Read Библия Церковнославянская Е҆кклесїа́ст 11 Bible Online

Е҆кклесїа́ст 11 - Библия Церковнославянская bible

Е҆кклесїа́ст 11

¹Послѝ хлѣ́бъ тво́й на лицѐ воды̀, ѩ҆́кѡ во мно́жествѣ дні́й ѡ҆брѧ́щеши є҆го̀.

²Да́ждь ча́сть седми́мъ и҆ ѻ҆сми́мъ, ѩ҆́кѡ не вѣ́си, что̀ бѹ́детъ лѹка́во на землѝ.

³А҆́ще и҆спо́лнѧтсѧ ѡ҆́блацы дождѧ̀, на зе́млю и҆злива́ютъ: и҆ а҆́ще паде́тъ дре́во на ю҆́гъ, и҆ а҆́ще на сѣ́веръ, на мѣ́стѣ, и҆дѣ́же паде́тъ дре́во, та́мѡ бѹ́детъ.

⁴Блюды́й вѣ́тра не сѣ́етъ, и҆ сматрѧ́ѧй во ѡ҆́блацѣхъ не по́жнетъ.

⁵Въ ни́хже нѣ́сть вѣ́дый, кі́и пѹ́ть дѹ́ха, ѩ҆́коже кѡ́сти во чре́вѣ ражда́ющїѧ: та́кѡ не ѹ҆разѹмѣ́еши дѣ́лъ бж҃їихъ, є҆ли҄ка сотвори́тъ всѧ́чєскаѧ.

⁶Въ заѹ́трїи сѣ́й сѣ́мѧ твоѐ, и҆ въ ве́черъ да не ѡ҆ставлѧ́етъ рѹка̀ твоѧ̀: ѩ҆́кѡ не вѣ́си, ко́е произы́детъ сїѐ и҆лѝ ѻ҆́но, и҆ а҆́ще ѻ҆боѧ̀ вкѹ́пѣ блага҄ѧ.

⁷И҆ сла́дко свѣ́тъ, и҆ бла́го ѻ҆чи́ма зрѣ́ти со́лнце:

⁸ѩ҆́кѡ а҆́ще и҆ мнѡ́га лѣ҄та поживе́тъ человѣ́къ, и҆ ѡ҆ всѣ́хъ си́хъ возвесели́тсѧ, и҆ помѧне́тъ дни҄ тмы̀, ѩ҆́кѡ мно́зи бѹ́дѹтъ: всѐ грѧдѹ́щее сѹета̀.

⁹Весели́сѧ, ю҆́ноше, во ю҆́ности твое́й, и҆ да ѹ҆блажи́тъ тѧ̀ се́рдце твоѐ во дне́хъ ю҆́ности твоеѧ̀, и҆ ходѝ въ пѹте́хъ се́рдца твоегѡ̀ непоро́ченъ и҆ не въ видѣ́нїи ѻ҆́чїю твоє́ю: и҆ разѹмѣ́й, ѩ҆́кѡ ѡ҆ всѣ́хъ си́хъ приведе́тъ тѧ̀ бг҃ъ на сѹ́дъ:

¹⁰и҆ ѿста́ви ѩ҆́рость ѿ се́рдца твоегѡ̀, и҆ ѿри́ни лѹка́вство ѿ пло́ти твоеѧ̀: ѩ҆́кѡ ю҆́ность и҆ безѹ́мїе сѹета̀.