Read Библия Церковнославянская При́тчей соломѡ́нихъ 25 Bible Online

При́тчей соломѡ́нихъ 25 - Библия Церковнославянская bible

При́тчей соломѡ́нихъ 25

¹Сїѧ҄ при҄тчи соломѡ҄ни бы́вшыѧ нерасположє́нны, ѩ҆̀же списа́ша дрѹ́зїе є҆зекі́и царѧ̀ ї҆ѹде́йска.

²Сла́ва бж҃їѧ кры́етъ сло́во, сла́ва же царе́ва почита́етъ повелѣ҄нїѧ є҆гѡ̀.

³Не́бо высоко̀, землѧ́ же глѹбока̀: се́рдце же царе́во неѡбличи́телно.

⁴Кѹ́й неискѹше́нное сребро̀, и҆ ѡ҆чи́ститсѧ чи́сто всѐ.

⁵Ѹ҆бива́й нечести҄выѧ ѿ лица̀ царе́ва, и҆ и҆спра́витсѧ въ пра́вдѣ престо́лъ є҆гѡ̀.

⁶Не горди́сѧ пред̾ лице́мъ царе́вымъ и҆ на мѣ́стѣ си́льныхъ не ста́ни:

⁷лѹ́чше бо тѝ є҆́сть, є҆гда̀ рече́тъ: взы́ди ко мнѣ̀: не́жели смири́тисѧ тебѣ̀ пред̾ лице́мъ си́льнагѡ.

⁸ѩ҆̀же ви́дѣста ѻ҆́чи твоѝ, глаго́ли. Не впа́дай въ тѧ́жбѹ ско́рѡ, да не раска́ешисѧ по́слѣжди, є҆гда̀ тебѣ̀ досади́тъ дрѹ́гъ тво́й.

⁹Встѹпа́й вспѧ́ть, не нерадѝ, да не поно́ситъ ѹ҆́бѡ тебѣ̀ дрѹ́гъ:

¹⁰сва́ра же твоѧ̀ и҆ вражда̀ твоѧ̀ не ѿстѹ́питъ, но бѹ́детъ тѝ ра́вна со сме́ртїю. Благода́ть и҆ любы̀ свобожда́етъ, въ ни́хже ѹ҆твердѝ себѐ, да не въ поноше́нїи бѹ́деши, но сохранѝ пѹти҄ твоѧ҄ до́брѣ ѹ҆стро́єны.

¹¹(ѩ҆́коже) ѩ҆́блоко зла́то во ѹ҆серѧ́зи сарді́йскагѡ ка́мене, си́це рещѝ сло́во при прили́чныхъ є҆мѹ̀.

¹²И҆ (ѩ҆́коже) во ѹ҆серѧ́зь златы́й сарді́йскїй ка́мень многоцѣ́нный вѧ́жетсѧ, (си́це) сло́во премѹ́дро во ѹ҆́хо благопослѹ́шно.

¹³ѩ҆́коже и҆схо́дище снѣ́га въ жа́твѹ зно́ѧ по́льзѹетъ, та́кѡ вѣ́стникъ вѣ́ренъ посла́вшихъ є҆го̀: дѹ́шы бо ѹ҆потреблѧ́ющихъ є҆го̀ по́льзѹетъ.

¹⁴ѩ҆́коже вѣ́три и҆ ѡ҆́блацы и҆ дожде́ве ѩ҆влѧ́ющїисѧ, та́кѡ и҆ хва́лѧщїйсѧ ѡ҆ даѧ́нїи ло́жнѣмъ.

¹⁵Въ долготерпѣ́нїи благополѹ́чїе царє́мъ: ѧ҆зы́къ же мѧ́кокъ сокрѹша́етъ кѡ́сти.

¹⁶Ме́дъ ѡ҆брѣ́тъ ѩ҆́ждь ѹ҆мѣ́реннѡ, да не ка́кѡ пресыще́нъ и҆зблюе́ши.

¹⁷Не ѹ҆чаща́й вноси́ти но́гѹ твою̀ ко дрѹ́гѹ твоемѹ̀, да не когда̀ насы́щьсѧ тебє̀, возненави́дитъ тѧ̀.

¹⁸Дреко́ль и҆ ме́чь и҆ стрѣла̀ ѻ҆стра̀, та́кѡ и҆ мѹ́жъ свидѣ́телствѹѧй на дрѹ́га своего̀ свидѣ́телство ло́жное.

¹⁹Пѹ́ть ѕла́гѡ и҆ нога̀ законопрестѹ́пнагѡ поги́бнѹтъ въ де́нь ѕо́лъ.

²⁰ѩ҆́коже ѻ҆́цетъ неполе́зенъ вре́дѹ и҆ ды́мъ ѻ҆чи́ма, та́кѡ припа́дшаѧ стра́сть въ тѣлесѝ се́рдце ѡ҆скорблѧ́етъ.

²¹ѩ҆́коже мо́лїе въ ри́зѣ и҆ че́рвїе въ дре́вѣ, та́кѡ печа́ль мѹ́жѹ вреди́тъ се́рдце.

²²А҆́ще а҆́лчетъ вра́гъ тво́й, ѹ҆хлѣ́би є҆го̀: а҆́ще ли жа́ждетъ, напо́й є҆го̀:

²³сїе́ бо творѧ̀, ѹ҆́глїе ѻ҆́гненное собира́еши на главѹ̀ є҆гѡ̀, гд҇ь же возда́стъ тебѣ̀ бл҃га҄ѧ.

²⁴Вѣ́тръ сѣ́верный воздвиза́етъ ѡ҆́блаки, лице́ же безстѹ́дно ѧ҆зы́къ раздража́етъ.

²⁵Лѹ́чше жи́ти во ѹ҆́глѣ непокры́тѣмъ, не́же во хра́минѣ ѻ҆́бщей со жено́ю клеветли́вою.

²⁶ѩ҆́коже вода̀ стѹде́наѧ дѹшѝ жа́ждѹщей благопрїѧ́тна, та́кѡ вѣ́сть блага́ѧ ѿ землѝ и҆здале́ча.

²⁷ѩ҆́коже а҆́ще кто̀ и҆сто́чникъ загражда́етъ и҆ и҆схо́дище воды̀ гѹби́тъ, та́кѡ не лѣ́по првдникѹ па́сти пред̾ нечести́вымъ.

²⁸ѩ҆́сти ме́дъ мно́гѡ не добро̀: почита́ти же подоба́етъ словеса̀ сла҄вна.

²⁹ѩ҆́коже гра́дъ стѣна́ми разоре́нъ и҆ не ѡ҆гражде́нъ, та́кѡ мѹ́жъ творѧ́й что̀ без̾ совѣ́та.