Read Библия Церковнославянская При́тчей соломѡ́нихъ 30 Bible Online

При́тчей соломѡ́нихъ 30 - Библия Церковнославянская bible

При́тчей соломѡ́нихъ 30

¹Сїѧ҄ глаго́летъ мѹ́жъ вѣ́рѹющымъ бг҃ови, и҆ почива́ю:

²безѹ́мнѣе бо є҆́смь ѿ всѣ́хъ человѣ҄къ, и҆ ра́зѹма человѣ́ческагѡ нѣ́сть во мнѣ̀:

³бг҃ъ же наѹчи́ мѧ премѹ́дрости, и҆ ра́зѹмъ ст҃ы́хъ ѹ҆разѹмѣ́хъ.

⁴Кто̀ взы́де на не́бо и҆ сни́де; кто̀ собра̀ вѣ́тры въ нѣ҄дра; кто̀ возвратѝ во́дѹ въ ри́зѹ; кто̀ ѡ҆бдержа̀ всѧ҄ концы҄ землѝ; ко́е и҆́мѧ є҆гѡ̀; и҆лѝ ко́е и҆́мѧ сы́нѹ є҆гѡ̀, да разѹмѣ́еши;

⁵Всѧ҄ бо словеса̀ бж҃їѧ раздежє́на: защища́етъ же са́мъ благоговѣ́ющихъ є҆мѹ̀.

⁶Не приложѝ ко словесє́мъ є҆гѡ̀, да не ѡ҆бличи́тъ тѧ̀, и҆ ло́жь бѹ́деши.

⁷Дво́е прошѹ̀ ѹ҆ тебє̀: не ѿимѝ ѿ менє̀ благода́ти пре́жде ѹ҆ме́ртвїѧ моегѡ̀:

⁸сѹ́етно сло́во и҆ ло́жно дале́че ѿ менє̀ сотворѝ, бога́тства же и҆ нищеты̀ не да́ждь мѝ: ѹ҆стро́й же мѝ потрє́бнаѧ и҆ самодовѡ́лнаѧ,

⁹да не насы́щьсѧ ло́жь бѹ́дѹ и҆ рекѹ̀: кто́ мѧ ви́дитъ; и҆лѝ ѡ҆бнища́въ ѹ҆кра́дѹ и҆ кленѹ́сѧ и҆́менемъ бж҃їимъ.

¹⁰Не преда́ждь раба̀ въ рѹ́цѣ господи́на, да не когда̀ проклене́тъ тѧ̀, и҆ и҆сче́знеши.

¹¹Ча́до ѕло̀ клене́тъ ѻ҆тца̀ и҆ ма́терь не благослови́тъ.

¹²Ча́до ѕло̀ пра́ведна себѐ сѹ́дитъ, и҆схо́да же своегѡ̀ не и҆змы̀.

¹³Ча́до ѕло̀ высѡ́ки ѻ҆́чи и҆́мать, вѣ́ждома же свои́ма возно́ситсѧ.

¹⁴Ча́до ѕло̀ ме́чь зѹ́бы (своѧ҄) и҆́мать, и҆ членѡ́вныѧ ѩ҆́кѡ сѣ́чиво, є҆́же гѹби́ти и҆ поѧда́ти смирє́нныѧ ѿ землѝ и҆ ѹ҆бѡ́гїѧ и҆́хъ ѿ человѣ҄къ.

¹⁵Пїѧ́вица и҆мѣ̀ трѝ дщє́ри, любо́вїю возлю́блєны, и҆ трѝ сїѧ҄ не насы́тишасѧ є҆ѧ̀, и҆ четве́ртаѧ не ѹ҆довли́сѧ рещѝ: дово́лно (мѝ є҆́сть).

¹⁶А҆́дъ и҆ по́хоть жены̀, и҆ землѧ̀ ненапое́наѧ водо́ю и҆ вода̀ и҆ ѻ҆́гнь не рекѹ́тъ: довлѣ́етъ.

¹⁷Ѻ҆́ко рѹга́ющеесѧ ѻ҆тцѹ̀ и҆ досажда́ющее ста́рости ма́терни, да и҆сто́ргнѹтъ є҆̀ вра́нове ѿ де́брїѧ и҆ да снѣдѧ́тъ є҆̀ птенцы̀ ѡ҆́рли.

¹⁸Трїе́ ми сѹ́ть невозмѡ́жнаѧ ѹ҆разѹмѣ́ти, и҆ четве́ртагѡ не вѣ́мъ:

¹⁹слѣда̀ ѻ҆рла̀ парѧ́ща (по воздѹ́хѹ) и҆ пѹтѝ ѕмі́а (ползѹ́ща) по ка́мени, и҆ стезѝ кораблѧ̀ пловѹ́ща по мо́рю и҆ пѹті́й мѹ́жа въ ю҆́ности (є҆гѡ̀).

²⁰Тако́въ пѹ́ть жены̀ блѹдни́цы: ѩ҆́же є҆гда̀ сотвори́тъ, и҆ и҆змы́вшисѧ, ничто́же, речѐ, содѣ́ѧхъ нелѣ́по.

²¹Тре́ми трѧсе́тсѧ землѧ̀, четве́ртагѡ же не мо́жетъ понестѝ:

²²а҆́ще ра́бъ воцари́тсѧ, и҆ безѹ́мный и҆спо́лнитсѧ пи́щею, и҆ раба̀ а҆́ще и҆зжене́тъ свою̀ госпожѹ̀,

²³и҆ ме́рзкаѧ жена̀ а҆́ще ключи́тсѧ добрѹ̀ мѹ́жѹ.

²⁴Четы́ри же сѹ́ть малѣ҄йшаѧ на землѝ, сїѧ҄ же сѹ́ть мѹдрѣ҄йша мѹ́дрыхъ:

²⁵мра́вїє, и҆̀мже нѣ́сть крѣ́пости и҆ ѹ҆готовлѧ́ютъ въ жа́твѹ пи́щѹ:

²⁶и҆ хїрогрѵ́лли, ѩ҆зы́къ не крѣ́покъ, и҆̀же сотвори́ша въ ка́менїихъ до́мы своѧ҄:

²⁷безца́рни сѹ́ть прѹ́зїе, и҆ вою́ютъ ѿ є҆ди́нагѡ повелѣ́нїѧ благочи́ннѡ:

²⁸ѩ҆́щерица (Є҆вр.: паѹ́къ.), рѹка́ми ѡ҆пира́ющисѧ и҆ ѹ҆до́бь ѹ҆ловлѧ́ема сѹ́щи, живе́тъ во тве́рдехъ царе́выхъ.

²⁹Трїѐ сѹ́ть, ѩ҆̀же благопоспѣ́шнѡ хо́дѧтъ, четве́ртое же, є҆́же до́брѣ прохо́дитъ:

³⁰скѵ́менъ льво́въ крѣпча́е ѕвѣре́й, и҆́же не ѿвраща́етсѧ, ни ѹ҆страша́етсѧ скота̀,

³¹и҆ пѣ́тель ходѧ̀ въ ко́кошѣхъ благодѹ́шенъ, и҆ козе́лъ предводи́тель ста́дѹ, и҆ ца́рь глаго́лѧй къ наро́дѹ во ѩ҆зы́цѣ.

³²А҆́ще вда́си себѐ въ весе́лїе и҆ простре́ши рѹ́кѹ твою̀ со сва́ромъ, порѹ́ганъ бѹ́деши.

³³Мельзѝ млеко̀, и҆ бѹ́детъ ма́сло. А҆́ще ли нѡ́здри че́шеши, и҆зы́детъ кро́вь: а҆́ще же и҆звлече́ши словеса̀, и҆зы́дѹтъ сѹ́дове и҆ тѧ҄жбы.