Read Библия Церковнославянская Е҆кклесїа́ст 3 Bible Online

Е҆кклесїа́ст 3 - Библия Церковнославянская bible

Е҆кклесїа́ст 3

¹Всѣ҄мъ вре́мѧ и҆ вре́мѧ всѧ́цѣй ве́щи под̾ небесе́мъ:

²вре́мѧ ражда́ти и҆ вре́мѧ ѹ҆мира́ти, вре́мѧ сади́ти и҆ вре́мѧ и҆сторга́ти сажде́ное,

³вре́мѧ ѹ҆бива́ти и҆ вре́мѧ цѣли́ти, вре́мѧ разрѹша́ти и҆ вре́мѧ созида́ти,

⁴вре́мѧ пла́кати и҆ вре́мѧ смѣѧ́тисѧ, вре́мѧ рыда́ти и҆ вре́мѧ ликова́ти,

⁵вре́мѧ размета́ти ка́менїе и҆ вре́мѧ собира́ти ка́менїе, вре́мѧ ѡ҆быма́ти и҆ вре́мѧ ѹ҆далѧ́тисѧ ѿ ѡ҆быма́нїѧ,

⁶вре́мѧ и҆ска́ти и҆ вре́мѧ погѹблѧ́ти, вре́мѧ храни́ти и҆ вре́мѧ ѿрѣ́ѧти,

⁷вре́мѧ раздра́ти и҆ вре́мѧ сши́ти, вре́мѧ молча́ти и҆ вре́мѧ глаго́лати,

⁸вре́мѧ люби́ти и҆ вре́мѧ ненави́дѣти, вре́мѧ бра́ни и҆ вре́мѧ ми́ра.

⁹Ко́е и҆з̾ѻби́лїе творѧ́щагѡ, въ ни́хже са́мъ трѹди́тсѧ;

¹⁰Ви́дѣхъ попече́нїе всѧ́ческое, є҆́же дадѐ бг҃ъ сынѡ́мъ человѣ́чєскимъ, є҆́же пещи́сѧ въ не́мъ.

¹¹Всѧ́чєскаѧ, ѩ҆̀же сотворѝ, дѡбра̀ (сѹ́ть) во вре́мѧ своѐ, и҆́бо всѧ́кїй вѣ́къ да́лъ є҆́сть въ се́рдце и҆́хъ, ѩ҆́кѡ да не ѡ҆брѧ́щетъ человѣ́къ сотворе́нїѧ, є҆́же сотворѝ бг҃ъ ѿ нача́ла и҆ да́же до конца̀.

¹²Ѹ҆разѹмѣ́хъ, ѩ҆́кѡ нѣ́сть бла́го въ ни́хъ, но то́кмѡ є҆́же весели́тисѧ и҆ є҆́же твори́ти бла́го въ животѣ̀ свое́мъ:

¹³и҆́бо всѧ́къ человѣ́къ, и҆́же ѩ҆́стъ и҆ пїе́тъ и҆ ви́дитъ благо́е во все́мъ трѹдѣ̀ свое́мъ, сїѐ даѧ́нїе бж҃їе є҆́сть.

¹⁴Разѹмѣ́хъ, ѩ҆́кѡ всѧ҄, є҆ли҄ка сотворѝ бг҃ъ, сїѧ҄ бѹ́дѹтъ во вѣ́къ: къ тѣ҄мъ нѣ́сть приложи́ти и҆ ѿ тѣ́хъ нѣ́сть ѿѧ́ти, и҆ бг҃ъ сотворѝ, да ѹ҆боѧ́тсѧ ѿ лица̀ є҆гѡ̀:

¹⁵бы́вшее ѹ҆жѐ є҆́сть, и҆ є҆ли҄ка и҆́мѹтъ бы́ти, ѹ҆жѐ бы́ша, и҆ бг҃ъ взы́щетъ гони́маго.

¹⁶И҆ є҆щѐ ви́дѣхъ под̾ со́лнцемъ мѣ́сто сѹда̀, та́мѡ нечести́вый, и҆ мѣ́сто првднагѡ, та́мѡ бл҃гочести́вый.

¹⁷И҆ рѣ́хъ а҆́зъ въ се́рдцы мое́мъ: првднаго и҆ нечести́ваго сѹ́дитъ бг҃ъ: ѩ҆́кѡ вре́мѧ всѧ́цѣй ве́щи и҆ на всѧ́цѣмъ сотворе́нїи та́мѡ.

¹⁸Рѣ́хъ а҆́зъ въ се́рдцы мое́мъ ѡ҆ глаго́ланїи сынѡ́въ человѣ́ческихъ, ѩ҆́кѡ разсѹ́дитъ и҆̀хъ бг҃ъ: и҆ є҆́же показа́ти, ѩ҆́кѡ сі́и ско́ти сѹ́ть:

¹⁹и҆́бо и҆ тѣ҄мъ ѩ҆́коже слѹ́чай сынѡ́въ человѣ́ческихъ и҆ слѹ́чай ско́тскїй, слѹ́чай є҆ди́нъ и҆̀мъ: ѩ҆́коже сме́рть тогѡ̀, та́кѡ и҆ сме́рть сегѡ̀, и҆ дѹ́хъ є҆ди́нъ во всѣ́хъ: и҆ что̀ и҆зли́шше и҆́мать человѣ́къ па́че скота̀; ничто́же: ѩ҆́кѡ всѧ́чєскаѧ сѹета̀.

²⁰Всѧ҄ и҆́дѹтъ во є҆ди́но мѣ́сто: всѧ҄ бы́ша ѿ пе́рсти и҆ всѧ҄ въ пе́рсть возвраща́ютсѧ.

²¹И҆ кто̀ вѣ́сть дѹ́хъ сынѡ́въ человѣ́ческихъ, а҆́ще то́й восхо́дитъ горѣ̀; и҆ дѹ́хъ ско́тскїй, а҆́ще низхо́дитъ то́й до́лѹ въ зе́млю;

²²И҆ ви́дѣхъ, ѩ҆́кѡ нѣ́сть бла́го, но то́кмѡ є҆́же возвесели́тсѧ человѣ́къ въ творе́нїихъ свои́хъ, ѩ҆́кѡ сїѧ̀ ча́сть є҆гѡ̀: поне́же кто̀ приведе́тъ є҆го̀ ви́дѣти то̀, є҆́же бѹ́детъ по не́мъ;