Read Библия Церковнославянская Пѣ́снь пѣ́сней 6 Bible Online

Пѣ́снь пѣ́сней 6 - Библия Церковнославянская bible

Пѣ́снь пѣ́сней 6

¹Бра́тъ мо́й сни́де въ вертогра́дъ сво́й, въ мѣста̀ а҆рѡма҄тъ, па́ствити въ вертогра́дѣхъ и҆ собира́ти крі́ны.

²А҆́зъ бра́тѹ моемѹ̀ и҆ бра́тъ мо́й мнѣ̀, пасы́й въ крі́нѣхъ.

³Добра̀ є҆сѝ, бли́жнѧѧ моѧ̀, ѩ҆́кѡ благоволе́нїе, красна̀ ѩ҆́кѡ ї҆ер҇ли́мъ, ѹ҆́жасъ ѩ҆́кѡ вчинє́нны.

⁴Ѿвратѝ ѻ҆́чи твоѝ ѿ менє̀, ѩ҆́кѡ ті́и воскрили́ша мѧ̀: вла́си твоѝ, ѩ҆́кѡ стада̀ ко́зъ, ѩ҆̀же взыдо́ша ѿ галаа́да:

⁵зѹ́бы твоѝ, ѩ҆́кѡ стада̀ ѡ҆стриже́ныхъ, ѩ҆̀же взыдо́ша ѿ кѹпѣ́ли, всѧ҄ близнѧ́та родѧ́щыѧ, и҆ безча́дныѧ нѣ́сть въ ни́хъ: ѩ҆́кѡ ве́рвь червле́на ѹ҆стнѣ̀ твоѝ, и҆ бесѣ́да твоѧ̀ красна̀:

⁶ѩ҆́кѡ ѡ҆броще́нїе ши́пка лани҄ты твоѧ҄, кромѣ̀ замолча́нїѧ твоегѡ̀.

⁷Шестьдесѧ́тъ сѹ́ть цари́цъ и҆ ѻ҆́смьдесѧтъ нало́жницъ, и҆ ю҆́нотъ, и҆̀мже нѣ́сть числа̀:

⁸є҆ди́на є҆́сть голѹби́ца моѧ̀, соверше́ннаѧ моѧ̀: є҆ди́на є҆́сть ма́тери свое́й, и҆збра́нна є҆́сть роди́вшей ю҆̀: ви́дѣша ю҆̀ дщє́ри и҆ ѹ҆блажи́ша ю҆̀, цари҄цы и҆ налѡ́жницы, и҆ восхвали́ша ю҆̀.

⁹Кто̀ сїѧ̀ проница́ющаѧ а҆́ки ѹ҆́тро, добра̀ ѩ҆́кѡ лѹна̀, и҆збра́нна ѩ҆́кѡ со́лнце, ѹ҆́жасъ ѩ҆́кѡ вчинє́нны;

¹⁰Въ вертогра́дъ ѻ҆рѣ́хѡвъ снидо́хъ ви́дѣти въ плодѣ́хъ пото́ка, ви́дѣти, а҆́ще процвѣтѐ вїногра́дъ и҆ возрасто́ша ши́пки.

¹¹Та́мѡ да́мъ сосца҄ моѧ҄ тебѣ̀: не разѹмѣ̀ дѹша̀ моѧ̀, положи́ мѧ на колесни́цѣ а҆мїнада́вли.

¹²Ѡ҆брати́сѧ, ѡ҆брати́сѧ, сѹламі́тїно, ѡ҆брати́сѧ, ѡ҆брати́сѧ, и҆ ѹ҆́зримъ въ тебѣ̀.