Read Библия Церковнославянская При́тчей соломѡ́нихъ 29 Bible Online

При́тчей соломѡ́нихъ 29 - Библия Церковнославянская bible

При́тчей соломѡ́нихъ 29

¹Лѹ́чше мѹ́жъ ѡ҆блича́ѧй, не́жели мѹ́жъ жестоковы́йный: внеза́пѹ бо пали́мѹ є҆мѹ̀, нѣ́сть и҆сцѣле́нїѧ.

²Похвалѧ́ємымъ првднымъ, возвеселѧ́тсѧ лю́дїе: нача́лствѹющымъ же нечєсти́вымъ, стенѧ́тъ мѹ́жїе.

³Мѹ́жѹ лю́бѧщѹ премѹ́дрость, весели́тсѧ ѻ҆те́цъ є҆гѡ̀: а҆ и҆́же пасе́тъ любодѣ҄йцы, погѹби́тъ бога́тство.

⁴Ца́рь пра́веденъ возвыша́етъ зе́млю, мѹ́жъ же законопрестѹ́пникъ раскопова́етъ.

⁵И҆́же ѹ҆готовлѧ́етъ на лицѐ своемѹ̀ дрѹ́гѹ мре́жѹ, ѡ҆блага́етъ ю҆̀ на своѧ҄ но́ги.

⁶Согрѣша́ющемѹ мѹ́жѹ ве́лїѧ сѣ́ть: првдный же въ ра́дости и҆ въ весе́лїи бѹ́детъ.

⁷Ѹ҆мѣ́етъ првдный сѹ́дъ твори́ти ѹ҆бѡ́гимъ, а҆ нечести́вый не разѹмѣ́етъ ра́зѹма, и҆ ѹ҆бо́гомѹ нѣ́сть ѹ҆ма̀ разѹмѣва́ющагѡ.

⁸Мѹ́жїе беззако́ннїи сожго́ша гра́дъ, мѹ́дрїи же ѿврати́ша гнѣ́въ.

⁹Мѹ́жъ мѹ́дръ сѹ́дитъ ѩ҆зы́ки, мѹ́жъ же ѕлы́й гнѣ́ваѧйсѧ посмѣва́емь быва́етъ, а҆ не ѹ҆страша́етъ.

¹⁰Мѹ́жїе крове́й прича́стни возненави́дѧтъ прпдбнаго, пра́вїи же взы́щѹтъ дѹ́шѹ є҆гѡ̀.

¹¹Ве́сь гнѣ́въ сво́й произно́ситъ безѹ́мный: премѹ́дрый же скрыва́етъ по ча́сти.

¹²Царю̀ послѹ́шающѹ словесѐ непра́ведна, всѝ, и҆̀же под̾ ни́мъ, законопрестѹ҄пницы.

¹³Заимода́вцѹ и҆ должникѹ̀, дрѹ́гъ со дрѹ́гомъ соше́дшымсѧ, посѣще́нїе твори́тъ ѻ҆бѣ́ма гд҇ь.

¹⁴Царю̀ во и҆́стинѣ сѹдѧ́щемѹ ни́щымъ, престо́лъ є҆гѡ̀ во свидѣ́телство ѹ҆стро́итсѧ.

¹⁵ѩ҆́звы и҆ ѡ҆бличє́нїѧ даю́тъ мѹ́дрость: ѻ҆́трокъ же заблѹжда́ѧй срамлѧ́етъ роди́тєли своѧ҄.

¹⁶Мнѡ́гимъ сѹ́щымъ нечєсти́вымъ мно́зи грѣсѝ быва́ютъ, првднїи же, ѡ҆́нымъ па́дающымъ, ѹ҆страша́еми быва́ютъ.

¹⁷Наказѹ́й сы́на твоего̀, и҆ ѹ҆поко́итъ тѧ̀ и҆ да́стъ лѣ́потѹ дѹшѝ твое́й.

¹⁸Не бѹ́детъ сказа́тель ѩ҆зы́кѹ законопрестѹ́пнѹ, хранѧ́й же зако́нъ блаже́нъ.

¹⁹Не нака́жетсѧ словесы̀ ра́бъ же́стокъ: а҆́ще бо и҆ ѹ҆разѹмѣ́етъ, но не послѹ́шаетъ.

²⁰А҆́ще ѹ҆ви́диши мѹ́жа ско́ра въ словесѣ́хъ, разѹмѣ́й, ѩ҆́кѡ ѹ҆пова́нїе и҆́мать па́че є҆гѡ̀ безѹ́мный.

²¹И҆́же ласкосе́рдъ бѹ́детъ ѿ дѣ́тства, порабо́титсѧ, на послѣ́докъ же болѣ́зновати бѹ́детъ ѡ҆ се́мъ.

²²Мѹ́жъ гнѣвли́вый воздвиза́етъ сва́ръ, мѹ́жъ же ѩ҆́рый ѿкрыва́етъ грѣхѝ.

²³Досажде́нїе мѹ́жа смирѧ́етъ, а҆ смирє́нныѧ ѹ҆твержда́етъ гд҇ь въ сла́вѣ.

²⁴И҆́же соѡбща́етсѧ та́тю, ненави́дитъ своеѧ̀ дѹшѝ: а҆́ще же клѧ́твѹ предложе́ннѹю слы́шавшїи не возвѣстѧ́тъ,

²⁵ѹ҆боѧ́вшесѧ и҆ постыдѣ́вшесѧ человѣ́кѡвъ, преткнѹ́тсѧ: надѣ́ѧвыйсѧ же на гд҇а возвесели́тсѧ. Нече́стїе мѹ́жѹ дае́тъ соблажне́нїе: ѹ҆пова́ѧй же на влдкѹ спасе́тсѧ.

²⁶Мно́зи ѹ҆гожда́ютъ ли́цамъ нача́лникѡвъ: ѿ гд҇а же сбыва́етсѧ пра́вда мѹ́жѹ.

²⁷Ме́рзость првдникѹ мѹ́жъ непра́веденъ: ме́рзость же законопрестѹ́пномѹ пѹ́ть правоведѧ́й.