Read Библия Церковнославянская При́тчей соломѡ́нихъ 31 Bible Online

При́тчей соломѡ́нихъ 31 - Библия Церковнославянская bible

При́тчей соломѡ́нихъ 31

¹Моѧ҄ словеса̀ реко́шасѧ ѿ бг҃а, царе́во проро́чество, є҆го́же наказа̀ ма́ти є҆гѡ̀:

²что̀, ча́до, (*соблюде́ши,) что̀ рѣче́нїе бж҃їе; перворо́дне, тебѣ̀ глаго́лю, сы́не: что̀, ча́до моегѡ̀ чре́ва; что̀, ча́до мои́хъ моли́твъ;

³Не да́ждь жена́мъ твоегѡ̀ бога́тства и҆ твоегѡ̀ ѹ҆ма̀ и҆ житїѧ̀ въ послѣ́днїй совѣ́тъ.

⁴Съ совѣ́томъ всѐ творѝ, съ совѣ́томъ пі́й вїно̀: си́льнїи гнѣвли́ви сѹ́ть, вїна̀ да не пїю́тъ,

⁵да напи́вшесѧ не забѹ́дѹтъ мѹ́дрости и҆ пра́во сѹди́ти немѡщны́мъ не возмо́гѹтъ.

⁶Дади́те сїке́ра сѹ́щымъ въ печа́лехъ и҆ вїно̀ пи́ти сѹ́щымъ въ болѣ́знехъ,

⁷да забѹ́дѹтъ ѹ҆боже́ства и҆ болѣ́зней не воспомѧ́нѹтъ ктомѹ̀.

⁸Сы́не, ѿверза́й ѹ҆ста̀ твоѧ҄ сло́вѹ бж҃їю и҆ сѹдѝ всѧ҄ здра́вѡ:

⁹ѿверза́й ѹ҆ста̀ твоѧ҄ и҆ сѹдѝ првднѡ, разсѹжда́й же ѹ҆бо́га и҆ не́мощна.

¹⁰Женѹ̀ до́блю кто̀ ѡ҆брѧ́щетъ, дража́йши є҆́сть ка́менїѧ многоцѣ́ннагѡ такова́ѧ:

¹¹дерза́етъ на ню̀ се́рдце мѹ́жа є҆ѧ̀: такова́ѧ до́брыхъ коры́стей не лиши́тсѧ:

¹²дѣ́лаетъ бо мѹ́жѹ своемѹ̀ блага҄ѧ во всѐ житїѐ:

¹³ѡ҆брѣ́тши во́лнѹ и҆ ле́нъ, сотворѝ благопотре́бное рѹка́ма свои́ма.

¹⁴Бы́сть ѩ҆́кѡ кора́бль кѹ́плю дѣ́ѧ, и҆здале́ча собира́етъ себѣ̀ бога́тство:

¹⁵и҆ востае́тъ и҆з̾ но́щи, и҆ дадѐ бра҄шна до́мѹ и҆ дѣла̀ рабы́нѧмъ.

¹⁶Ѹ҆зрѣ́вши село̀ кѹпѝ, ѿ плодѡ́въ же рѹ́къ свои́хъ насадѝ стѧжа́нїе.

¹⁷Препоѧ́савши крѣ́пкѡ чрє́сла своѧ҄, ѹ҆тверди́тъ мы҄шцы своѧ҄ на дѣ́ло,

¹⁸и҆ вкѹсѝ, ѩ҆́кѡ добро̀ є҆́сть дѣ́лати, и҆ не ѹ҆гаса́етъ свѣти́лникъ є҆ѧ̀ всю̀ но́щь.

¹⁹Ла҄кти своѧ҄ простира́етъ на полє́знаѧ, рѹ́цѣ же своѝ ѹ҆твержда́етъ на вретено̀,

²⁰и҆ рѹ́цѣ своѝ ѿверза́етъ ѹ҆бо́гомѹ, дла́нь же прострѐ ни́щѹ.

²¹Не пече́тсѧ ѡ҆ сѹ́щихъ въ домѹ̀ мѹ́жъ є҆ѧ̀, є҆гда̀ гдѣ̀ заме́длитъ: вси́ бо ѹ҆ неѧ̀ ѡ҆дѣ́ѧни сѹ́ть.

²²Сѹгѹ҄ба ѡ҆дѣѧ҄нїѧ сотворѝ мѹ́жѹ своемѹ̀, ѿ вѷссо́на же и҆ порфѵ́ры себѣ̀ ѡ҆дѣѧ҄нїѧ.

²³Сла́венъ быва́етъ во вратѣ́хъ мѹ́жъ є҆ѧ̀, внегда̀ а҆́ще сѧ́детъ въ со́нмищи со старѣ҄йшины жи́тельми землѝ.

²⁴Плащани҄цы сотворѝ и҆ продадѐ фїнїкі́анѡмъ, ѡ҆поѧ҄санїѧ же ханане́ѡмъ.

²⁵Ѹ҆ста̀ своѧ҄ ѿве́рзе внима́телнѡ и҆ зако́ннѡ и҆ чи́нъ заповѣ́да ѧ҆зы́кѹ своемѹ̀.

²⁶Крѣ́постїю и҆ лѣ́потою ѡ҆блече́сѧ, и҆ возвесели́сѧ во дни҄ послѣ҄днїѧ.

²⁷Тѣ҄сны стєзѝ до́мѹ є҆ѧ̀, бра́шна же лѣ́ностнагѡ не ѩ҆дѐ.

²⁸Ѹ҆ста̀ своѧ҄ ѿве́рзе мѹ́дрѡ и҆ зако́ннѡ.

²⁹Ми́лостынѧ же є҆ѧ̀ возста́ви ча҄да є҆ѧ̀, и҆ ѡ҆богати́шасѧ: и҆ мѹ́жъ є҆ѧ̀ похвалѝ ю҆̀:

³⁰мнѡ́ги дще́ри стѧжа́ша бога́тство, мнѡ́ги сотвори́ша си́лѹ: ты́ же пред̾ѹспѣ́ла и҆ превознесла́сѧ є҆сѝ над̾ всѣ́ми:

³¹ло́жнагѡ ѹ҆гожде́нїѧ и҆ сѹ́етныѧ добро́ты же́нскїѧ нѣ́сть въ тебѣ̀: жена́ бо разѹ́мнаѧ благослове́на є҆́сть: стра́хъ же гд҇ень сїѧ̀ да хва́литъ.

³²Дади́те є҆́й ѿ плодѡ́въ ѹ҆сте́нъ є҆ѧ̀, и҆ да хвали́мь бѹ́детъ во вратѣ́хъ мѹ́жъ є҆ѧ̀.