Read Библия Церковнославянская Е҆кклесїа́ст 4 Bible Online

Е҆кклесїа́ст 4 - Библия Церковнославянская bible

Е҆кклесїа́ст 4

¹И҆ ѡ҆брати́хсѧ а҆́зъ и҆ ви́дѣхъ всѧ҄ ѡ҆клевєта́нїѧ быва҄ющаѧ под̾ со́лнцемъ: и҆ сѐ, сле́зы ѡ҆клевета́нныхъ, и҆ нѣ́сть и҆̀мъ ѹ҆тѣша́ющагѡ, и҆ ѿ рѹкѝ клеве́щѹщихъ на нѧ̀ крѣ́пость, и҆ нѣ́сть и҆̀мъ ѹ҆тѣша́ющагѡ.

²И҆ похвали́хъ а҆́зъ всѣ́хъ ѹ҆ме́ршихъ, и҆̀же ѹ҆мро́ша ѹ҆жѐ, па́че живы́хъ, є҆ли́цы жи́ви сѹ́ть досе́лѣ:

³и҆ бла́гъ па́че ѻ҆бои́хъ си́хъ, и҆́же є҆щѐ не бы́сть, и҆́же не ви́дѣ всѧ́кагѡ сотворе́нїѧ лѹка́вагѡ сотворе́ннагѡ под̾ со́лнцемъ.

⁴И҆ ви́дѣхъ а҆́зъ ве́сь трѹ́дъ и҆ всѧ́ко мѹ́жество сотворе́нїѧ, ѩ҆́кѡ сїѐ ре́вность мѹ́жа ѿ по́дрѹга своегѡ̀. И҆ сїѐ сѹета̀ и҆ произволе́нїе дѹ́ха.

⁵Безѹ́мный ѡ҆б̾ѧ́тъ рѹ́цѣ своѝ и҆ снѣдѐ плѡ́ти своѧ҄.

⁶Бла́го є҆́сть и҆сполне́нїе го́рсти поко́ѧ, па́че и҆сполне́нїѧ двою̀ гѡ́рстїю трѹда̀ и҆ произволе́нїѧ дѹ́ха.

⁷И҆ ѡ҆брати́хсѧ а҆́зъ и҆ ви́дѣхъ сѹ́етство под̾ со́лнцемъ:

⁸є҆́сть є҆ди́нъ, и҆ нѣ́сть втора́гѡ, ни сы́на, нижѐ бра́та нѣ́сть є҆мѹ̀, и҆ нѣ́сть конца̀ всемѹ̀ трѹдѹ̀ є҆гѡ̀, нижѐ ѻ҆́ко є҆гѡ̀ насыща́етсѧ бога́тства. И҆ комѹ̀ а҆́зъ трѹжда́юсѧ и҆ лиша́ю дѹ́шѹ мою̀ ѿ благосты́ни; И҆ сїѐ сѹета̀ и҆ попече́нїе лѹка́вно є҆́сть.

⁹Бла́зи два̀ па́че є҆ди́нагѡ, и҆̀мже є҆́сть мзда̀ бла́га въ трѹдѣ̀ и҆́хъ:

¹⁰ѩ҆́кѡ а҆́ще паде́тсѧ є҆ди́нъ ѿ ни́хъ, воздви́гнетъ дрѹгі́й прича́стника своего̀: и҆ го́ре томѹ̀ є҆ди́номѹ, є҆гда̀ паде́тъ и҆ не бѹ́детъ втора́гѡ воздви́гнѹти є҆го̀.

¹¹И҆ а҆́ще ѹ҆́снета два̀, тепло̀ и҆́ма бѹ́детъ, а҆ є҆ди́нъ ка́кѡ согрѣ́етсѧ;

¹²И҆ а҆́ще ѹ҆крѣпи́тсѧ є҆ди́нъ, два̀ ста́нета проти́вѹ є҆мѹ̀: и҆ ве́рвь треплете́на не ско́рѡ расто́ргнетсѧ.

¹³Бла́гъ ѻ҆́трокъ ни́щь и҆ мѹ́дръ, па́че ста́ра царѧ̀ и҆ безѹ́мна, и҆́же не разѹмѣ̀ внима́ти є҆щѐ:

¹⁴ѩ҆́кѡ и҆з̾ до́мѹ ю҆́зникѡвъ и҆зы́детъ ца́рствовати, поне́же и҆ въ ца́рствѣ свое́мъ роди́сѧ ни́щь.

¹⁵Ви́дѣхъ всѣ́хъ живѹ́щихъ, ходѧ́щихъ под̾ со́лнцемъ, съ ю҆́нымъ вторы́мъ, и҆́же воста́нетъ вмѣ́стѡ є҆гѡ̀.

¹⁶Нѣ́сть конца̀ всѣ҄мъ лю́демъ, всѣ҄мъ, и҆̀же пред̾ ни́ми бы́ша, и҆́бо послѣ́днїи не возвеселѧ́тсѧ ѡ҆ не́мъ: ѩ҆́кѡ и҆ сїѐ сѹета̀ и҆ произволе́нїе дѹ́ха.

¹⁷Сохранѝ но́гѹ твою̀, є҆гда̀ а҆́ще и҆́деши въ до́мъ бж҃їй, и҆ бли́з̾ (бѹ́ди) є҆́же слѹ́шати: па́че даѧ́нїѧ безѹ́мныхъ же́ртва твоѧ̀, поне́же не вѣ́дѧтъ, ѩ҆́кѡ творѧ́тъ ѕло̀.