Read Библия Церковнославянская При́тчей соломѡ́нихъ 4 Bible Online

При́тчей соломѡ́нихъ 4 - Библия Церковнославянская bible

При́тчей соломѡ́нихъ 4

¹Послѹ́шайте, дѣ́ти, наказа́нїѧ ѻ҆́тча и҆ внемли́те разѹмѣ́ти помышле́нїе,

²да́ръ бо бл҃гі́й да́рѹю ва́мъ: моегѡ̀ зако́на не ѡ҆ставлѧ́йте.

³Сы́нъ бо бы́хъ и҆ а҆́зъ ѻ҆тцѹ̀ послѹшли́вый, и҆ люби́мый пред̾ лице́мъ ма́тере,

⁴и҆̀же глаго́лаша и҆ ѹ҆чи́ша мѧ̀: да ѹ҆твержда́етсѧ на́ше сло́во въ твое́мъ се́рдцы: хранѝ за́пѡвѣди, не забыва́й:

⁵стѧжѝ премѹ́дрость, стѧжѝ ра́зѹмъ: не забѹ́ди, нижѐ пре́зри рѣчє́нїѧ мои́хъ ѹ҆́стъ, нижѐ ѹ҆клони́сѧ ѿ глагѡ́лъ ѹ҆́стъ мои́хъ.

⁶Не ѡ҆ста́ви є҆ѧ̀, и҆ и҆́метсѧ тебє̀: возжелѣ́й є҆ѧ̀, и҆ соблюде́тъ тѧ̀.

⁷Нача́ло премѹ́дрости: стѧжа́ти премѹ́дрость, и҆ во все́мъ стѧжа́нїи твое́мъ стѧжѝ ра́зѹмъ.

⁸Ѡ҆градѝ ю҆̀, и҆ вознесе́тъ тѧ̀: почтѝ ю҆̀, да тѧ̀ ѡ҆б̾и́метъ,

⁹да да́стъ главѣ̀ твое́й вѣне́цъ благода́тей, вѣнце́мъ же сла́дости защи́титъ тѧ̀.

¹⁰Слы́ши, сы́не, и҆ прїимѝ моѧ҄ словеса̀, и҆ ѹ҆мно́жатсѧ лѣ҄та живота̀ твоегѡ̀, да тѝ бѹ́дѹтъ мно́зи пѹтїѐ житїѧ̀.

¹¹Пѹтє́мъ бо премѹ́дрости ѹ҆чѹ́ тѧ, наставлѧ́ю же тебѐ на течє́нїѧ пра҄ваѧ:

¹²а҆́ще бо хо́диши, не за́пнѹтсѧ стѡпы̀ твоѧ҄: а҆́ще ли тече́ши, не ѹ҆трѹди́шисѧ.

¹³И҆ми́сѧ моегѡ̀ наказа́нїѧ, не ѡ҆ста́ви, но сохранѝ є҆̀ себѣ̀ въ жи́знь твою̀.

¹⁴На пѹти҄ нечести́выхъ не и҆дѝ, нижѐ возревнѹ́й пѹтє́мъ законопрестѹ́пныхъ.

¹⁵На не́мже а҆́ще мѣ́стѣ вѡ́ѧ соберѹ́тъ, не и҆дѝ та́мѡ: ѹ҆клони́сѧ же ѿ ни́хъ и҆ и҆змѣнѝ:

¹⁶не ѹ҆́снѹтъ бо, а҆́ще ѕла̀ не сотворѧ́тъ: ѿи́метсѧ со́нъ ѿ ни́хъ, и҆ не спѧ́тъ:

¹⁷ті́и бо пита́ютсѧ пи́щею нече́стїѧ, вїно́мъ же законопрестѹ́пнымъ ѹ҆пива́ютсѧ.

¹⁸Пѹті́е же првдныхъ подо́бнѣ свѣ́тѹ свѣ́тѧтсѧ: предхо́дѧтъ и҆ просвѣща́ютъ, до́ндеже и҆спра́витсѧ де́нь.

¹⁹Пѹтїе́ же нечести́выхъ те́мни: не вѣ́дѧтъ, ка́кѡ претыка́ютсѧ.

²⁰Сы́не, мои҄мъ глаго́лѡмъ внима́й, къ мои҄мъ же словесє́мъ прилага́й ѹ҆́хо твоѐ:

²¹да не ѡ҆скѹдѣ́ютъ тѝ и҆сто́чницы твоѝ, хранѝ ѧ҆̀ въ се́рдцы твое́мъ:

²²живо́тъ бо сѹ́ть всѣ҄мъ ѡ҆брѣта́ющымъ ѧ҆̀ и҆ все́й пло́ти и҆́хъ и҆сцѣле́нїе.

²³Всѧ́цѣмъ хране́нїемъ блюдѝ твоѐ се́рдце: ѿ си́хъ бо и҆схѡ́дища живота̀.

²⁴Ѿимѝ ѿ себє̀ стропти҄ва ѹ҆ста̀, и҆ ѡ҆би҄дливы ѹ҆стнѣ̀ дале́че ѿ тебє̀ ѿри́ни.

²⁵Ѻ҆́чи твоѝ пра́вѡ да зрѧ́тъ, и҆ вѣ҄жди твоѝ да помава́ютъ пра́вєднаѧ.

²⁶Пра҄ва течє́нїѧ творѝ твои́ма нога́ма и҆ пѹти҄ твоѧ҄ и҆справлѧ́й.

²⁷Не ѹ҆клони́сѧ ни на де́сно, ни на шѹ́е: ѿврати́ же но́гѹ твою̀ ѿ пѹтѝ ѕла̀:

²⁸пѹти҄ бо десны҄ѧ вѣ́сть гд҇ь, развраще́ни же сѹ́ть, и҆̀же ѡ҆шѹ́юю.

²⁹То́й же пра҄ва сотвори́тъ течє́нїѧ твоѧ҄, и҆ хождє́нїѧ твоѧ҄ въ ми́рѣ поспѣши́тъ.