Read Библия Церковнославянская Е҆кклесїа́ст 7 Bible Online

Е҆кклесїа́ст 7 - Библия Церковнославянская bible

Е҆кклесїа́ст 7

¹Что̀ и҆зли́шше человѣ́кѹ, ѩ҆́кѡ кто̀ вѣ́сть, что̀ бла́го человѣ́кѹ въ животѣ̀ (є҆гѡ̀) число̀ дні́й живота̀ сѹ́етства є҆гѡ̀; и҆ сотворѝ ѧ҆̀ въ сѣ́ни: ѩ҆́кѡ кто̀ возвѣсти́тъ человѣ́кѹ, что̀ бѹ́детъ по не́мъ под̾ со́лнцемъ;

²Бла́го и҆́мѧ па́че є҆ле́а бла́га, и҆ де́нь сме́ртный па́че днѧ̀ рожде́нїѧ є҆гѡ̀.

³Бла́го ходи́ти въ до́мъ пла́ча, не́жели ходи́ти въ до́мъ пи́ра, поне́же сїѐ коне́цъ всѧ́комѹ человѣ́кѹ, и҆ живы́й да́стъ бла́го въ се́рдцы є҆гѡ̀.

⁴Бла́га ѩ҆́рость па́че смѣ́ха, ѩ҆́кѡ во ѕло́бѣ лица̀ ѹ҆блажи́тсѧ се́рдце.

⁵Се́рдце мѹ́дрыхъ въ домѹ̀ пла́ча, а҆ се́рдце безѹ́мныхъ въ домѹ̀ весе́лїѧ.

⁶Бла́го є҆́же слы́шати преще́нїе премѹ́дра, па́че мѹ́жа слы́шащагѡ пѣ́снь безѹ́мныхъ:

⁷ѩ҆́коже гла́съ те́рнїѧ под̾ котло́мъ, та́кѡ смѣ́хъ безѹ́мныхъ. И҆ сїѐ сѹета̀.

⁸ѩ҆́кѡ клевета̀ льсти́тъ мѹ́драго и҆ погѹблѧ́етъ се́рдце благоро́дствїѧ є҆гѡ̀.

⁹Бла҄га послѣ҄днѧѧ слове́съ па́че нача́ла є҆гѡ̀: бла́гъ терпѣли́вый па́че высо́кагѡ дѹ́хомъ.

¹⁰Не тщи́сѧ въ дѹ́сѣ свое́мъ ѩ҆ри́тисѧ, ѩ҆́кѡ ѩ҆́рость въ нѣ́дрѣ безѹ́мныхъ почі́етъ.

¹¹Да не рече́ши: что̀ бы́сть, ѩ҆́кѡ дні́е пре́жднїи бѣ́ша бла́зи па́че си́хъ; ѩ҆́кѡ не въ мѹ́дрости вопроси́лъ є҆сѝ ѡ҆ се́мъ.

¹²Бла́га мѹ́дрость съ наслѣ́дїемъ, па́че же ви́дѧщымъ со́лнце:

¹³ѩ҆́кѡ въ сѣ́ни є҆гѡ̀ мѹ́дрость, ѩ҆́коже сѣ́нь сребра̀, и҆ и҆з̾ѻби́лїе ра́зѹма премѹ́дрости ѡ҆живлѧ́етъ, и҆́же ѿ неѧ̀.

¹⁴Ви́ждь творє́нїѧ бж҃їѧ: ѩ҆́кѡ кто̀ мо́жетъ ѹ҆краси́ти, є҆го́же а҆́ще бг҃ъ преврати́тъ;

¹⁵Въ де́нь благосты́ни (є҆гѡ̀) живѝ во бла́зѣ и҆ ви́ждь въ де́нь ѕла̀: ви́ждь, и҆ съ ни́мъ согла́сно сїѐ сотворѝ бг҃ъ, ѡ҆ глаго́ланїи, да не ѡ҆брѧ́щетъ человѣ́къ за ни́мъ ничто́же.

¹⁶Всѧ́чєскаѧ ви́дѣхъ во дне́хъ сѹ́етствїѧ моегѡ̀: є҆́сть првдный погиба́ѧй во свое́й пра́вдѣ, и҆ є҆́сть нечести́вый пребыва́ѧй во свое́й ѕло́бѣ.

¹⁷Не бѹ́ди правди́въ вельмѝ, ни мѹдри́сѧ и҆зли́шше, да не когда̀ и҆зѹми́шисѧ.

¹⁸Не нече́ствѹй мно́гѡ и҆ не бѹ́ди же́стокъ, да не ѹ҆́мреши не во вре́мѧ своѐ.

¹⁹Бла́го тѝ є҆́сть держа́тисѧ сегѡ̀, и҆ ѿ сегѡ̀ не ѡ҆сквернѝ рѹкѝ твоеѧ̀, ѩ҆́кѡ боѧ́щымсѧ бг҃а поспѣша́тсѧ всѧ҄.

²⁰Премѹ́дрость помо́жетъ мѹ́дромѹ па́че десѧтѝ ѡ҆блада́ющихъ во гра́дѣ:

²¹ѩ҆́кѡ нѣ́сть человѣ́къ пра́веденъ на землѝ, и҆́же сотвори́тъ благо́е и҆ не согрѣши́тъ.

²²И҆ во всѧ҄ словеса̀, ѩ҆̀же возглаго́лютъ нечести́вїи, не вложѝ се́рдца своегѡ̀, да не ѹ҆слы́шиши раба̀ своегѡ̀ кленѹ́ща тебѐ:

²³ѩ҆́кѡ мно́гажды возлѹка́внѹетъ на тѧ̀, и҆ ѡ҆бхождє́нїи мно́гими ѡ҆ѕло́битъ се́рдце твоѐ, ѩ҆́коже и҆ ты̀ клѧ́лъ є҆сѝ и҆ны҄ѧ (мнѡ́гїѧ).

²⁴Всѧ҄ сїѧ҄ и҆скѹси́хъ въ мѹ́дрости: рѣ́хъ, ѹ҆мѹдрю́сѧ: и҆ сїѧ̀ ѹ҆дали́сѧ ѿ менє̀

²⁵дале́че па́че не́же бѣ́хъ, и҆ бе́здны глѹбина̀, кто̀ ѡ҆брѧ́щетъ ю҆̀;

²⁶Ѡ҆быдо́хъ а҆́зъ, и҆ се́рдце моѐ, є҆́же разѹмѣ́ти, є҆́же разсмотри́ти, и҆ є҆́же взыска́ти мѹ́дрость и҆ ра́зѹмъ, и҆ є҆́же разѹмѣ́ти нечести́вагѡ безѹ́мїе и҆ ѡ҆жесточе́нїе и҆ ле́сть:

²⁷и҆ ѡ҆брѣто́хъ а҆́зъ ю҆̀, и҆ рекѹ̀ горча́йшѹ па́че сме́рти женѹ̀, ѩ҆́же є҆́сть лови́тва, и҆ сѣ҄ти се́рдце є҆ѧ̀, ѹ҆́зы въ рѹкѹ̀ є҆ѧ̀: благі́й пред̾ лице́мъ бж҃їимъ и҆з̾и́метсѧ ѿ неѧ̀, а҆ согрѣша́ѧй ѩ҆́тъ бѹ́детъ ѿ неѧ̀.

²⁸Сѐ, сїѐ ѡ҆брѣто́хъ, речѐ є҆кклесїа́стъ: є҆ди́нѹ є҆ди́ною є҆́же ѡ҆брѣстѝ по́мыслъ, є҆́же взыска̀ дѹша̀ моѧ̀, и҆ не ѡ҆брѣто́хъ:

²⁹и҆ человѣ́ка є҆ди́наго ѿ ты́сѧщъ ѡ҆брѣто́хъ, а҆ жены̀ во всѣ́хъ си́хъ не ѡ҆брѣто́хъ:

³⁰ѻ҆ба́че сѐ, сїѐ ѡ҆брѣто́хъ, є҆́же сотворѝ бг҃ъ человѣ́ка пра́ваго, и҆ сі́и взыска́ша помыслѡ́въ мно́гихъ. Кто̀ ѹ҆вѣ́дѣ мѹ́дрость; и҆ кто̀ вѣ́сть разрѣше́нїе глаго́ла;