Read Библия Церковнославянская При́тчей соломѡ́нихъ 26 Bible Online

При́тчей соломѡ́нихъ 26 - Библия Церковнославянская bible

При́тчей соломѡ́нихъ 26

¹ѩ҆́коже роса̀ въ жа́твѹ и҆ ѩ҆́коже до́ждь въ лѣ́тѣ {Є҆вр.: ѩ҆́коже снѣ́гъ въ лѣ́тѣ и҆ до́ждь въ жа́твѹ.}, та́кѡ нѣ́сть безѹ́мномѹ че́сти.

²ѩ҆́коже пти҄цы ѿлета́ютъ и҆ вра́бїеве, та́кѡ клѧ́тва сѹ́етнаѧ не на́йдетъ ни на кого́же.

³ѩ҆́коже би́чь коню̀ и҆ ѡ҆сте́нъ ѻ҆слѹ̀, та́кѡ же́злъ ѩ҆зы́кѹ законопрестѹ́пнѹ.

⁴Не ѿвѣща́й безѹ́мномѹ по безѹ́мїю є҆гѡ̀, да не подо́бенъ є҆мѹ̀ бѹ́деши:

⁵но ѿвѣща́й безѹ́мномѹ по безѹ́мїю є҆гѡ̀, да не ѩ҆ви́тсѧ мѹ́дръ ѹ҆ себє̀.

⁶Ѿ пѹті́й свои́хъ поноше́нїе твори́тъ, и҆́же посла̀ вѣ́стникомъ безѹ́мнымъ сло́во.

⁷Ѿимѝ ше́ствїе ѿ гле́знъ и҆ законопрестѹпле́нїе ѿ ѹ҆́стъ безѹ́мныхъ.

⁸И҆́же привѧзѹ́етъ ка́мень въ пра́щи, подо́бенъ є҆́сть даю́щемѹ безѹ́мномѹ сла́вѹ.

⁹Тє́рнїѧ прозѧба́ютъ въ рѹцѣ̀ пїѧ́ницы, и҆ порабоще́нїе въ рѹцѣ̀ безѹ́мныхъ.

¹⁰Мно́гими волнѹ́етсѧ всѧ́ка пло́ть безѹ́мныхъ, сокрѹша́етсѧ бо и҆зстѹпле́нїе и҆́хъ.

¹¹ѩ҆́коже пе́съ, є҆гда̀ возврати́тсѧ на своѧ҄ блевѡ́тины, и҆ ме́рзокъ быва́етъ, та́кѡ безѹ́мный свое́ю ѕло́бою возвра́щьсѧ на сво́й грѣ́хъ. Є҆́сть сты́дъ наводѧ́й грѣ́хъ, и҆ є҆́сть сты́дъ сла́ва и҆ благода́ть.

¹²Ви́дѣхъ мѹ́жа непщева́вша себѐ мѹ́дра бы́ти, ѹ҆пова́нїе же и҆́мать безѹ́мный па́че є҆гѡ̀.

¹³Глаго́летъ лѣни́вый по́сланъ на пѹ́ть: ле́въ на пѹте́хъ, на сто́гнахъ же разбѡ́йницы.

¹⁴ѩ҆́коже две́рь ѡ҆браща́етсѧ на пѧтѣ̀, та́кѡ лѣни́вый на ло́жи свое́мъ.

¹⁵Скры́въ лѣни́вый рѹ́кѹ въ нѣ́дро своѐ не возмо́жетъ принестѝ ко ѹ҆стѡ́мъ.

¹⁶Мѹдрѣ́йшїй себѣ̀ лѣни́вый ѩ҆влѧ́етсѧ, па́че во и҆з̾ѻби́лїи и҆зносѧ́щагѡ вѣ́сть.

¹⁷ѩ҆́коже держа́й за ѡ҆́шибъ пса̀, та́кѡ предсѣда́телствѹѧй чѹжде́мѹ сѹдѹ̀.

¹⁸ѩ҆́коже врачѹ́емїи ме́щѹтъ словеса̀ на человѣ́ки, срѣта́ѧй же сло́вомъ пе́рвый за́пнетсѧ:

¹⁹та́кѡ всѝ кова́рствѹющїи над̾ свои́ми дрѹ҄ги: є҆гда́ же ѹ҆ви́дѣни бѹ́дѹтъ, глаго́лютъ, ѩ҆́кѡ и҆гра́ѧ содѣ́ѧхъ.

²⁰Во мно́зѣхъ дре́вѣхъ расте́тъ ѻ҆́гнь: а҆ и҆дѣ́же нѣ́сть разгнѣвлѧ́юща, ѹ҆молка́етъ сва́ръ.

²¹Ѻ҆гни́ще ѹ҆́глїю, и҆ дрова̀ ѻ҆гне́ви: мѹ́жъ же клеветли́въ въ мѧте́жъ сва́ра.

²²Словеса̀ ласка́телей мѧ҄гка: сїѧ҄ же ѹ҆дарѧ́ютъ въ сокрѡ́вища ѹ҆тро́бъ.

²³Сребро̀ дае́мо съ ле́стїю, ѩ҆́коже скѹде́ль вмѣнѧ́емо: ѹ҆стнѣ̀ гла҄дки се́рдце покрыва́ютъ приско́рбно.

²⁴Ѹ҆стна́ма всѧ҄ ѡ҆бѣщава́етъ пла́чай вра́гъ, въ се́рдцы же содѣва́етъ ле́сть.

²⁵А҆́ще тѧ̀ мо́литъ вра́гъ ве́лїимъ гла́сомъ, не вѣ́рѹй є҆мѹ̀, се́дмь бо є҆́сть лѹка́вствїй въ дѹшѝ є҆гѡ̀.

²⁶Таѧ́й враждѹ̀ составлѧ́етъ ле́сть: ѿкрыва́етъ же своѧ҄ грѣхѝ благоразѹ́мный на со́нмищихъ.

²⁷И҆зрыва́ѧй ѩ҆́мѹ и҆́скреннемѹ впаде́тсѧ въ ню̀: валѧ́ѧй же ка́мень на себѐ вали́тъ.

²⁸Ѧ҆зы́къ лжи́въ ненави́дитъ и҆́стины, ѹ҆ста́ же непокровє́нна творѧ́тъ нестрое́нїе.