Read Библия Церковнославянская При́тчей соломѡ́нихъ 28 Bible Online

При́тчей соломѡ́нихъ 28 - Библия Церковнославянская bible

При́тчей соломѡ́нихъ 28

¹Бѣ́гаетъ нечести́вый ни є҆ди́номѹ же гонѧ́щѹ, првдный же ѩ҆́кѡ ле́въ ѹ҆пова́ѧ.

²За грѣхѝ нечести́выхъ сѹ́дове востаю́тъ: мѹ́жъ же хи́трый ѹ҆гаси́тъ ѧ҆̀.

³Проде́рзый въ нече́стїихъ ѡ҆клевета́етъ ни́щыѧ, ѩ҆́коже до́ждь си́льный не поле́зенъ:

⁴та́кѡ ѡ҆ста́вившїи зако́нъ хва́лѧтъ нече́стїе, лю́бѧщїи же зако́нъ ѡ҆гражда́ютъ себѣ̀ стѣ́нѹ.

⁵Мѹ́жїе ѕлі́и не ѹ҆разѹмѣ́ютъ сѹда̀, и҆́щѹщїи же гд҇а ѹ҆разѹмѣ́ютъ ѡ҆ все́мъ.

⁶Лѹ́чше ни́щь ходѧ́й во и҆́стинѣ, не́жели бога́тъ ло́жь.

⁷Храни́тъ зако́нъ сы́нъ разѹ́мный: а҆ и҆́же пасе́тъ несы́тость, безче́ститъ ѻ҆тца̀ своего̀.

⁸Ѹ҆множа́ѧй бога́тство своѐ съ ли́хвами и҆ прибы҄тки ми́лѹющемѹ ни́щыѧ собира́етъ є҆̀.

⁹Ѹ҆кланѧ́ѧй ѹ҆́хо своѐ не послѹ́шати зако́на и҆ са́мъ моли́твѹ свою̀ ѡ҆мерзи́лъ.

¹⁰И҆́же льсти́тъ пра҄выѧ на пѹтѝ ѕлѣ́мъ, во и҆стлѣ́нїе са́мъ впаде́тъ: беззако́ннїи же минѹ́ютъ блага҄ѧ и҆ не вни́дѹтъ въ нѧ̀.

¹¹Премѹ́дръ ѹ҆ себє̀ мѹ́жъ бога́тый, ѹ҆бо́гїй же разѹми́въ пре́зритъ є҆го̀.

¹²По́мощїю првдныхъ мно́га быва́етъ сла́ва, на мѣ́стѣхъ же нечести́выхъ погиба́ютъ человѣ́цы.

¹³Покрыва́ѧй нече́стїе своѐ не ѹ҆спѣ́етъ во блага҄ѧ, повѣ́даѧ же ѡ҆бличє́нїѧ возлю́бленъ бѹ́детъ.

¹⁴Блаже́нъ мѹ́жъ, и҆́же бои́тсѧ всѣ́хъ за благоговѣ́нїе, а҆ жестосе́рдый впа́даетъ во ѕла҄ѧ.

¹⁵Ле́въ а҆́лченъ и҆ во́лкъ жа́жденъ, и҆́же тѷра́нствѹетъ {мѹчи́тельски ѡ҆блада́етъ}, ни́щь сы́й, над̾ ѩ҆зы́комъ ѹ҆бо́гимъ.

¹⁶Ца́рь скѹ́денъ ѹ҆ро́комъ вели́къ клеветни́къ (быва́етъ), а҆ ненави́дѧй непра҄вды до́лгѡ лѣ́тъ поживе́тъ.

¹⁷Мѹ́жа, и҆́же въ винѣ̀ сме́ртнѣ, вырѹча́ѧй бѣгле́цъ бѹ́детъ, а҆ не ѹ҆твержде́нъ. Наказѹ́й сы́на, и҆ возлю́битъ тѧ̀ и҆ да́стъ лѣ́потѹ твое́й дѹшѝ, не послѹ́шаетъ ѩ҆зы́ка законопрестѹ́пна.

¹⁸Ходѧ́й пра́веднѡ по́мощь прїи́метъ, ходѧ́й же въ стро́пѡтны пѹти҄ ѹ҆вѧ́знетъ.

¹⁹Дѣ́лаѧй свою̀ зе́млю насы́титсѧ хлѣ́бѡвъ, гонѧ́й же пра́здность насы́титсѧ нищеты̀.

²⁰Мѹ́жъ вѣ́ры досто́йный мно́гѡ благослови́тсѧ, ѕлы́й же не без̾ мѹче́нїѧ бѹ́детъ.

²¹И҆́же не срамлѧ́етсѧ лица̀ првдныхъ, не бла́гъ: таковы́й за ѹ҆крѹ́хъ хлѣ́ба прода́стъ мѹ́жа.

²²Тщи́тсѧ ѡ҆богати́тисѧ мѹ́жъ зави́дливъ, и҆ не вѣ́сть, ѩ҆́кѡ ми́лостивый воз̾ѡблада́етъ и҆́мъ.

²³Ѡ҆блича́ѧй человѣ́чы пѹти҄ благода́ть и҆́мать па́че ѧ҆зы́комъ ласка́ющагѡ.

²⁴И҆́же ѿверга́етъ ѻ҆тца̀ и҆лѝ ма́терь и҆ мни́тсѧ не согрѣша́ти, се́й соприча́стникъ є҆́сть мѹ́жѹ нечести́вѹ.

²⁵Невѣ́рный мѹ́жъ сѹ́дитъ тѹ́не, а҆ и҆́же надѣ́етсѧ на гд҇а, въ прилѣжа́нїи бѹ́детъ.

²⁶И҆́же надѣ́етсѧ на де́рзо се́рдце, таковы́й безѹ́менъ: а҆ и҆́же хо́дитъ въ премѹ́дрости, спасе́тсѧ.

²⁷И҆́же дае́тъ ѹ҆бѡ́гимъ, не ѡ҆скѹдѣ́етъ: а҆ и҆́же ѿвраща́етъ ѻ҆́ко своѐ, въ скѹ́дости бѹ́детъ мно́зѣ.

²⁸На мѣ́стѣхъ нечести́выхъ стенѧ́тъ првднїи, въ поги́бели же и҆́хъ ѹ҆мно́жатсѧ првднїи.