Read Библия Церковнославянская При́тчей соломѡ́нихъ 5 Bible Online

При́тчей соломѡ́нихъ 5 - Библия Церковнославянская bible

При́тчей соломѡ́нихъ 5

¹Сы́не, мое́й премѹ́дрости внима́й, къ мои҄мъ же словесє́мъ прилага́й ѹ҆́хо твоѐ,

²да сохрани́ши мы́сль бл҃гѹ́ю: чѹ́вство же мои́хъ ѹ҆сте́нъ заповѣ́даетъ тебѣ̀.

³Не внима́й ѕлѣ́й женѣ̀: ме́дъ бо ка́плетъ ѿ ѹ҆сте́нъ жены̀ блѹдни́цы, ѩ҆́же на вре́мѧ наслажда́етъ тво́й горта́нь:

⁴послѣди́ же горча́е же́лчи ѡ҆брѧ́щеши, и҆ и҆з̾ѡщре́ннѹ па́че меча̀ ѻ҆бою́дѹ ѻ҆́стра:

⁵безѹ́мїѧ бо но́зѣ низво́дѧтъ ѹ҆потреблѧ́ющихъ ю҆̀ со сме́ртїю во а҆́дъ, стѡпы́ же є҆ѧ̀ не ѹ҆твержда́ютсѧ:

⁶на пѹти҄ бо живѡ́тныѧ не нахо́дитъ, заблѹждє́нна же течє́нїѧ є҆ѧ̀ и҆ неблагоразѹ҄мна.

⁷Нн҃ѣ ѹ҆̀бо, сы́не, послѹ́шай менѐ и҆ не ѿриновє́нна сотворѝ моѧ҄ словеса̀:

⁸дале́че ѿ неѧ̀ сотворѝ пѹ́ть тво́й и҆ не прибли́жисѧ ко две́ремъ домѡ́въ є҆ѧ̀,

⁹да не преда́стъ и҆ны҄мъ живота̀ твоегѡ̀, и҆ твоегѡ̀ житїѧ̀ неми́лѡстивымъ,

¹⁰да не насы́тѧтсѧ и҆ні́и твоеѧ̀ крѣ́пости, твои́ же трѹды̀ въ до́мы чѹжды҄ѧ вни́дѹтъ,

¹¹и҆ раска́ешисѧ на послѣ́докъ тво́й, є҆гда̀ и҆стрѹ́тсѧ плѡ́ти тѣ́ла твоегѡ̀, и҆ рече́ши:

¹²ка́кѡ возненави́дѣхъ наказа́нїе, и҆ ѿ ѡ҆бличе́нїй ѹ҆клони́сѧ се́рдце моѐ;

¹³не послѹ́шахъ гла́са наказѹ́ющагѡ мѧ̀, и҆ ко ѹ҆ча́щемѹ мѧ̀ не прилага́хъ ѹ҆́ха моегѡ̀:

¹⁴вма́лѣ бѣ́хъ во всѧ́цѣмъ ѕлѣ̀ посредѣ̀ цр҃кве и҆ со́нмища.

¹⁵Сы́не, пі́й во́ды ѿ свои́хъ сосѹ́дѡвъ и҆ ѿ твои́хъ кладенцє́въ и҆сто́чника:

¹⁶да преизлива́ютсѧ тебѣ̀ во́ды ѿ твоегѡ̀ и҆сто́чника, во твоѧ҄ же пѹти҄ да происхо́дѧтъ твоѧ҄ во́ды.

¹⁷Да бѹ́дѹтъ тебѣ̀ є҆ди́номѹ и҆мѣ҄нїѧ, и҆ да никто́же чѹ́ждь причасти́тсѧ тебѣ̀.

¹⁸И҆сто́чникъ твоеѧ̀ воды̀ да бѹ́детъ тебѣ̀ тво́й, и҆ весели́сѧ съ жено́ю, ѩ҆́же ѿ ю҆́ности твоеѧ̀:

¹⁹є҆ле́нь любвѐ и҆ жребѧ̀ твои́хъ благода́тей да бесѣ́дѹетъ тебѣ̀, твоѧ́ же да пред̾и́детъ тебѣ̀ и҆ да бѹ́детъ съ тобо́ю во всѧ́ко вре́мѧ: въ дрѹ́жбѣ бо сеѧ̀ спребыва́ѧй ѹ҆мно́женъ бѹ́деши.

²⁰Не мно́гъ бѹ́ди къ чѹжде́й, нижѐ ѡ҆б̾ѧ́тъ бѹ́ди ѡ҆б̾ѧ҄тїи не твоеѧ̀:

²¹пред̾ ѻ҆чи́ма бо сѹ́ть бж҃їима пѹтїѐ мѹ́жа, всѧ҄ же течє́нїѧ є҆гѡ̀ назира́етъ.

²²Законопрестѹплє́нїѧ мѹ́жа ѹ҆ловлѧ́ютъ: плени́цами же свои́хъ грѣхѡ́въ кі́йждо затѧза́етсѧ.

²³Се́й скончава́етсѧ съ ненака́занными: ѿ мно́жества же своегѡ̀ житїѧ̀ и҆зве́ржетсѧ и҆ погиба́етъ за безѹ́мїе.