Read Библия Церковнославянская Е҆кклесїа́ст 9 Bible Online

Е҆кклесїа́ст 9 - Библия Церковнославянская bible

Е҆кклесїа́ст 9

¹ѩ҆́кѡ првднїи и҆ мѹ́дрїи и҆ дѣ҄ланїѧ и҆́хъ въ рѹцѣ̀ бж҃їей, и҆ любве́ же и҆ не́нависти нѣ́сть вѣ́дѧй человѣ́къ: всѧ҄ пред̾ лице́мъ и҆́хъ, сѹета̀ во всѣ́хъ.

²Слѹ́чай є҆ди́нъ првдномѹ и҆ нечести́вомѹ, бл҃го́мѹ и҆ ѕло́мѹ, и҆ чи́стомѹ и҆ нечи́стомѹ, и҆ жрѹ́щемѹ и҆ не жрѹ́щемѹ: ѩ҆́коже бл҃гі́й, та́кѡ согрѣша́ѧй, ѩ҆́коже клены́йсѧ, та́кѡ боѧ́йсѧ клѧ́твы.

³Сїѐ лѹка́во во всѧ́цѣмъ сотворе́нѣмъ под̾ со́лнцемъ, ѩ҆́кѡ слѹ́чай є҆ди́нъ всѣ҄мъ: и҆ се́рдце сынѡ́въ человѣ́ческихъ и҆спо́лнисѧ лѹка́вствїѧ, и҆ пре́лесть въ сердца́хъ и҆́хъ и҆ въ животѣ̀ и҆́хъ, и҆ по си́хъ къ мє́ртвымъ.

⁴Поне́же кто̀ є҆́сть, и҆́же приѡбща́етсѧ ко всѣ҄мъ живы҄мъ; Е҆́сть наде́жда, ѩ҆́кѡ пе́съ живы́й, то́й бла́гъ па́че льва̀ ме́ртва.

⁵Поне́же живі́и разѹмѣ́ютъ, ѩ҆́кѡ ѹ҆́мрѹтъ, ме́ртвїи же не сѹ́ть вѣ́дѹщїи ничто́же: и҆ ктомѹ̀ нѣ́сть и҆̀мъ мзды̀, ѩ҆́кѡ забве́на є҆́сть па́мѧть и҆́хъ,

⁶и҆ любо́вь и҆́хъ и҆ не́нависть и҆́хъ и҆ рве́нїе и҆́хъ ѹ҆жѐ поги́бе, и҆ ча́сти нѣ́сть и҆̀мъ ктомѹ̀ во вѣ́ки во всѧ́цѣмъ творе́нїи под̾ со́лнцемъ.

⁷Прїидѝ, ѩ҆́ждь въ весе́лїи хлѣ́бъ тво́й и҆ пі́й во бла́зѣ се́рдцы вїно̀ твоѐ, ѩ҆́кѡ ѹ҆жѐ ѹ҆гѡ́дна бг҃ѹ творє́нїѧ твоѧ҄.

⁸Во всѧ́ко вре́мѧ да бѹ́дѹтъ ри҄зы твоѧ҄ бѣ҄лы, и҆ є҆ле́й на главѣ̀ твое́й да не ѡ҆скѹдѣ́етъ.

⁹И҆ ви́ждь житїѐ съ жено́ю, ю҆́же возлюби́лъ є҆сѝ, во всѧ҄ дни҄ живота̀ ю҆́ности твоеѧ̀, да҄нныѧ тѝ под̾ со́лнцемъ, всѧ҄ дни҄ сѹ́етствїѧ твоегѡ̀: ѩ҆́кѡ сїѐ ча́сть твоѧ̀ въ животѣ̀ твое́мъ и҆ въ трѹдѣ̀ твое́мъ, и҆́мже ты̀ трѹди́шисѧ под̾ со́лнцемъ.

¹⁰Всѧ҄, є҆ли҄ка а҆́ще ѡ҆брѧ́щетъ рѹка̀ твоѧ̀ сотвори́ти, ѩ҆́коже си́ла твоѧ̀, сотворѝ: занѐ нѣ́сть сотворе́нїе и҆ помышле́нїе и҆ ра́зѹмъ и҆ мѹ́дрость во а҆́дѣ, а҆́може ты̀ и҆́деши та́мѡ.

¹¹Ѡ҆брати́хсѧ и҆ ви́дѣхъ под̾ со́лнцемъ, ѩ҆́кѡ ни лє́гкимъ тече́нїе, нижѐ си҄льнымъ бра́нь, нижѐ самомѹ̀ мѹ́дромѹ хлѣ́бъ, нижѐ разѹ҄мнымъ бога́тство, нижѐ вѣ́дѹщымъ благода́ть: ѩ҆́кѡ вре́мѧ и҆ слѹ́чай слѹчи́тсѧ всѣ҄мъ си҄мъ.

¹²ѩ҆́кѡ ѹ҆́бѡ не разѹмѣ̀ человѣ́къ вре́мене своегѡ̀: ѩ҆́коже ры҄бы ѹ҆ловлѧ́ємы во мре́жи ѕлѣ̀, и҆ а҆́ки пти҄цы ѹ҆ловлѧ́ємы въ сѣ́ти: ѩ҆́коже сїѧ҄, ѹ҆ловлѧ́ютсѧ сы́нове человѣ́честїи во вре́мѧ лѹка́во, є҆гда̀ нападе́тъ на нѧ̀ внеза́пѹ.

¹³И҆ сїѐ ви́дѣхъ, мѹ́дрость под̾ со́лнцемъ, и҆ вели́ка є҆́сть во мнѣ̀:

¹⁴гра́дъ ма́лъ, и҆ мѹже́й въ не́мъ ма́лѡ, и҆ прїи́детъ на́нь ца́рь вели́къ и҆ ѡ҆́крестъ ѡ҆блѧ́жетъ є҆го̀, и҆ содѣ́лаетъ на него̀ ѻ҆стро́ги вє́лїѧ,

¹⁵и҆ ѡ҆брѧ́щетъ въ не́мъ мѹ́жа ни́щаго мѹ́дра, и҆ се́й спасе́тъ гра́дъ мѹ́дростїю свое́ю, и҆ человѣ́къ не воспомѧнѹ̀ мѹ́жа ни́щагѡ ѻ҆́нагѡ.

¹⁶И҆ рѣ́хъ а҆́зъ: блага̀ мѹ́дрость па́че си́лы, и҆ мѹ́дрость ни́щагѡ ѹ҆ничиже́на, и҆ словеса̀ є҆гѡ̀ не сѹ́ть послѹ́шаєма.

¹⁷Словеса̀ мѹ́дрыхъ въ поко́и слы́шатсѧ, па́че кли́ча ѡ҆блада́ющихъ въ безѹ́мїи.

¹⁸Блага̀ мѹ́дрость па́че ѻ҆рѹ́дїй ра́тныхъ: и҆ согрѣша́ѧй є҆ди́нъ погѹби́тъ благосты́ню мно́гѹ.