Read Библия Церковнославянская При́тчей соломѡ́нихъ 6 Bible Online

При́тчей соломѡ́нихъ 6 - Библия Церковнославянская bible

При́тчей соломѡ́нихъ 6

¹Сы́не, а҆́ще порѹчи́шисѧ за твоего̀ дрѹ́га, преда́си твою̀ рѹ́кѹ врагѹ̀.

²Сѣ́ть бо крѣпка̀ мѹ́жѹ своѝ ѹ҆стнѣ̀, и҆ плѣнѧ́етсѧ ѹ҆стна́ми свои́хъ ѹ҆́стъ.

³Творѝ, сы́не, ѩ҆̀же а҆́зъ заповѣ́дѹю тѝ, и҆ спаса́йсѧ: и҆́деши бо въ рѹ́цѣ ѕлы́хъ за твоего̀ дрѹ́га: бѹ́ди не ѡ҆слабѣва́ѧ, поѡщрѧ́й же и҆ твоего̀ дрѹ́га, є҆го́же и҆спорѹчи́лъ є҆сѝ.

⁴Не да́ждь сна̀ твои́ма ѻ҆чи́ма, нижѐ да воздре́млеши твои́ма вѣ́ждома,

⁵да спасе́шисѧ а҆́ки се́рна ѿ тене́тъ и҆ ѩ҆́кѡ пти́ца ѿ сѣ́ти.

⁶И҆дѝ ко мра́вїю, ѽ, лѣни́ве, и҆ поревнѹ́й ви́дѣвъ пѹти҄ є҆гѡ̀, и҆ бѹ́ди ѻ҆́нагѡ мѹдрѣ́йшїй:

⁷ѻ҆́нъ бо, не сѹ́щѹ є҆мѹ̀ земледѣ́лцѹ, нижѐ нѹ́дѧщаго є҆го̀ и҆мѣ́ѧй, нижѐ под̾ влады́кою сы́й,

⁸гото́витъ въ жа́твѹ пи́щѹ и҆ мно́гое въ лѣ́то твори́тъ ѹ҆гото́ванїе. И҆лѝ и҆дѝ ко пчелѣ̀ и҆ ѹ҆вѣ́ждь, ко́ль дѣ́лателница є҆́сть, дѣ́ланїе же ко́ль честно́е твори́тъ: є҆ѧ́же трѹдѡ́въ ца́рїе и҆ прості́и во здра́вїе ѹ҆потреблѧ́ютъ, люби́ма же є҆́сть всѣ́ми и҆ сла́вна: а҆́ще си́лою и҆ немощна̀ сѹ́щи, (но) премѹ́дростїю почте́на произведе́сѧ.

⁹Доко́лѣ, ѽ, лѣни́ве, лежи́ши; когда́ же ѿ сна̀ воста́неши;

¹⁰Ма́лѡ ѹ҆́бѡ спи́ши, ма́лѡ же сѣди́ши, ма́лѡ же дре́млеши, ма́лѡ же ѡ҆б̾е́млеши пє́рси рѹка́ма:

¹¹пото́мъ же на́йдетъ тебѣ̀ а҆́ки ѕо́лъ пѹ́тникъ ѹ҆бо́жество: скѹ́дость же а҆́ки благі́й тече́цъ. А҆́ще же не лѣни́въ бѹ́деши, прїи́детъ ѩ҆́кѡ и҆сто́чникъ жа́тва твоѧ̀, скѹ́дость же а҆́ки ѕлы́й тече́цъ (ѿ тебє̀) ѿбѣжи́тъ.

¹²Мѹ́жъ безѹ́менъ и҆ законопрестѹ́пный хо́дитъ въ пѹти҄ не бла҄ги:

¹³то́й же намиза́етъ ѻ҆́комъ и҆ зна́менїе дае́тъ ного́ю, ѹ҆чи́тъ же помава́нїемъ пе́рстѡвъ.

¹⁴Развраще́нно же се́рдце кѹе́тъ ѕла҄ѧ: на всѧ́кое вре́мѧ таковы́й мѧте́жы составлѧ́етъ гра́дѹ.

¹⁵Сегѡ̀ ра́ди внеза́пѹ прихо́дитъ є҆мѹ̀ поги́бель, разсѣче́нїе и҆ сокрѹше́нїе неисцѣ́льное.

¹⁶ѩ҆́кѡ ра́дѹетсѧ ѡ҆ всѣ́хъ, и҆̀хже ненави́дитъ бг҃ъ, сокрѹша́етсѧ же за нечистотѹ̀ дѹшѝ:

¹⁷ѻ҆́ко досади́телѧ, ѧ҆зы́къ непра́ведный, рѹ́цѣ пролива́ющѧ кро́вь првднагѡ,

¹⁸и҆ се́рдце кѹю́щее мы҄сли ѕлы҄, и҆ но́зѣ тща́щыѧсѧ ѕло̀ твори́ти потребѧ́тсѧ.

¹⁹Разжиза́етъ лжы̀ свидѣ́тель непра́веденъ и҆ насыла́етъ сѹды̀ посредѣ̀ бра́тїй.

²⁰Сы́не, хранѝ зако́ны ѻ҆тца̀ твоегѡ̀ и҆ не ѿри́ни наказа҄нїѧ ма́тере твоеѧ̀:

²¹навѧжи́ же ѧ҆̀ на твою̀ дѹ́шѹ пр҇нѡ и҆ ѡ҆бѧжѝ и҆̀хъ ѡ҆ твое́й вы́и.

²²Є҆гда̀ хо́диши, водѝ ю҆̀, и҆ съ тобо́ю да бѹ́детъ: є҆гда́ же спи́ши, да храни́тъ тѧ̀, да востаю́щѹ тѝ глаго́летъ съ тобо́ю.

²³Занѐ свѣти́лникъ за́повѣдь зако́на и҆ свѣ́тъ, и҆ пѹ́ть жи́зни, и҆ ѡ҆бличе́нїе, и҆ наказа́нїе,

²⁴є҆́же сохрани́ти тѧ̀ ѿ жены̀ мѹжа́ты и҆ ѿ наважде́нїѧ ѧ҆зы́ка чѹжда́гѡ.

²⁵Сы́не, да не побѣди́тъ тѧ̀ добро́ты по́хоть, нижѐ ѹ҆ловле́нъ бѹ́ди твои́ма ѻ҆чи́ма, нижѐ да совосхи́тишисѧ вѣ́ждами є҆ѧ̀.

²⁶Цѣна́ бо блѹдни́цы, є҆ли́ка є҆ди́нагѡ хлѣ́ба: жена́ же мѹже́й честны҄ѧ дѹ́шы ѹ҆ловлѧ́етъ.

²⁷Ввѧ́жетъ ли кто̀ ѻ҆́гнь въ нѣ҄дра, ри́зъ же (свои́хъ) не сожже́тъ ли;

²⁸И҆лѝ ходи́ти кто̀ бѹ́детъ на ѹ҆́глїехъ ѻ҆́гненныхъ, но́гъ же не сожже́тъ ли;

²⁹Та́кѡ вше́дый къ женѣ̀ мѹжа́тѣй не без̾ вины̀ бѹ́детъ, нижѐ всѧ́къ прикаса́йсѧ є҆́й.

³⁰Не ди́вно, а҆́ще кто̀ ѩ҆́тъ бѹ́детъ крады́й: кра́детъ бо, да насы́титъ дѹ́шѹ свою̀ а҆́лчѹщѹю:

³¹а҆́ще же ѩ҆́тъ бѹ́детъ, возда́стъ седмери́цею, и҆ всѧ҄ и҆мѣ҄нїѧ своѧ҄ да́въ, и҆зба́витъ себѐ.

³²Прелюбодѣ́й же за скѹ́дость ѹ҆ма̀ поги́бель дѹшѝ свое́й содѣва́етъ,

³³болѣ҄зни же и҆ безче́стїе понесе́тъ: поноше́нїе же є҆гѡ̀ не загла́дитсѧ во вѣ́къ:

³⁴и҆спо́лнена бо ре́вности ѩ҆́рость мѹ́жа є҆ѧ̀: не пощади́тъ въ де́нь сѹда̀,

³⁵не и҆змѣни́тъ ни є҆ди́ною цѣно́ю вражды̀, нижѐ разрѣши́тсѧ мно́гими дармѝ.