́битъ себѐ, а҆ и҆́же сохранѧ́етъ ра́зѹмъ, ѡ҆брѧ́щетъ блага҄ѧ.

⁹Свидѣ́тель лжи́вый не без̾ мѹ́ки бѹ́детъ, а҆ и҆́же разжиза́етъ ѕло́бѹ, поги́бнетъ ѿ неѧ̀.

¹⁰Не по́льзѹетъ безѹ́мномѹ сла́дость, и҆ а҆́ще ра́бъ на́чнетъ съ досажде́нїемъ ѡ҆блада́ти.

¹¹Ми́лостивъ мѹ́жъ долготерпи́тъ, похвала́ же є҆гѡ̀ превосхо́дитъ законопрестѹ́пныхъ.

¹²Царе́во преще́нїе подо́бно рыка́нїю льво́вѹ, и҆ ѩ҆́коже роса̀ ѕла́кѹ, та́кѡ ти́хость є҆гѡ̀.

¹³Стѹ́дъ є҆́сть ѻ҆тцѹ̀ сы́нъ безѹ́менъ, и҆ нечи҄сты ѡ҆бѣ́ты ѿ мзды̀ блѹдни́цы.

¹⁴До́мъ и҆ и҆мѣ́нїе раздѣлѧ́ютъ ѻ҆тцы̀ ча́дѡмъ: ѿ гд҇а же сочетава́етсѧ жена̀ мѹ́жеви.

¹⁵Стра́хъ содержи́тъ мѹ́жа женонра́вна: дѹша́ же пра́зднагѡ вза́лчетъ.

¹⁶И҆́же храни́тъ за́пѡвѣди, соблюда́етъ свою̀ дѹ́шѹ, а҆ нерадѧ́й ѡ҆ свои́хъ пѹте́хъ поги́бнетъ.

¹⁷Ми́лѹѧй ни́ща взаи́мъ дае́тъ бг҃ови, по даѧ́нїю же є҆гѡ̀ возда́стсѧ є҆мѹ̀.

¹⁸Наказѹ́й сы́на твоего̀, та́кѡ бо бѹ́детъ благонаде́женъ: въ досажде́нїе же не взе́млисѧ дѹше́ю твое́ю.

¹⁹Ѕлоѹ́менъ мѹ́жъ мно́гѡ ѡ҆тщети́тсѧ: а҆́ще же гѹби́тель є҆́сть, и҆ дѹ́шѹ свою̀ приложи́тъ.

²⁰Слѹ́шай, сы́не, ѻ҆тца̀ твоегѡ̀ наказа́нїѧ, да мѹ́дръ бѹ́деши въ послѣ҄днѧѧ твоѧ҄.

²¹Мнѡ́ги мы҄сли въ се́рдцы мѹ́жа: совѣ́тъ же гд҇ень во вѣ́къ пребыва́етъ.

²²Пло́дъ мѹ́жеви ми́лостынѧ: лѹ́чше же ни́щь првдный, не́жели бога́тъ лжи́въ.

²³Стра́хъ гд҇ень въ живо́тъ мѹ́жеви: а҆ безстра́шный водвори́тсѧ на мѣ́стѣхъ, и҆дѣ́же не наблюда́етсѧ ра́зѹмъ.

²⁴Скрыва́ѧй въ нѣ́дрѣхъ рѹ́цѣ своѝ непра́веднѡ нижѐ ко ѹ҆стѡ́мъ свои҄мъ принесе́тъ ѧ҆̀.

²⁵Гѹби́телю ра҄ны прїе́млющѹ, безѹ́мный кова́рнѣе бѹ́детъ: а҆́ще же ѡ҆блича́еши мѹ́жа разѹ́мна, ѹ҆разѹмѣ́етъ чѹ́вство.

²⁶Безче́ствѹѧй ѻ҆тца̀ и҆ ѿрѣва́ѧй ма́терь свою̀ срамотѹ̀ прїи́метъ и҆ поноше́нїе.

²⁷Сы́нъ ѡ҆ставлѧ́ѧй храни́ти наказа́нїе ѻ҆́тчее поѹчи́тсѧ словесє́мъ ѕлы҄мъ.

²⁸Вырѹча́ѧй ѻ҆́трока несмы́слена досажда́етъ ѡ҆правда́нїю: ѹ҆ста́ же нечести́выхъ пожрѹ́тъ сѹ́дъ.

²⁹Ѹ҆готовлѧ́ютсѧ невоздє́ржнымъ ра҄ны, и҆ мѹчє́нїѧ подо́бнѣ неразѹ҄мнымъ.