Read Библия Церковнославянская При́тчей соломѡ́нихъ 23 Bible Online

При́тчей соломѡ́нихъ 23 - Библия Церковнославянская bible

При́тчей соломѡ́нихъ 23

¹А҆́ще сѧ́деши вечерѧ́ти на трапе́зѣ си́льнагѡ, разѹ́мнѡ разѹмѣва́й предлага́ємаѧ тебѣ̀,

²и҆ налага́й рѹ́кѹ твою̀, вѣ́дый, ѩ҆́кѡ сицєва́ѧ тебѣ̀ подоба́етъ ѹ҆гото́вити:

³а҆́ще же несы́тнѣйшїй є҆сѝ, не жела́й бра́шенъ є҆гѡ̀: сїѧ҄ бо и҆́мѹтъ живо́тъ ло́женъ.

⁴Не распростира́йсѧ ѹ҆бо́гъ сы́й съ бога́тымъ, твое́ю же мы́слїю ѹ҆далѧ́йсѧ.

⁵А҆́ще ѹ҆стреми́ши на него̀ ѻ҆́ко твоѐ, никогда́же ѩ҆ви́тсѧ: содѣ҄ланы бо сѹ́ть є҆мѹ̀ кри́ла ѩ҆́кѡ ѻ҆рлѹ̀, и҆ ѡ҆браща́етсѧ въ до́мъ настоѧ́телѧ своегѡ̀.

⁶Не вечерѧ́й съ мѹ́жемъ зави́стливымъ, нижѐ похо́щеши пи́щей є҆гѡ̀:

⁷и҆́мже бо ѡ҆́бразомъ а҆́ще кто̀ поглоти́тъ власы̀, си́це ѩ҆́стъ и҆ пїе́тъ: нижѐ къ себѣ̀ да введе́ши є҆го̀ и҆ снѣ́си хлѣ́бъ тво́й съ ни́мъ:

⁸и҆зблюе́тъ бо є҆го̀ и҆ ѡ҆скверни́тъ словеса̀ твоѧ҄ дѡ́браѧ.

⁹Во ѹ҆́шїю безѹ́мнагѡ ничто́же глаго́ли, да не когда̀ порѹга́етъ разѹ҄мнаѧ словеса̀ твоѧ҄.

¹⁰Не прелага́й предѣ҄лъ вѣ́чныхъ и҆ въ стѧжа́нїе сиро́тъ не вни́ди:

¹¹и҆збавлѧ́ѧй бо и҆̀хъ гд҇ь крѣ́покъ є҆́сть и҆ разсѹ́дитъ сѹ́дъ и҆́хъ съ тобо́ю.

¹²Да́ждь въ наказа́нїе се́рдце твоѐ, ѹ҆шеса́ же твоѧ҄ ѹ҆гото́вай словесє́мъ чѹ́вствєннымъ.

¹³Не престава́й младе́нца нака́зовати: а҆́ще бо жезло́мъ бїе́ши є҆го̀, не ѹ҆́мретъ (ѿ негѡ̀):

¹⁴ты́ бо побїе́ши є҆го̀ жезло́мъ, дѹ́шѹ же є҆гѡ̀ и҆зба́виши ѿ сме́рти.

¹⁵Сы́не, а҆́ще премѹ́дро бѹ́детъ се́рдце твоѐ, возвесели́ши и҆ моѐ се́рдце,

¹⁶и҆ пребѹ́дѹтъ въ словесѣ́хъ твоѝ ѹ҆стнѣ̀ къ мои҄мъ ѹ҆стна́мъ, а҆́ще пра҄ва бѹ́дѹтъ.

¹⁷Да не ревнѹ́етъ се́рдце твоѐ грѣ́шникѡмъ, но въ стра́сѣ гд҇ни бѹ́ди ве́сь де́нь:

¹⁸а҆́ще бо соблюде́ши ѧ҆̀, бѹ́дѹтъ тѝ внѹ́цы, и҆ ѹ҆пова́нїе твоѐ не ѿстѹ́питъ.

¹⁹Слѹ́шай, сы́не, и҆ премѹ́дръ быва́й и҆ и҆справлѧ́й мы҄сли твоегѡ̀ се́рдца:

²⁰не бѹ́ди вїнопі́йца, нижѐ прилага́йсѧ къ сложе́нїємъ и҆ кѹпова́нїємъ мѧ́съ:

²¹всѧ́къ бо пїѧ́ница и҆ блѹдни́къ ѡ҆бнища́етъ, и҆ ѡ҆блече́тсѧ въ раздра҄ннаѧ и҆ въ рѹ҄бища всѧ́къ сонли́вый.

²²Слѹ́шай, сы́не, ѻ҆тца̀ роди́вшагѡ тѧ̀, и҆ не презира́й, є҆гда̀ состарѣ́етсѧ ма́ти твоѧ̀.

²³И҆́стинѹ стѧжѝ и҆ не ѿри́ни мѹ́дрости и҆ ѹ҆че́нїѧ и҆ ра́зѹма.

²⁴До́брѣ воспитова́етъ ѻ҆те́цъ пра́веденъ, ѡ҆ сы́нѣ же премѹ́дрѣмъ весели́тсѧ дѹша̀ є҆гѡ̀.

²⁵Да весели́тсѧ ѻ҆те́цъ и҆ ма́ти ѡ҆ тебѣ̀, и҆ да ра́дѹетсѧ ро́ждшаѧ тѧ̀.

²⁶Да́ждь мѝ, сы́не, твоѐ се́рдце, ѻ҆́чи же твоѝ моѧ҄ пѹти҄ да соблюда́ютъ.

²⁷Сосѹ́дъ бо сокрѹше́нъ чѹжді́й до́мъ, и҆ стѹдене́цъ тѣ́сенъ чѹжді́й:

²⁸се́й бо вско́рѣ поги́бнетъ, и҆ всѧ́кїй законопрестѹ́пникъ потреби́тсѧ.

²⁹Комѹ̀ го́ре; комѹ̀ молва̀; комѹ̀ сѹ́дове; комѹ̀ го́рєсти и҆ сва҄ры; комѹ̀ сокрѹшє́нїѧ вотщѐ; комѹ̀ си҄ни ѻ҆́чи;

³⁰Не пребыва́ющымъ ли въ вїнѣ̀; и҆ не назира́ющымъ ли, гдѣ̀ пи́рове быва́ютъ;

³¹Не ѹ҆пива́йтесѧ вїно́мъ, но бесѣ́дѹйте ко человѣ́кѡмъ првднымъ, и҆ бесѣ́дѹйте во прохо́дѣхъ: а҆́ще бо на ча́шы и҆ стклѧ҄ницы вда́си ѻ҆́чи твоѝ, послѣдѝ и҆́маши ходи́ти нажа́йшїй бѣли́лнагѡ дре́ва:

³²послѣди́ же ѩ҆́кѡ ѿ ѕмі́а ѹ҆ѧ́звенъ простре́тсѧ, и҆ ѩ҆́коже ѿ кера́ста разлива́етсѧ є҆мѹ̀ ѩ҆́дъ.

³³Ѻ҆́чи твоѝ є҆гда̀ ѹ҆́зрѧтъ (женѹ̀) чѹждѹ́ю, ѹ҆ста̀ твоѧ҄ тогда̀ возглаго́лютъ стро́пѡтнаѧ:

³⁴и҆ возлѧ́жеши ѩ҆́кѡ въ се́рдцы мо́рѧ и҆ ѩ҆́коже ко́рмчїй во мно́зѣ волне́нїи.

³⁵Рече́ши же: би́ша мѧ̀, и҆ не поболѣ́хъ, и҆ порѹга́шасѧ мѝ, а҆́зъ же не разѹмѣ́хъ: когда̀ ѹ҆́тро бѹ́детъ, да ше́дъ взыщѹ̀, съ ни́миже сни́дѹсѧ;