Read Библия Церковнославянская Е҆кклесїа́ст 5 Bible Online

Е҆кклесїа́ст 5 - Библия Церковнославянская bible

Е҆кклесїа́ст 5

¹Не ско́ръ бѹ́ди ѹ҆сты҄ твои́ми, и҆ се́рдце твоѐ да не ѹ҆скорѧ́етъ и҆зноси́ти сло́во пред̾ лице́мъ бж҃їимъ, ѩ҆́кѡ бг҃ъ на нб҃сѝ горѣ̀, ты́ же на землѝ до́лѹ: сегѡ̀ ра́ди да бѹ́дѹтъ словеса̀ твоѧ҄ ма҄ла:

²ѩ҆́кѡ прихо́дитъ со́нїе во мно́жествѣ попече́нїѧ, та́кѡ и҆ гла́съ безѹ́мнагѡ во мно́жествѣ слове́съ.

³А҆́ще ѡ҆бѣща́еши ѡ҆бѣ́тъ бг҃ѹ, не ѹ҆ме́дли ѿда́ти є҆го̀, ѩ҆́кѡ нѣ́сть хотѣ́нїѧ въ безѹ́мныхъ: ты̀ ѹ҆̀бо, є҆ли҄ка а҆́ще ѡ҆бѣща́еши, ѿда́ждь.

⁴Бла́го тебѣ̀ є҆́же не ѡ҆бѣщава́тисѧ, не́жели ѡ҆бѣща́вшѹсѧ тебѣ̀, не ѿда́ти.

⁵Не да́ждь ѹ҆стна́мъ твои҄мъ є҆́же во грѣ́хъ ввестѝ пло́ть твою̀, и҆ да не рече́ши пред̾ лице́мъ бж҃їимъ, ѩ҆́кѡ невѣ́дѣнїе є҆́сть: да не прогнѣ́ваетсѧ бг҃ъ ѡ҆ гла́сѣ твое́мъ и҆ растли́тъ творє́нїѧ рѹ́къ твои́хъ:

⁶ѩ҆́кѡ во мно́жествѣ со́нїй и҆ сѹ́етствїѧ, (та́кѡ) и҆ словеса̀ мнѡ́га, тѣ́мже бг҃а бо́йсѧ.

⁷А҆́ще ѡ҆би́дѹ ни́щагѡ и҆ расхище́нїе сѹда̀ и҆ пра́вды ѹ҆ви́диши во странѣ̀, не диви́сѧ ѡ҆ ве́щи: ѩ҆́кѡ высо́кїй над̾ высо́кимъ надзира́тель, и҆ высо́цыи над̾ ни́ми,

⁸и҆ и҆з̾ѻби́лїе землѝ над̾ всѣ́мъ є҆́сть ца́рь села̀ воздѣ́ланна.

⁹Любѧ́й сребро̀ не насы́титсѧ сребра̀: и҆ кто̀ наслади́тсѧ во мно́жествѣ є҆гѡ̀ плода̀; И҆ сїѐ сѹета̀.

¹⁰Во мно́жествѣ бла́га ѹ҆мно́жишасѧ ѩ҆дѹ́щїи є҆̀: и҆ ко́е мѹ́жество и҆мѹ́щемѹ є҆̀; ѩ҆́кѡ нача́ло є҆́же ви́дѣти ѻ҆чи́ма свои́ма.

¹¹Со́нъ сла́докъ рабо́тающемѹ, а҆́ще ма́лѡ и҆лѝ мно́гѡ снѣ́сть: а҆ насы́тившагосѧ бога́тство не ѡ҆ставлѧ́етъ ѹ҆снѹ́ти.

¹²Е҆́сть недѹ́гъ, є҆го́же ви́дѣхъ под̾ со́лнцемъ, бога́тство храни́мо ѿ стѧжа́телѧ во ѕло̀ є҆мѹ̀:

¹³и҆ поги́бнетъ бога́тство ѻ҆́но въ попече́нїи лѹка́внѣ: и҆ родѝ сы́на, и҆ нѣ́сть въ рѹцѣ̀ є҆гѡ̀ ничто́же:

¹⁴ѩ҆́коже и҆зы́де и҆з̾ чре́ва ма́тере своеѧ̀ на́гъ, возврати́тсѧ и҆тѝ, ѩ҆́коже и҆ прїи́де, и҆ ничто́же во́зметъ ѿ трѹда̀ своегѡ̀, да понесе́тъ въ рѹцѣ̀ свое́й.

¹⁵И҆ сїѐ ѕо́лъ недѹ́гъ: ѩ҆́коже бо прїи́де, та́кѡ и҆ ѿи́детъ, и҆ ка́ѧ по́льза є҆мѹ̀, ѩ҆́кѡ трѹди́тсѧ на вѣ́тръ;

¹⁶И҆́бо всѝ дні́е є҆гѡ̀ во тмѣ̀ и҆ пла́чи и҆ въ ѩ҆́рости мно́зѣ, и҆ въ недѹ́зѣ и҆ во гнѣ́вѣ.

¹⁷Сѐ, ви́дѣхъ а҆́зъ благо́е, є҆́же є҆́сть и҆зрѧ́дно, є҆́же ѩ҆́сти и҆ пи́ти и҆ ви́дѣти благосты́ню во все́мъ трѹдѣ̀ свое́мъ, и҆́мже трѹди́лсѧ бы под̾ со́лнцемъ, въ число̀ дні́й живота̀ своегѡ̀, ѩ҆̀же да́лъ є҆́сть є҆мѹ̀ бг҃ъ, ѩ҆́кѡ сїѐ ча́сть є҆гѡ̀:

¹⁸и҆́бо всѧ́комѹ человѣ́кѹ, є҆мѹ́же да́лъ є҆́сть бг҃ъ бога́тство и҆ и҆мѣ҄нїѧ, и҆ вла́сть дадѐ є҆мѹ̀ ѩ҆́сти ѿ тогѡ̀ и҆ прїѧ́ти ча́сть свою̀ и҆ возвесели́тисѧ ѡ҆ трѹдѣ̀ свое́мъ, сїѐ да́ръ бж҃їй є҆́сть:

¹⁹ѩ҆́кѡ не мно́го па́мѧтствовати и҆́мать дни҄ живота̀ своегѡ̀, поне́же бг҃ъ ѡ҆блага́етъ є҆го̀ попече́ньми въ весе́лїи се́рдца є҆гѡ̀.