Read Библия Церковнославянская При́тчей соломѡ́нихъ 3 Bible Online

При́тчей соломѡ́нихъ 3 - Библия Церковнославянская bible

При́тчей соломѡ́нихъ 3

¹Сы́не, мои́хъ зако́нѡвъ не забыва́й, глаго́лы же моѧ҄ да соблюда́етъ твоѐ се́рдце:

²долготѹ́ бо житїѧ̀ и҆ лѣ҄та жи́зни и҆ ми́ръ приложа́тъ тебѣ̀.

³Ми́лѡстыни и҆ вѣ́ра да не ѡ҆скѹдѣва́ютъ тебѣ̀: ѡ҆бложи́ же ѧ҆̀ на твое́й вы́и и҆ напишѝ ѧ҆̀ на скрижа́ли се́рдца твоегѡ̀: и҆ ѡ҆брѧ́щеши бл҃года́ть.

⁴И҆ промышлѧ́й дѡ́браѧ пред̾ гд҇емъ (бг҃омъ) и҆ человѣ́ки.

⁵Бѹ́ди ѹ҆пова́ѧ всѣ́мъ се́рдцемъ на бг҃а, ѡ҆ твое́й же премѹ́дрости не возноси́сѧ:

⁶во всѣ́хъ пѹте́хъ твои́хъ познава́й ю҆̀, да и҆справлѧ́етъ пѹти҄ твоѧ҄.

⁷Не бѹ́ди мѹ́дръ ѡ҆ себѣ̀: бо́йсѧ же бг҃а и҆ ѹ҆клонѧ́йсѧ ѿ всѧ́кагѡ ѕла̀:

⁸тогда̀ и҆сцѣле́нїе бѹ́детъ тѣ́лѹ твоемѹ̀ и҆ ѹ҆врачева́нїе косте́мъ твои҄мъ.

⁹Чтѝ гд҇а ѿ пра́ведныхъ твои́хъ трѹдѡ́въ и҆ нача́тки дава́й є҆мѹ̀ ѿ твои́хъ плодѡ́въ пра́вды:

¹⁰да и҆спо́лнѧтсѧ жи҄тницы твоѧ҄ мно́жествомъ пшени́цы, вїно́ же точи҄ла твоѧ҄ да и҆сточа́ютъ.

¹¹Сы́не, не пренебрега́й наказа́нїѧ гд҇нѧ, нижѐ ѡ҆слабѣва́й ѿ негѡ̀ ѡ҆блича́емь:

¹²є҆го́же бо лю́битъ гд҇ь, наказѹ́етъ, бїе́тъ же всѧ́каго сы́на, є҆го́же прїе́млетъ.

¹³Бл҃же́нъ человѣ́къ, и҆́же ѡ҆брѣ́те премѹ́дрость, и҆ сме́ртенъ, и҆́же ѹ҆вѣ́дѣ ра́зѹмъ.

¹⁴Лѹ́чше бо сїю̀ кѹпова́ти, не́жели зла́та и҆ сребра̀ сокрѡ́вища:

¹⁵честнѣ́йша же є҆́сть ка́менїй многоцѣ́нныхъ: не сопротивлѧ́етсѧ є҆́й ничто́же лѹка́во, бл҃гозна́тна є҆́сть всѣ҄мъ приближа́ющымсѧ є҆́й: всѧ́ко же честно́е недосто́йно є҆ѧ̀ є҆́сть.

¹⁶Долгота́ бо житїѧ̀ и҆ лѣ҄та жи́зни въ десни́цѣ є҆ѧ̀, въ шѹ́йцѣ же є҆ѧ̀ бога́тство и҆ сла́ва: ѿ ѹ҆́стъ є҆ѧ̀ и҆схо́дитъ пра́вда, зако́нъ же и҆ ми́лость на ѧ҆зы́цѣ но́ситъ.

¹⁷Пѹтїѐ є҆ѧ̀ пѹтїѐ добрѝ, и҆ всѧ҄ стєзѝ є҆ѧ̀ ми҄рны.

¹⁸Дре́во живота̀ є҆́сть всѣ҄мъ держа́щымсѧ є҆ѧ̀, и҆ воскланѧ́ющымсѧ на ню̀, ѩ҆́кѡ на гд҇а, тверда̀.

¹⁹Бг҃ъ премдростїю ѡ҆снова̀ зе́млю, ѹ҆гото́ва же небеса̀ ра́зѹмомъ:

²⁰въ чѹ́вствѣ є҆гѡ̀ бє́здны разверзо́шасѧ, ѡ҆́блацы же и҆сточи́ша ро́сѹ.

²¹Сы́не, да не премине́ши, соблюди́ же мо́й совѣ́тъ и҆ мы́сль:

²²да жива̀ бѹ́детъ дѹша̀ твоѧ̀, и҆ блгдть бѹ́детъ на твое́й вы́и: (*бѹ́детъ же и҆сцѣле́нїе пло́темъ твои҄мъ и҆ ѹ҆врачева́нїе косте́мъ твои҄мъ:)

²³да хо́диши надѣ́ѧсѧ въ ми́рѣ во всѣ́хъ пѹте́хъ твои́хъ, нога́ же твоѧ̀ не по́ткнетсѧ.

²⁴А҆́ще бо сѧ́деши, безбоѧ́зненъ бѹ́деши, а҆́ще же поспи́ши, сла́достнѡ поспи́ши.

²⁵И҆ не ѹ҆бои́шисѧ стра́ха наше́дшагѡ, нижѐ ѹ҆стремле́нїѧ нечести́выхъ находѧ́щагѡ:

²⁶гд҇ь бо бѹ́детъ на всѣ́хъ пѹте́хъ твои́хъ и҆ ѹ҆тверди́тъ но́гѹ твою̀, да не поползне́шисѧ.

²⁷Не ѿрецы́сѧ благотвори́ти тре́бѹющемѹ, є҆гда̀ и҆́мать рѹка̀ твоѧ̀ помога́ти.

²⁸Не рцы̀: ѿше́дъ возврати́сѧ, и҆ заѹ́тра да́мъ, си́льнѹ тѝ сѹ́щѹ благотвори́ти: не вѣ́си бо, что̀ породи́тъ де́нь находѧ́й.

²⁹Не соплета́й на дрѹ́га твоего̀ ѕла̀, прише́лца сѹ́ща и҆ ѹ҆пова́юща на тѧ̀.

³⁰Не враждѹ́й на человѣ́ка тѹ́не, да не что̀ на тѧ̀ содѣ́етъ ѕло́е.

³¹Не стѧжѝ ѕлы́хъ мѹже́й поноше́нїѧ, ни возревнѹ́й пѹтє́мъ и҆́хъ.

³²Нечи́стъ бо пред̾ гд҇емъ всѧ́къ законопрестѹ́пникъ и҆ съ првдными не сочетава́етсѧ.

³³Клѧ́тва гд҇нѧ въ домѣ́хъ нечести́выхъ, дворы́ же првдныхъ блг҇влѧ́ютсѧ.

³⁴Гд҇ь гѡ́рдымъ проти́витсѧ, смирє́ннымъ же дае́тъ блгдть.

³⁵Сла́вѹ премѹ́дрїи наслѣ́дѧтъ, нечести́вїи же вознесо́ша безче́стїе.