Read Библия Церковнославянская При́тчей соломѡ́нихъ 7 Bible Online

При́тчей соломѡ́нихъ 7 - Библия Церковнославянская bible

При́тчей соломѡ́нихъ 7

¹Сы́не, хранѝ моѧ҄ словеса̀, моѧ҄ же за́пѡвѣди скры́й ѹ҆ себє̀. Сы́не, чтѝ гд҇а, и҆ ѹ҆крѣпи́шисѧ: кромѣ́ же є҆гѡ̀ не бо́йсѧ и҆но́гѡ.

²Хранѝ моѧ҄ за́пѡвѣди, и҆ поживе́ши, словеса́ же моѧ҄ ѩ҆́кѡ зѣ҄ницы ѻ҆́чїю:

³ѡ҆бложи́ же и҆́ми твоѧ҄ пе́рсты, напиши́ же ѧ҆̀ на скрижа́ли се́рдца твоегѡ̀.

⁴Нарцы̀ премѹ́дрость сестрѹ̀ тебѣ̀ бы́ти, ра́зѹмъ же зна́емь сотворѝ тебѣ̀,

⁵да тѧ̀ соблюде́тъ ѿ жены̀ чѹжді́ѧ и҆ лѹка́выѧ, а҆́ще тѧ̀ словесы̀ льсти́выми ѡ҆блага́ти на́чнетъ:

⁶ѻ҆ко́нцемъ бо и҆з̾ до́мѹ своегѡ̀ на пѹти҄ прини́чѹщи,

⁷є҆го́же а҆́ще ѹ҆́зритъ ѿ безѹ́мныхъ ча҄дъ ю҆́ношѹ скѹдоѹ́мна,

⁸проходѧ́щаго ми́мѡ ѹ҆́гла въ распѹ́тїихъ до́мѹ є҆ѧ̀

⁹и҆ глаго́лющаго въ те́мный ве́черъ, є҆гда̀ ѹ҆покое́нїе бѹ́детъ нощно́е и҆ мра́чное:

¹⁰жена́ же срѧ́щетъ є҆го̀, зра́къ и҆мѹ́щи прелюбодѣ́йничь, ѩ҆́же твори́тъ ю҆́ныхъ пари́ти сердца́мъ: воскри́лена же є҆́сть и҆ блѹ́дна,

¹¹въ домѹ́ же не почива́ютъ но́зѣ є҆ѧ̀:

¹²вре́мѧ бо нѣ́кое внѣ̀ глѹми́тсѧ, вре́мѧ же на распѹ́тїихъ при всѧ́цѣмъ ѹ҆́глѣ присѣди́тъ:

¹³пото́мъ є҆́мши лобза́етъ є҆го̀, безстѹ́днымъ же лице́мъ рече́тъ къ немѹ̀:

¹⁴же́ртва ми́рна мѝ є҆́сть, дне́сь воздаю̀ ѡ҆бѣ́ты моѧ҄:

¹⁵сегѡ̀ ра́ди и҆зыдо́хъ въ срѣ́тенїе тебѣ̀, жела́ющи лица̀ твоегѡ̀, ѡ҆брѣто́хъ тѧ̀:

¹⁶простира́лами покры́хъ ѻ҆́дръ мо́й, ковра́ми же сѹгѹ́быми постла́хъ, и҆̀же ѿ є҆гѵ́пта,

¹⁷шафра́номъ посы́пахъ ло́же моѐ и҆ до́мъ мо́й кори́цею:

¹⁸прїидѝ и҆ наслади́мсѧ любвѐ да́же до ѹ҆́тра, грѧдѝ и҆ повалѧ́емсѧ въ по́хоти:

¹⁹нѣ́сть бо мѹ́жа моегѡ̀ въ домѹ̀, ѿи́де въ пѹ́ть дале́че,

²⁰дово́лнѡ сребра̀ взѧ̀ съ собо́ю, по мно́гихъ дне́хъ возврати́тсѧ въ до́мъ сво́й.

²¹И҆ прельстѝ є҆го̀ мно́гою бесѣ́дою, тене́тами же ѹ҆сте́нъ (въ блѹ́дъ) привлечѐ є҆го̀.

²²Ѻ҆́нъ же а҆́бїе послѣ́дова є҆́й ѡ҆б̾юро́дѣвъ, и҆ ѩ҆́коже во́лъ на заколе́нїе веде́тсѧ, и҆ ѩ҆́кѡ пе́съ на ѹ҆́зы,

²³и҆лѝ ѩ҆́кѡ є҆ле́нь ѹ҆ѧ́звленъ стрѣло́ю въ ѩ҆́тра: и҆ спѣши́тъ ѩ҆́кѡ пти́ца въ сѣ́ть, не вѣ́дый, ѩ҆́кѡ на дѹ́шѹ свою̀ тече́тъ.

²⁴Нн҃ѣ ѹ҆̀бо, сы́не, послѹ́шай менѐ и҆ внима́й глаго́лѡмъ ѹ҆́стъ мои́хъ,

²⁵да не ѹ҆клони́тсѧ въ пѹти҄ є҆ѧ̀ се́рдце твоѐ,

²⁶и҆ да не прельсти́шисѧ въ стезѧ́хъ є҆ѧ̀: мно́гихъ бо ѹ҆ѧзви́вши низве́рже, и҆ безчи́сленни сѹ́ть, и҆̀хже ѹ҆би́ла є҆́сть:

²⁷пѹтїѐ а҆́дѡвы до́мъ є҆ѧ̀, низводѧ́щїи въ сокрѡ́вища смє́ртнаѧ.