Read Библия Церковнославянская Пѣ́снь пѣ́сней 2 Bible Online

Пѣ́снь пѣ́сней 2 - Библия Церковнославянская bible

Пѣ́снь пѣ́сней 2

¹А҆́зъ цвѣ́тъ по́льный и҆ крі́нъ ѹ҆до́льный.

²ѩ҆́коже крі́нъ въ те́рнїи, та́кѡ и҆́скреннѧѧ моѧ̀ посредѣ̀ дще́рей.

³ѩ҆́кѡ ѩ҆́блонь посредѣ̀ древе́съ лѣсны́хъ, та́кѡ бра́тъ мо́й посредѣ̀ сынѡ́въ: под̾ сѣ́нь є҆гѡ̀ восхотѣ́хъ и҆ сѣдо́хъ, и҆ пло́дъ є҆гѡ̀ сла́докъ въ горта́ни мое́мъ.

⁴Введи́те мѧ̀ въ до́мъ вїна̀, вчини́те ко мнѣ̀ любо́вь:

⁵ѹ҆тверди́те мѧ̀ въ мѵ́рѣхъ, положи́те мѧ̀ во ѩ҆́блоцѣхъ: ѩ҆́кѡ ѹ҆ѧ́звлена (є҆́смь) любо́вїю а҆́зъ.

⁶Шѹ́йца є҆гѡ̀ под̾ главо́ю мое́ю, и҆ десни́ца є҆гѡ̀ ѡ҆б̾и́метъ мѧ̀.

⁷Заклѧ́хъ ва́съ, дщє́ри ї҆ер҇ли҄мли, въ си́лахъ и҆ крѣ́постехъ села̀: а҆́ще возста́вите и҆ возбѹ́дите любо́вь, до́ндеже восхо́щетъ.

⁸Гла́съ бра́та моегѡ̀: сѐ, то́й и҆́детъ, скача̀ на го́ры и҆ прескача̀ на хо́лмы.

⁹Подо́бенъ є҆́сть бра́тъ мо́й се́рнѣ и҆лѝ мла́дѹ є҆ле́ню на гора́хъ веѳи́льскихъ. Сѐ, се́й стои́тъ за стѣно́ю на́шею, проглѧ́даѧй ѻ҆ко́нцами, приница́ѧй сквозѣ̀ мрє́жи.

¹⁰Ѿвѣща́етъ бра́тъ мо́й и҆ глаго́летъ мнѣ̀: воста́ни, прїидѝ, бли́жнѧѧ моѧ̀, до́браѧ моѧ̀, голѹби́це моѧ̀.

¹¹ѩ҆́кѡ сѐ, зима̀ пре́йде, до́ждь ѿи́де, ѿи́де себѣ̀:

¹²цвѣ́ти ѩ҆ви́шасѧ на землѝ, вре́мѧ ѡ҆брѣ́занїѧ приспѣ̀, гла́съ го́рлицы слы́шанъ въ землѝ на́шей:

¹³смо́квь и҆знесѐ цвѣ́тъ сво́й, вїногра́ди зрѣ́юще да́ша воню̀. Воста́ни, прїидѝ, бли́жнѧѧ моѧ̀, до́браѧ моѧ̀, голѹби́це моѧ̀, и҆ прїидѝ.

¹⁴Ты̀, голѹби́це моѧ̀, въ покро́вѣ ка́меннѣ, бли́з̾ предстѣ́нїѧ: ѩ҆ви́ ми зра́къ тво́й, и҆ ѹ҆слы́шанъ сотвори́ ми гла́съ тво́й: ѩ҆́кѡ гла́съ тво́й сла́докъ, и҆ ѡ҆́бразъ тво́й красе́нъ.

¹⁵И҆ми́те на́мъ ли҄сы ма҄лыѧ, гѹбѧ́щыѧ вїногра́ды: и҆ вїногра́ди на́ши созрѣва́ютъ.

¹⁶Бра́тъ мо́й мнѣ̀, и҆ а҆́зъ є҆мѹ̀, пасы́й въ крі́нахъ,

¹⁷до́ндеже дхне́тъ де́нь, и҆ дви́гнѹтсѧ сѣ҄ни. Ѡ҆брати́сѧ, ѹ҆подо́бисѧ ты̀, бра́те мо́й, се́рнѣ и҆лѝ мла́дѹ є҆ле́ню на гора́хъ ю҆до́лїй.