Read Библия Церковнославянская Е҆кклесїа́ст 10 Bible Online

Е҆кклесїа́ст 10 - Библия Церковнославянская bible

Е҆кклесїа́ст 10

¹Мѹ҄хи ѹ҆ме́ршыѧ згноѧ́ютъ є҆ле́а сла́дость: че́стно ма́лое мѹ́дрости па́че сла́вы вели́ки безѹ́мїѧ.

²Се́рдце мѹ́драгѡ ѡ҆деснѹ́ю є҆гѡ̀, се́рдце же безѹ́мнагѡ ѡ҆шѹ́юю є҆гѡ̀:

³и҆ въ пѹ́ть є҆гда̀ безѹ́мный и҆́детъ, се́рдце є҆гѡ̀ лиша́етсѧ, и҆ ѩ҆̀же помышлѧ́етъ, всѧ҄ безѹ́мїе сѹ́ть.

⁴А҆́ще дѹ́хъ владѣ́ющагѡ взы́детъ на тѧ̀, мѣ́ста твоегѡ̀ не ѡ҆ста́ви: ѩ҆́кѡ и҆зцѣле́нїе ѹ҆толи́тъ грѣхѝ вели҄ки.

⁵Е҆́сть лѹка́вство, є҆́же ви́дѣхъ под̾ со́лнцемъ, а҆́ки нево́льно и҆зы́де ѿ лица̀ владѣ́ющагѡ:

⁶вда́нъ безѹ́мный въ высѡты̀ вели҄ки, а҆ бога́тїи во смире́нныхъ сѧ́дѹтъ:

⁷ви́дѣхъ рабѡ́въ на ко́нехъ, и҆ кнѧзе́й и҆дѹ́щихъ ѩ҆́кѡ рабѡ́въ на землѝ.

⁸Копа́ѧй ѩ҆́мѹ впаде́тъ въ ню̀, и҆ разорѧ́ющаго ѡ҆гра́дѹ ѹ҆гры́знетъ є҆го̀ ѕмі́й.

⁹И҆з̾е́млѧй ка́менїе поболи́тъ ѿ ни́хъ, разсѣца́ѧй дрова̀ бѣдѹ̀ прїи́метъ въ ни́хъ:

¹⁰а҆́ще спаде́тъ сѣ́чиво, и҆ са́мъ лице́мъ смѧте́тсѧ: и҆ си҄лы ѹ҆крѣпи́тъ, и҆ и҆з̾ѻби́лїе мѹ́жѹ мѹ́дрость.

¹¹А҆́ще ѹ҆гры́знетъ ѕмі́й не въ шептѣ̀, и҆ нѣ́сть и҆зли́шества ѡ҆бава́ющемѹ.

¹²Словеса̀ ѹ҆́стъ премѹ́драгѡ благода́ть, ѹ҆стнѣ́ же безѹ́мнагѡ потопѧ́тъ є҆го̀:

¹³нача́ло слове́съ ѹ҆́стъ є҆гѡ̀ безѹ́мїе, и҆ послѣ҄днѧѧ ѹ҆́стъ є҆гѡ̀ пре́лесть лѹка́ва.

¹⁴Безѹ́мный ѹ҆множа́етъ словеса̀: не разѹмѣ̀ человѣ́къ, что̀ бы́вшее и҆ что̀ бѹ́дѹщее, что̀ созадѝ є҆гѡ̀, (и҆) кто̀ возвѣсти́тъ є҆мѹ̀;

¹⁵Трѹ́дъ безѹ́мныхъ ѡ҆ѕло́битъ и҆̀хъ, и҆́же не разѹмѣ̀ и҆тѝ во гра́дъ.

¹⁶Го́ре тебѣ̀, гра́де, въ не́мже ца́рь тво́й ю҆́нъ, и҆ кнѧ҄зи твоѝ ра́нѡ ѩ҆дѧ́тъ.

¹⁷Блаже́нна ты̀, землѐ, є҆ѧ́же ца́рь тво́й сы́нъ свобо́дныхъ, и҆ кнѧ҄зи твоѝ во вре́мѧ ѩ҆дѧ́тъ въ си́лѣ и҆ не постыдѧ́тсѧ.

¹⁸Въ лѣ́ностехъ смири́тсѧ стро́пъ, и҆ въ пра́зднествѣ рѹ́къ прока́плетъ хра́мина.

¹⁹Во смѣ́хъ творѧ́тъ хлѣ́бъ и҆ вїно̀ и҆ є҆ле́й, є҆́же весели́тисѧ живѹ́щымъ: и҆ сребра̀ со смире́нїемъ послѹ́шаютъ всѧ́чєскаѧ.

²⁰И҆ въ со́вѣсти ѹ҆́бѡ твое́й не кленѝ царѧ̀, и҆ въ клѣ́ти ло́жницы твоеѧ̀ не кленѝ бога́таго: ѩ҆́кѡ пти́ца небе́снаѧ донесе́тъ гла́съ тво́й, и҆ и҆мѣ́ѧй крилѣ҄ возвѣсти́тъ сло́во твоѐ.