Read Библия Церковнославянская При́тчей соломѡ́нихъ 21 Bible Online

При́тчей соломѡ́нихъ 21 - Библия Церковнославянская bible

При́тчей соломѡ́нихъ 21

¹ѩ҆́коже ѹ҆стремле́нїе воды̀, та́кѡ се́рдце царе́во въ рѹцѣ̀ бж҃їей: а҆́може а҆́ще восхо́щетъ ѡ҆брати́ти, та́мѡ ѹ҆клони́тъ є҆̀.

²Всѧ́къ мѹ́жъ ѩ҆влѧ́етсѧ себѣ̀ пра́веденъ: ѹ҆правлѧ́етъ же сердца̀ гд҇ь.

³Твори́ти првднаѧ и҆ и҆́стинствовати ѹ҆гѡ́дна бг҃ѹ па́че, не́жели же́ртвъ кро́вь.

⁴Велемѹ́дрый во ѹ҆кори́знѣ дерзосе́рдъ, свѣти́ло же нечести́выхъ грѣсѝ.

⁵Помышлє́нїѧ тщали́вагѡ во и҆з̾ѻби́лїи, и҆ всѧ́къ неради́вый въ лише́нїи.

⁶Дѣ́лаѧй сокрѡ́вища ѧ҆зы́комъ лжи́вымъ сѹ́етнаѧ го́нитъ въ сѣ҄ти смє́ртныѧ.

⁷Всегѹби́телство на нечєсти́выѧ ѹ҆стремлѧ́етсѧ: не хотѧ́тъ бо твори́ти првднаѧ.

⁸Къ стро́пѡтнымъ стро́пѡтныѧ пѹти҄ посыла́етъ бг҃ъ: чи҄ста бо и҆ пра҄ва дѣла̀ є҆гѡ̀.

⁹Лѹ́чше жи́ти во ѹ҆́глѣ непокрове́ннѣмъ, не́жели въ пова́пленныхъ съ непра́вдою и҆ въ хра́минѣ ѻ҆́бщей.

¹⁰Дѹша̀ нечести́вагѡ не поми́лѹетсѧ ни ѿ є҆ди́нагѡ ѿ человѣ́кѡвъ.

¹¹Тщетѹ̀ прїе́млющѹ невозде́ржномѹ, кова́рнѣйшїй бѹ́детъ неѕло́бивый, разѹмѣва́ѧй же мѹ́дрый прїи́метъ ра́зѹмъ.

¹²Разѹмѣва́етъ првдный сердца̀ нечести́выхъ и҆ ѹ҆ничтожа́етъ нечести҄выѧ въ ѕлы́хъ.

¹³И҆́же затыка́етъ ѹ҆шеса̀ своѧ҄, є҆́же не послѹ́шати немощна́гѡ, и҆ то́й призове́тъ, и҆ не бѹ́детъ послѹ́шаѧй є҆гѡ̀.

¹⁴Даѧ́нїе та́йно ѿвраща́етъ гнѣ́вы, щадѧ́й же дарѡ́въ воздвиза́етъ ѩ҆́рость крѣ́пкѹю.

¹⁵Весе́лїе првдныхъ твори́ти сѹ́дъ: прпдбный же нечи́стъ ѹ҆ ѕлодѣ́євъ.

¹⁶Мѹ́жъ заблѹжда́ѧй ѿ пѹтѝ пра́вды въ со́нмищи и҆споли́нѡвъ почі́етъ.

¹⁷Мѹ́жъ скѹ́денъ лю́битъ весе́лїе, любѧ́й же вїно̀ и҆ є҆ле́й не ѡ҆богати́тсѧ.

¹⁸Ѡ҆тре́бїе же првдникѹ беззако́нникъ.

¹⁹Лѹ́чше жи́ти въ землѝ пѹ́стѣ, не́же жи́ти съ жено́ю сварли́вою и҆ ѧ҆зы́чною и҆ гнѣвли́вою.

²⁰Сокро́вище вожделѣ́нно почі́етъ во ѹ҆стѣ́хъ мѹ́драгѡ: безѹ́мнїи же мѹ́жїе пожира́ютъ є҆̀.

²¹Пѹ́ть пра́вды и҆ ми́лостыни ѡ҆брѧ́щетъ живо́тъ и҆ сла́вѹ.

²²Во гра́ды крѣ҄пки вни́де премѹ́дрый и҆ разрѹшѝ ѹ҆твержде́нїе, на не́же надѣ́ѧшасѧ нечести́вїи.

²³И҆́же храни́тъ своѧ҄ ѹ҆ста̀ и҆ ѧ҆зы́къ, соблюда́етъ ѿ печа́ли дѹ́шѹ свою̀.

²⁴Проде́рзый и҆ велича́вый и҆ гордели́вый гѹби́тель нарица́етсѧ: а҆ и҆́же памѧтоѕло́бствѹетъ, беззако́ненъ.

²⁵По́хѡти лѣни́ваго ѹ҆бива́ютъ: не произволѧ́ютъ бо рѹ́цѣ є҆гѡ̀ твори́ти что̀.

²⁶Нечести́вый жела́етъ ве́сь де́нь по́хѡти ѕлы҄ѧ, првдный же ми́лѹетъ и҆ ще́дритъ неща́днѡ.

²⁷Жє́ртвы нечести́выхъ ме́рзость гд҇еви: и҆́бо беззако́ннѡ прино́сѧтъ ѧ҆̀.

²⁸Свидѣ́тель ло́жный поги́бнетъ, мѹ́жъ же послѹшли́въ сохранѧ́емь возглаго́летъ.

²⁹Нечести́въ мѹ́жъ безстѹ́днѡ стои́тъ лице́мъ: пра́вый же са́мъ разѹмѣва́етъ пѹти҄ своѧ҄.

³⁰Нѣ́сть премѹ́дрости, нѣ́сть мѹ́жества, нѣ́сть совѣ́та ѹ҆ нечести́вагѡ.

³¹Ко́нь ѹ҆готовлѧ́етсѧ на де́нь бра́ни: ѿ гд҇а же по́мощь.