Read Библия Церковнославянская Премѹ́дрости соломѡ́ни 1 Bible Online

Премѹ́дрости соломѡ́ни 1 - Библия Церковнославянская bible

Премѹ́дрости соломѡ́ни 1

¹Возлюби́те пра́вдѹ, сѹдѧ́щїи зе́млю: мѹ́дрствѹйте ѡ҆ гд҇ѣ въ благосты́ни и҆ въ простотѣ̀ се́рдца взыщи́те є҆го̀:

²ѩ҆́кѡ ѡ҆брѣта́етсѧ не и҆скѹша́ющымъ є҆го̀, ѩ҆влѧ́етсѧ же не невѣ́рѹющымъ є҆мѹ̀.

³Стропти҄ваѧ бо помышлє́нїѧ ѿлѹча́ютъ ѿ бг҃а: и҆скѹша́емаѧ си́ла ѡ҆блича́етъ безѹ́мныхъ.

⁴ѩ҆́кѡ въ ѕлохѹдо́жнѹ дѹ́шѹ не вни́детъ премѹ́дрость, нижѐ ѡ҆бита́етъ въ тѣлесѝ пови́ннѣмъ грѣхѹ̀:

⁵ст҃ы́й бо дх҃ъ наказа́нїѧ ѿбѣжи́тъ льсти́ва и҆ ѿи́метсѧ ѿ помышле́нїй неразѹ́мныхъ и҆ ѡ҆бличи́тсѧ ѿ находѧ́щїѧ непра́вды.

⁶Человѣколюби́въ бо дѹ́хъ премѹ́дрости и҆ не ѡ҆безвини́тъ хѹ́льника ѿ ѹ҆сте́нъ є҆гѡ̀: ѩ҆́кѡ внѹ́треннихъ є҆гѡ̀ свидѣ́тель є҆́сть бг҃ъ и҆ се́рдца є҆гѡ̀ и҆спыта́тель и҆́стиненъ и҆ ѧ҆зы́ка слы́шатель:

⁷ѩ҆́кѡ дх҃ъ гд҇ень и҆спо́лни вселе́ннѹю, и҆ содержа́й всѧ҄ ра́зѹмъ и҆́мать гла́са.

⁸Сегѡ̀ ра́ди вѣща́ѧй непра́вєднаѧ никто́же ѹ҆таи́тсѧ, и҆ не ми́мѡ и҆́детъ є҆гѡ̀ ѡ҆блича́ющь сѹ́дъ.

⁹Въ совѣ́тѣхъ бо нечести́вагѡ и҆стѧза́нїе бѹ́детъ, слове́съ же є҆гѡ̀ слы́шанїе ко гд҇ѹ прїи́детъ во ѡ҆бличе́нїе беззако́нїй є҆гѡ̀:

¹⁰ѩ҆́кѡ ѹ҆́хо рве́нїѧ слы́шитъ всѧ҄, и҆ молва̀ ропта́нїй не кры́етсѧ.

¹¹Храни́тесѧ ѹ҆̀бо ѿ ропта́нїѧ неполе́зна и҆ ѿ ѡ҆болга́нїѧ щади́те ѧ҆зы́къ: ѩ҆́кѡ вѣща́нїе та́йное тщѐ не пре́йдетъ, ѹ҆ста̀ же лжѹ҄щаѧ ѹ҆бива́ютъ дѹ́шѹ.

¹²Не вожделѣ́йте сме́рти въ заблѹжде́нїи живота̀ ва́шегѡ, нижѐ привлека́йте поги́бели дѣла́ми рѹ́къ ва́шихъ:

¹³ѩ҆́кѡ бг҃ъ сме́рти не сотворѝ, ни весели́тсѧ ѡ҆ поги́бели живы́хъ.

¹⁴Созда́ бо во є҆́же бы́ти всѣ҄мъ, и҆ спаси́тєлны бытїѧ҄ мі́ра, ни бо̀ є҆́сть въ ни́хъ врачева́нїѧ гѹби́телнагѡ, нижѐ а҆́дѹ ца́рствїѧ на землѝ.

¹⁵Пра́вда бо безсме́ртна є҆́сть: (непра́вда же сме́рти снабдѣ́нїе:)

¹⁶нечести́вїи же рѹка́ма и҆ словесы̀ призва́ша ю҆̀, дрѹги́ню вмѣни́ша ю҆̀ и҆ и҆ста́ѧша, и҆ завѣ́тъ положи́ша съ не́ю, ѩ҆́кѡ досто́йни сѹ́ть ѻ҆́ноѧ ча́сти бы́ти.