Read Библия Церковнославянская При́тчей соломѡ́нихъ 2 Bible Online

При́тчей соломѡ́нихъ 2 - Библия Церковнославянская bible

При́тчей соломѡ́нихъ 2

¹Сы́не, а҆́ще прїи́мъ глаго́лъ моеѧ̀ за́повѣди, скры́еши въ себѣ̀,

²послѹ́шаетъ премѹ́дрости твоѐ ѹ҆́хо, и҆ приложи́ши се́рдце твоѐ къ ра́зѹмѹ: приложи́ши же є҆̀ въ наказа́нїе сы́нѹ твоемѹ̀.

³А҆́ще бо премѹ́дрость призове́ши и҆ ра́зѹмѹ да́си гла́съ тво́й, чѹ́вство же взы́щеши вели́кимъ гла́сомъ,

⁴и҆ а҆́ще взы́щеши є҆ѧ̀ ѩ҆́кѡ сребра̀, и҆ ѩ҆́коже сокрѡ́вища и҆спыта́еши ю҆̀:

⁵тогда̀ ѹ҆разѹмѣ́еши стра́хъ гд҇ень и҆ позна́нїе бж҃їе ѡ҆брѧ́щеши:

⁶ѩ҆́кѡ гд҇ь дае́тъ премѹ́дрость, и҆ ѿ лица̀ є҆гѡ̀ позна́нїе и҆ ра́зѹмъ:

⁷и҆ сокро́вищствѹетъ и҆справлѧ́ющымъ сп҇нїе, защища́етъ же ше́ствїе и҆́хъ,

⁸є҆́же сохрани́ти пѹти҄ ѡ҆правда́нїй, и҆ пѹ́ть благоговѣ́инствѹющихъ є҆го̀ сохрани́тъ.

⁹Тогда̀ ѹ҆разѹмѣ́еши пра́вдѹ и҆ сѹ́дъ и҆ и҆спра́виши всѧ҄ стєзѝ бл҃гї҄ѧ.

¹⁰А҆́ще бо прїи́детъ премѹ́дрость въ твою̀ мы́сль, чѹ́вство же твое́й дѹшѝ добро̀ бы́ти возмни́тсѧ,

¹¹совѣ́тъ до́бръ сохрани́тъ тѧ̀, помышле́нїе же преподо́бное соблюде́тъ тѧ̀,

¹²да и҆зба́витъ тѧ̀ ѿ пѹтѝ ѕла́гѡ и҆ ѿ мѹ́жа, глаго́люща ничто́же вѣ́рно.

¹³Ѽ, ѡ҆ста́вившїи пѹти҄ пра҄выѧ, є҆́же ходи́ти въ пѹте́хъ тмы̀!

¹⁴ѽ, веселѧ́щїисѧ ѡ҆ ѕлы́хъ и҆ ра́дѹющїисѧ ѡ҆ развраще́нїи ѕлѣ́мъ!

¹⁵и҆́хже стєзѝ стро́пѡтны, и҆ кри҄ва течє́нїѧ и҆́хъ, є҆́же дале́че тѧ̀ сотвори́ти ѿ пѹтѝ пра́ва,

¹⁶и҆ чѹ́жда ѿ пра́веднагѡ ра́зѹма. Сы́не, да тѧ̀ не пости́гнетъ совѣ́тъ ѕлы́й,

¹⁷ѡ҆ставлѧ́ѧй ѹ҆че́нїе ю҆́ности, и҆ завѣ́та бж҇твеннагѡ забы́вый:

¹⁸поста́ви бо при сме́рти до́мъ сво́й и҆ при а҆́дѣ съ земны́ми дѣѧ҄нїѧ своѧ҄.

¹⁹Всѝ ходѧ́щїи по немѹ̀ не возвратѧ́тсѧ, нижѐ пости́гнѹтъ сте́зь пра́выхъ: ни бо̀ дости́гнѹтъ лѣ́тъ жи́зни.

²⁰А҆́ще бо бы́ша ходи́ли въ стєзѝ бл҃гї҄ѧ, ѡ҆брѣлѝ ѹ҆́бѡ бы́ша стєзѝ пра҄вы гла҄дки: бла́зи бѹ́дѹтъ жи́телїе на землѝ, неѕло́бивїи же ѡ҆ста́нѹтъ на не́й:

²¹ѩ҆́кѡ пра́вїи вселѧ́тсѧ на землѝ, и҆ прпдбнїи ѡ҆ста́нѹтъ на не́й.

²²Пѹтїѐ нечести́выхъ ѿ землѝ поги́бнѹтъ, пребеззако́ннїи же и҆зри́нѹтсѧ ѿ неѧ̀.