Read Библия Церковнославянская Е҆кклесїа́ст 6 Bible Online

Е҆кклесїа́ст 6 - Библия Церковнославянская bible

Е҆кклесїа́ст 6

¹Е҆́сть лѹка́вствїе, є҆́же ви́дѣхъ под̾ со́лнцемъ, и҆ мно́го є҆́сть над̾ человѣ́комъ:

²мѹ́жъ, є҆мѹ́же да́стъ бг҃ъ бога́тство и҆ и҆мѣ́нїе и҆ сла́вѹ, и҆ нѣ́сть лиша́ѧй дѹшѝ свое́й ѿ всѣ́хъ, и҆́хже вожделѣ́етъ, и҆ не да́стъ є҆мѹ̀ бг҃ъ вла́сти ѿ негѡ̀ ѩ҆́сти, ѩ҆́кѡ чѹ́ждь мѹ́жъ ѩ҆́сти и҆́мать ѿ негѡ̀. И҆ сїѐ сѹета̀ и҆ недѹ́гъ ѕо́лъ є҆́сть.

³А҆́ще роди́тъ мѹ́жъ сто̀ (ча҄дъ) и҆ лѣ҄та мнѡ́га поживе́тъ, и҆ мно́зи бѹ́дѹтъ дні́е лѣ́тъ є҆гѡ̀, и҆ дѹша̀ є҆гѡ̀ не насы́титсѧ ѿ благосты́ни, и҆ погребе́нїѧ не бы́сть є҆мѹ̀, рѣ́хъ: бла́гъ па́че є҆гѡ̀ и҆́звергъ,

⁴ѩ҆́кѡ въ сѹетѣ̀ прїи́де и҆ во тмѹ̀ и҆́детъ, и҆ во тмѣ̀ и҆́мѧ є҆гѡ̀ покры́етсѧ:

⁵и҆ со́лнца не ви́дѣ, нижѐ разѹмѣ̀, поко́й семѹ̀ па́че тогѡ̀:

⁶и҆ поживѐ ты́сѧщѹ лѣ́тъ сѹгѹ́бѡ, и҆ благосты́ни не ви́дѣ: є҆да̀ не во є҆ди́но мѣ́сто всѧ҄ и҆́дѹтъ;

⁷Ве́сь трѹ́дъ человѣ́чь во ѹ҆ста̀ є҆гѡ̀, и҆ дѹша̀ є҆гѡ̀ не и҆спо́лнитсѧ.

⁸ѩ҆́кѡ ко́е и҆з̾ѻби́лїе (человѣ́кѹ) мѹ́дромѹ па́че безѹ́мнагѡ; поне́же ни́щь позна̀ ходи́ти проти́вѹ живота̀.

⁹Бла́го видѣ́нїе ѻ҆́чїю па́че ходѧ́щагѡ дѹше́ю. И҆ сѐ сѹ́етствїе и҆ произволе́нїе дѹ́ха.

¹⁰А҆́ще что̀ бы́сть, ѹ҆жѐ и҆менова́сѧ и҆́мѧ є҆гѡ̀, и҆ позна́сѧ, є҆́же є҆́сть человѣ́къ и҆ не возмо́жетъ сѹди́тисѧ съ крѣпча́йшимъ па́че себє̀:

¹¹ѩ҆́кѡ сѹ́ть словеса̀ мнѡ́га ѹ҆множа҄ющаѧ сѹетѹ̀.