Read Библия Церковнославянская При́тчей соломѡ́нихъ 8 Bible Online

При́тчей соломѡ́нихъ 8 - Библия Церковнославянская bible

При́тчей соломѡ́нихъ 8

¹Тѣ́мже ты̀ премѹ́дрость проповѣ́ждь, да ра́зѹмъ послѹ́шаетъ тебѐ.

²На высо́кихъ бо крае́хъ є҆́сть, посредѣ́ же сте́зь стои́тъ:

³при вратѣ́хъ бо си́льныхъ присѣди́тъ, во вхо́дѣхъ же пое́тсѧ.

⁴Ва́съ, ѽ, человѣ́цы, молю̀, и҆ вдаю̀ мо́й гла́съ сынѡ́мъ человѣ́чєскимъ.

⁵Ѹ҆разѹмѣ́йте, неѕло́бивїи, кова́рство, ненака́заннїи же, приложи́те се́рдце.

⁶Послѹ́шайте менѐ: честна҄ѧ бо рекѹ̀ и҆ и҆знесѹ̀ ѿ ѹ҆сте́нъ пра҄ваѧ.

⁷ѩ҆́кѡ и҆́стинѣ поѹчи́тсѧ горта́нь мо́й, мє́рзки же предо мно́ю ѹ҆стны̀ лжи҄выѧ.

⁸Съ пра́вдою всѝ глаго́лы ѹ҆́стъ мои́хъ, ничто́же въ ни́хъ стро́потно, нижѐ развраще́нно.

⁹Всѧ҄ пра҄ва разѹмѣва́ющымъ, и҆ пра҄ва ѡ҆брѣта́ющымъ ра́зѹмъ.

¹⁰Прїими́те наказа́нїе, а҆ не сребро̀, и҆ ра́зѹмъ па́че зла́та и҆скѹше́на: и҆збира́йте же вѣ́дѣнїе па́че зла́та чи́ста.

¹¹Лѹ́чши бо премѹ́дрость ка́менїй многоцѣ́нныхъ, всѧ́кое же честно́е недосто́йно є҆ѧ̀ є҆́сть.

¹²А҆́зъ премѹ́дрость всели́хъ совѣ́тъ, и҆ ра́зѹмъ и҆ смы́слъ а҆́зъ призва́хъ.

¹³Стра́хъ гд҇ень ненави́дитъ непра́вды, досажде́нїѧ же и҆ горды́ни, и҆ пѹти҄ лѹка́выхъ: возненави́дѣхъ же а҆́зъ развращє́нныѧ пѹти҄ ѕлы́хъ.

¹⁴Мо́й совѣ́тъ и҆ ѹ҆твержде́нїе, мо́й ра́зѹмъ, моѧ́ же крѣ́пость.

¹⁵Мно́ю ца́рїе ца́рствѹютъ, и҆ си́льнїи пи́шѹтъ пра́вдѹ:

¹⁶мно́ю вельмѡ́жи велича́ютсѧ, и҆ власти́тилїе мно́ю держа́тъ зе́млю.

¹⁷А҆́зъ лю́бѧщыѧ мѧ̀ люблю̀, и҆́щѹщїи же менѐ ѡ҆брѧ́щѹтъ блгдть.

¹⁸Бога́тство и҆ сла́ва моѧ̀ є҆́сть, и҆ стѧжа́нїе мно́гихъ и҆ пра́вда.

¹⁹Лѹ́чше є҆́сть плоди́ти менѐ, па́че зла́та и҆ ка́менїѧ дра́га: мои́ же плоды̀ лѹ́чше сребра̀ и҆збра́нна.

²⁰Въ пѹте́хъ пра́вды хождѹ̀ и҆ посредѣ̀ сте́зь ѡ҆правда́нїѧ живѹ̀,

²¹да раздѣлю̀ лю́бѧщымъ мѧ̀ и҆мѣ́нїе, и҆ сокрѡ́вища и҆́хъ и҆спо́лню благи́хъ. А҆́ще возвѣщѹ̀ ва́мъ быва҄ющаѧ на всѧ́къ де́нь, помѧнѹ̀, ѩ҆̀же ѿ вѣ́ка, и҆счестѝ.

²²Гд҇ь созда́ мѧ {Є҆вр.: стѧжа́ мѧ.} нача́ло пѹті́й свои́хъ въ дѣла̀ своѧ҄,

²³пре́жде вѣ҄къ ѡ҆снова́ мѧ, въ нача́лѣ, пре́жде не́же зе́млю сотвори́ти,

²⁴и҆ пре́жде не́же бє́здны содѣ́лати, пре́жде не́же произы́ти и҆сто́чникѡмъ во́дъ,

²⁵пре́жде не́же гора́мъ водрѹзи́тисѧ, пре́жде же всѣ́хъ холмѡ́въ ражда́етъ мѧ̀.

²⁶Гд҇ь сотворѝ страны҄ и҆ ненаселє́нныѧ, и҆ концы҄ населє́нныѧ поднебе́сныѧ.

²⁷Є҆гда̀ гото́вѧше не́бо, съ ни́мъ бѣ́хъ, и҆ є҆гда̀ ѿлѹча́ше пр҇то́лъ сво́й на вѣ́трѣхъ,

²⁸и҆ є҆гда̀ крѣ҄пки творѧ́ше вы҄шнїѧ ѡ҆́блаки, и҆ є҆гда̀ твє́рды полага́ше и҆сто́чники поднебе́сныѧ,

²⁹и҆ є҆гда̀ полага́ше мо́рю предѣ́лъ є҆гѡ̀, да во́ды не ми́мѡ и҆́дѹтъ ѹ҆́стъ є҆гѡ̀, и҆ крѣ҄пка творѧ́ше ѡ҆снова҄нїѧ землѝ, бѣ́хъ при не́мъ ѹ҆строѧ́ющи.

³⁰А҆́зъ бѣ́хъ, ѡ҆ не́йже ра́довашесѧ, на всѧ́къ же де́нь веселѧ́хсѧ пред̾ лице́мъ є҆гѡ̀ на всѧ́ко вре́мѧ,

³¹є҆гда̀ веселѧ́шесѧ вселе́ннѹю соверши́въ, и҆ веселѧ́шесѧ ѡ҆ сынѣ́хъ человѣ́ческихъ.

³²Нн҃ѣ ѹ҆̀бо, сы́не, послѹ́шай менѐ: и҆ блаже́ни, и҆̀же пѹти҄ моѧ҄ сохранѧ́тъ.

³³Ѹ҆слы́шите премѹ́дрость, и҆ ѹ҆мѹдри́тесѧ, и҆ не ѿмещи́те.

³⁴Блаже́нъ мѹ́жъ, и҆́же послѹ́шаетъ менѐ, и҆ человѣ́къ, и҆́же пѹти҄ моѧ҄ сохрани́тъ, бдѧ́й при мои́хъ две́рехъ пр҇нѡ, соблюда́ѧй пра́ги мои́хъ вхо́дѡвъ:

³⁵и҆схо́ди бо моѝ и҆схо́ди живота̀, и҆ ѹ҆готовлѧ́етсѧ хотѣ́нїе ѿ гд҇а:

³⁶согрѣша́ющїи же въ мѧ̀ нече́ствѹютъ на своѧ҄ дѹ́ши, и҆ ненави́дѧщїи мѧ̀ лю́бѧтъ сме́рть.