Read Библия Церковнославянская При́тчей соломѡ́нихъ 9 Bible Online

При́тчей соломѡ́нихъ 9 - Библия Церковнославянская bible

При́тчей соломѡ́нихъ 9

¹Премѹ́дрость созда̀ себѣ̀ до́мъ и҆ ѹ҆твердѝ столпѡ́въ се́дмь:

²закла̀ своѧ҄ же́ртвєннаѧ, и҆ растворѝ въ ча́ши свое́й вїно̀, и҆ ѹ҆гото́ва свою̀ трапе́зѹ:

³посла̀ своѧ҄ рабы҄, созыва́ющи съ высо́кимъ проповѣ́данїемъ на ча́шѹ, глаго́лющи:

⁴и҆́же є҆́сть безѹ́менъ, да ѹ҆клони́тсѧ ко мнѣ̀.

⁵И҆ тре́бѹющымъ ѹ҆ма̀ речѐ: прїиди́те, ѩ҆ди́те мо́й хлѣ́бъ и҆ пі́йте вїно̀, є҆́же раствори́хъ ва́мъ:

⁶ѡ҆ста́вите безѹ́мїе и҆ жи́ви бѹ́дете, да во вѣ́ки воцарите́сѧ: и҆ взыщи́те ра́зѹма, да поживетѐ и҆ и҆спра́вите ра́зѹмъ въ вѣ́дѣнїи.

⁷Наказѹ́ѧй ѕлы҄ѧ прїи́метъ себѣ̀ безче́стїе, ѡ҆блича́ѧй же нечести́ваго поро́чна сотвори́тъ себѐ (*ѡ҆бличє́нїѧ бо нечести́вомѹ ра҄ны є҆мѹ̀).

⁸Не ѡ҆блича́й ѕлы́хъ, да не возненави́дѧтъ тебѐ: ѡ҆блича́й премѹ́дра, и҆ возлю́битъ тѧ̀.

⁹Да́ждь премѹ́дромѹ винѹ̀, и҆ премѹ́дрѣйшїй бѹ́детъ: сказѹ́й првдномѹ, и҆ приложи́тъ прїима́ти.

¹⁰Нача́ло премѹ́дрости стра́хъ гд҇ень, и҆ совѣ́тъ ст҃ы́хъ ра́зѹмъ: разѹмѣ́ти бо зако́нъ, по́мысла є҆́сть блага́гѡ.

¹¹Си́мъ бо ѡ҆́бразомъ мно́гое поживе́ши вре́мѧ, и҆ приложа́тсѧ тебѣ̀ лѣ҄та живота̀ твоегѡ̀.

¹²Сы́не, а҆́ще премѹ́дръ бѹ́деши, себѣ̀ премѹ́дръ бѹ́деши и҆ и҆́скрєннимъ твои҄мъ: а҆́ще же ѕо́лъ бѹ́деши, є҆ди́нъ почерпне́ши ѕла҄ѧ. Сы́нъ нака́занъ премѹ́дръ бѹ́детъ, безѹ́мный же слѹго́ю ѹ҆потреби́тсѧ. И҆́же ѹ҆твержда́етсѧ на лжа́хъ, се́й пасе́тъ вѣ́тры, то́й же пожене́тъ пти҄цы парѧ́щыѧ: ѡ҆ста́ви бо пѹти҄ своегѡ̀ вїногра́да, въ стезѧ́хъ же своегѡ̀ земледѣ́ланїѧ заблѹдѝ, прохо́дитъ же сквозѣ̀ пѹсты́ню безво́днѹю и҆ зе́млю ѡ҆предѣле́ннѹю въ жа́ждѣхъ, собира́етъ же рѹка́ма непло́дїе.

¹³Жена̀ безѹ́мнаѧ и҆ проде́рзаѧ скѹдна̀ хлѣ́бомъ быва́етъ, ѩ҆́же не вѣ́сть стыдѣ́нїѧ,

¹⁴сѣ́де при две́рехъ до́мѹ своегѡ̀, на столцѣ̀ ѩ҆́вѣ на сто́гнахъ,

¹⁵призыва́ющаѧ мимоходѧ́щихъ и҆ и҆справлѧ́ющихъ пѹти҄ своѧ҄:

¹⁶и҆́же є҆́сть ѿ ва́съ безѹ́мнѣйшїй, да ѹ҆клони́тсѧ ко мнѣ̀: и҆ лишє́ннымъ ра́зѹма повелѣва́ю, глаго́лющи:

¹⁷хлѣ́бѡмъ сокровє́ннымъ въ сла́дость прикосни́тесѧ и҆ во́дѹ татьбы̀ сла́дкѹю пі́йте.

¹⁸Ѻ҆́нъ же не вѣ́сть, ѩ҆́кѡ земноро́днїи ѹ҆ неѧ̀ погиба́ютъ и҆ во днѣ̀ а҆́да ѡ҆брѣта́ютсѧ. Но ѿскочѝ, не заме́дли на мѣ́стѣ є҆ѧ̀, нижѐ наста́ви ѻ҆́ка своегѡ̀ къ не́й: та́кѡ бо про́йдеши во́дѹ чѹждѹ́ю и҆ пре́йдеши рѣкѹ̀ чѹждѹ́ю: ѿ воды́ же чѹжді́ѧ ѡ҆ша́йсѧ и҆ ѿ и҆сто́чника чѹжда́гѡ не пі́й, да мно́гое вре́мѧ поживе́ши, и҆ приложа́тсѧ тебѣ̀ лѣ҄та живота̀.