Read Библия Церковнославянская Пѣ́снь пѣ́сней 4 Bible Online

Пѣ́снь пѣ́сней 4 - Библия Церковнославянская bible

Пѣ́снь пѣ́сней 4

¹Сѐ, є҆сѝ добра̀, бли́жнѧѧ моѧ̀, сѐ, є҆сѝ добра̀: ѻ҆́чи твоѝ голѹби҄нѣ, кромѣ̀ замолча́нїѧ твоегѡ̀: вла́си твоѝ ѩ҆́кѡ стада̀ кози́цъ, ѩ҆̀же ѿкры́шасѧ ѿ галаа́да.

²Зѹ́бы твоѝ ѩ҆́кѡ стада̀ ѡ҆стриже́ныхъ, ѩ҆̀же и҆зыдо́ша и҆з̾ кѹпѣ́ли, всѧ҄ двоеплѡ́дны, и҆ неродѧ́щїѧ нѣ́сть въ ни́хъ.

³ѩ҆́кѡ ве́рвь червле́на ѹ҆стнѣ̀ твоѝ, и҆ бесѣ́да твоѧ̀ красна̀: ѩ҆́кѡ ѡ҆броще́нїе ши́пка лани҄ты твоѧ҄, кромѣ̀ замолча́нїѧ твоегѡ̀.

⁴ѩ҆́кѡ сто́лпъ даві́довъ вы́ѧ твоѧ̀, со́зданъ въ ѳалпїѡ́ѳѣ: ты́сѧща щитѡ́въ ви́ситъ на не́мъ, всѧ҄ стрѣ́лы си́льныхъ.

⁵Два̀ сосца҄ твоѧ҄ ѩ҆́кѡ два̀ мла́да близнца҄ се́рны, пасѡ́маѧ во крі́нахъ,

⁶до́ндеже дхне́тъ де́нь, и҆ подви́гнѹтсѧ сѣ҄ни. Пойдѹ̀ себѣ̀ къ горѣ̀ смѵ́рнѣй и҆ къ хо́лмѹ лїва́нскѹ.

⁷Всѧ̀ добра̀ є҆сѝ, бли́жнѧѧ моѧ̀, и҆ поро́ка нѣ́сть въ тебѣ̀.

⁸Грѧдѝ ѿ лїва́на, невѣ́сто, грѧдѝ ѿ лїва́на: прїидѝ и҆ прейдѝ и҆з̾ нача́ла вѣ́ры, ѿ главы̀ сані́ра и҆ а҆ермѡ́на, ѿ ѡ҆гра́дъ льво́выхъ, ѿ го́ръ пардале́ѡвъ.

⁹Се́рдце на́ше привлекла̀ є҆сѝ, сестро̀ моѧ̀ невѣ́сто, се́рдце на́ше привлекла̀ є҆сѝ є҆ди́нымъ ѿ ѻ҆́чїю твоє́ю, є҆ди́нымъ мони́стомъ вы́и твоеѧ̀.

¹⁰Что̀ ѹ҆добрѣ́ста сосца҄ твоѧ҄, сестро̀ моѧ̀ невѣ́сто; что̀ ѹ҆добрѣ́ста сосца҄ твоѧ҄ па́че вїна̀, и҆ вонѧ̀ ри́зъ твои́хъ па́че всѣ́хъ а҆рѡма҄тъ;

¹¹Со́тъ и҆ска́паютъ ѹ҆стнѣ̀ твоѝ, невѣ́сто, ме́дъ и҆ млеко̀ под̾ ѧ҆зы́комъ твои́мъ, и҆ благово́нїе ри́зъ твои́хъ ѩ҆́кѡ благоѹха́нїе лїва́на.

¹²Вертогра́дъ заключе́нъ сестра̀ моѧ̀ невѣ́ста, вертогра́дъ заключе́нъ, и҆сто́чникъ запечатлѣ́нъ.

¹³Лѣ́тѡрасли твоѧ҄ са́дъ ши́пкѡвъ съ плодо́мъ ѩ҆́блочнымъ, кѵ́при съ на́рдами,

¹⁴на́рдъ и҆ шафра́нъ, тро́сть и҆ кїннамѡ́нъ со всѣ́ми древа́ми лїва́нскими, смѵ́рна, а҆ло́й со всѣ́ми пе́рвыми мѵ́рами,

¹⁵и҆сто́чникъ вертогра́да, и҆ кла́дѧзь воды̀ жи́вы и҆ и҆стека́ющїѧ ѿ лїва́на.

¹⁶Воста́ни, сѣ́вере, и҆ грѧдѝ, ю҆́же, и҆ повѣ́й во вертогра́дѣ мое́мъ, и҆ да потекѹ́тъ а҆рѡма́ты моѝ.