Read Библия Церковнославянская При́тчей соломѡ́нихъ 22 Bible Online

При́тчей соломѡ́нихъ 22 - Библия Церковнославянская bible

При́тчей соломѡ́нихъ 22

¹Лѹ́чше и҆́мѧ до́брое, не́же бога́тство мно́го, па́че же сребра̀ и҆ зла́та блгдть бл҃га́ѧ.

²Бога́тъ и҆ ни́щь срѣто́ста дрѹ́гъ дрѹ́га, ѻ҆бои́хъ же гд҇ь сотворѝ.

³Хѹдо́гъ, ви́дѣвъ лѹка́ваго мѹ́чима крѣ́пкѡ, са́мъ наказѹ́етсѧ: безѹ́мнїи же мимоше́дше ѡ҆тщети́шасѧ.

⁴Ро́дъ премѹ́дрости стра́хъ гд҇ень, и҆ бога́тство и҆ сла́ва и҆ живо́тъ.

⁵Волчцы̀ и҆ сѣ҄ти на пѹте́хъ стро́потныхъ, хранѧ́й же свою̀ дѹ́шѹ и҆збѣжи́тъ и҆̀хъ.

⁶Бога́тїи ѹ҆бо́гими и҆́мѹтъ ѡ҆блада́ти,

⁷и҆ рабѝ свои҄мъ господе́мъ взаи́мъ дадѹ́тъ.

⁸Сѣ́ѧвый ѕла҄ѧ по́жнетъ ѕла҄ѧ, ѩ҆́звѹ же дѣ́лъ свои́хъ соверши́тъ.

⁹Мѹ́жа ти́ха и҆ даѧ́телѧ лю́битъ гд҇ь, сѹетѹ́ же дѣ́лъ є҆гѡ̀ сконча́етъ.

¹⁰Ми́лѹѧй ни́щаго са́мъ препита́етсѧ: ѿ свои́хъ бо хлѣ́бѡвъ дадѐ ѹ҆бо́гомѹ. Побѣ́дѹ и҆ че́сть ѹ҆строѧ́етъ даѧ́й да́ры, ѻ҆ба́че дѹ́шѹ погѹблѧ́етъ стѧжа́вшихъ.

¹¹И҆зженѝ ѿ со́нмища гѹби́телѧ, и҆ и҆зы́детъ съ ни́мъ прѣ́нїе: є҆гда́ бо сѧ́детъ въ со́нмищи, всѣ́хъ безче́ститъ.

¹²Лю́битъ гд҇ь прпдбнаѧ сердца̀, прїѧ́тни же є҆мѹ̀ всѝ непоро́чнїи въ пѹте́хъ свои́хъ: ѹ҆стна́ма пасе́тъ ца́рь (лю́ди своѧ҄).

¹³Ѻ҆́чи гд҇ни соблюда́ютъ чѹ́вство: презира́етъ словеса̀ законопрестѹ́пный.

¹⁴Вины̀ и҆́щетъ и҆ глаго́летъ лѣни́вый: ле́въ на стезѧ́хъ, на пѹте́хъ же разбѡ́йницы.

¹⁵ѩ҆́ма глѹбока̀ ѹ҆ста̀ законопрестѹ́пныхъ: возненави́дѣный же ѿ гд҇а впаде́тсѧ въ ню̀. Сѹ́ть пѹтїѐ ѕлі́и пред̾ мѹ́жемъ, и҆ не лю́битъ возврати́тисѧ ѿ ни́хъ: возврати́тисѧ же подоба́етъ ѿ пѹтѝ стро́потна и҆ ѕла́гѡ.

¹⁶Безѹ́мїе ви́ситъ на се́рдцы ю҆́нагѡ: же́злъ же и҆ наказа́нїе дале́че (ѿго́нитъ) ѿ негѡ̀.

¹⁷Ѡ҆би́дѧй ѹ҆бо́гаго мнѡ́гаѧ себѣ̀ ѕла҄ твори́тъ, дае́тъ же бога́томѹ во ѡ҆скѹдѣ́нїе (себѣ̀).

¹⁸Ко словесє́мъ мѹ́дрыхъ прилага́й твоѐ ѹ҆́хо, и҆ ѹ҆слы́ши моѧ҄ словеса̀: свое́ же се́рдце ѹ҆твердѝ (къ ни҄мъ), да разѹмѣ́еши, ѩ҆́кѡ дѡбра̀ сѹ́ть.

¹⁹И҆ а҆́ще вложи́ши ѧ҆̀ въ се́рдце твоѐ, возвеселѧ́тъ тебѐ кѹ́пнѡ во твои́хъ ѹ҆стнѣ́хъ.

²⁰Да бѹ́детъ тѝ на гд҇а наде́жда, и҆ пока́жетъ тѝ пѹ́ть сво́й.

²¹Ты́ же напишѝ ѧ҆̀ себѣ̀ три́жды, на совѣ́тъ и҆ смы́слъ и҆ ра́зѹмъ, на широтѣ̀ се́рдца твоегѡ̀: ѹ҆чѹ́ бо тѧ̀ и҆́стинномѹ словесѝ, и҆ ра́зѹма блага́гѡ слѹ́шати на ѿвѣ́ты словесє́мъ и҆́стиннымъ предлага́ємымъ тебѣ̀.

²²Не наси́лствѹй ни́щаго, занѐ ѹ҆бо́гъ є҆́сть, и҆ не досажда́й немощно́мѹ во вратѣ́хъ:

²³гд҇ь бо и҆́мать сѹди́ти є҆гѡ̀ сѹ́дъ, и҆ и҆зба́виши твою̀ безбѣ́днѹю дѹ́шѹ.

²⁴Не быва́й дрѹ́гъ мѹ́жѹ гнѣвли́вѹ и҆ со дрѹ́гомъ жестокосе́рдымъ не соводворѧ́йсѧ:

²⁵да не когда̀ наѹчи́шисѧ пѹтє́мъ є҆гѡ̀ и҆ прїи́меши тене́та дѹшѝ твое́й.

²⁶Не вдава́йсѧ въ порѹче́нїе, стыдѧ́сѧ лица̀:

²⁷є҆гда́ бо не бѹ́деши и҆мѣ́ти чи́мъ и҆скѹпи́тисѧ, во́змѹтъ посте́лю, ѩ҆́же под̾ ре́бры твои́ми.

²⁸Не прелага́й предѣ҄лъ вѣ́чныхъ, ѩ҆̀же положи́ша ѻ҆тцы̀ твоѝ.

²⁹Прозри́телнѹ человѣ́кѹ и҆ ѻ҆́стромѹ въ дѣ́лѣхъ свои́хъ пред̾ царьмѝ подоба́етъ стоѧ́ти, и҆ не стоѧ́ти пред̾ мѹжмѝ просты́ми.