Read Библия Церковнославянская Премѹ́дрости соломѡ́ни 10 Bible Online

Премѹ́дрости соломѡ́ни 10 - Библия Церковнославянская bible

Премѹ́дрости соломѡ́ни 10

¹Сїѧ̀ первозда́ннаго ѻ҆тца̀ мі́рѹ є҆ди́наго созда́ннаго сохранѝ и҆ и҆зведѐ є҆го̀ ѿ грѣха̀ є҆гѡ̀,

²даде́ же є҆мѹ̀ крѣ́пость содержа́ти всѧ́чєскаѧ.

³Ѿстѹпи́въ же ѿ неѧ̀ непра́ведный во гнѣ́вѣ свое́мъ со братоѹбі́йственными поги́бе ѩ҆́ростьми:

⁴є҆гѡ́же ра́ди потоплѧ́емѹ зе́млю па́ки спасѐ премѹ́дрость, ма́лымъ дре́вомъ првдника соблю́дши.

⁵Сїѧ̀ и҆ во є҆диномы́слїи лѹка́вства смѣ́шеныхъ ѩ҆зы́кѡвъ ѡ҆брѣ́те првдника и҆ сохранѝ є҆го̀ непоро́чна бг҃ѹ, и҆ въ поболѣ́нїи ѡ҆ ча́дѣ крѣ́пка соблюдѐ.

⁶Сїѧ̀ првднаго, погиба́ющымъ нечести́вымъ, и҆зба́ви бѣжа́щаго ѿ ѻ҆гнѧ̀ низходѧ́ща на пѧ́ть градѡ́въ:

⁷и҆́хже є҆щѐ свидѣ́телство лѹка́вствїѧ дымѧ́щаѧсѧ стои́тъ землѧ̀ пѹста̀, и҆ несоверше́нными времены̀ плодоносѧ҄щаѧ древеса̀, и҆ невѣ́рныѧ дѹшѝ па́мѧть стоѧ́щь сто́лпъ сла́нъ.

⁸Премѹ́дрость бо мимоходѧ́щїи не то́кмѡ повреди́шасѧ, є҆́же не вѣ́дѣти бла́га, но и҆ безѹ́мїѧ своегѡ̀ ѡ҆ста́виша житїю̀ па́мѧть, да въ ни́хже согрѣши́ша, нижѐ ѹ҆таи́тисѧ возмо́гѹтъ.

⁹Премѹ́дрость же слѹжа́щихъ є҆́й ѿ болѣ́зней и҆зба́ви.

¹⁰Сїѧ̀ бѣжа́щаго ѿ гнѣ́ва бра́тнѧ првдника наста́ви на стєзѝ пра҄вы и҆ показа̀ є҆мѹ̀ цр҇твїе бж҃їе и҆ дадѐ є҆мѹ̀ ра́зѹмъ ст҃ы́хъ, почтѐ є҆го̀ въ трѹдѣ́хъ и҆ ѹ҆мно́жи трѹды̀ є҆гѡ̀.

¹¹Во ѡ҆би́дѣ ѡ҆бдержа́щихъ є҆го̀ предста̀ є҆мѹ̀ и҆ ѡ҆богатѝ є҆го̀,

¹²сохранѝ є҆го̀ ѿ вра҄гъ, и҆ ѿ навѣ́тѹющихъ защитѝ є҆го̀, и҆ по́двигъ крѣ́покъ на побѣ́дѹ дадѐ є҆мѹ̀, да ѹ҆вѣ́сть, ѩ҆́кѡ всѣ́хъ сильнѣ́е є҆́сть бл҃гоче́стїе.

¹³Сїѧ̀ прода́наго првдника не ѡ҆ста́ви, но ѿ грѣха̀ и҆зба́ви є҆го̀: сни́де съ ни́мъ въ ро́въ,

¹⁴и҆ во ѹ҆́захъ не ѡ҆ста́ви є҆го̀, до́ндеже принесѐ є҆мѹ̀ ски́птръ ца́рствїѧ и҆ вла́сть на мѹ́чащихъ є҆го̀: лжи́выхъ же показа̀, поро́къ сотво́ршихъ на́нь, и҆ дадѐ є҆мѹ̀ сла́вѹ вѣ́чнѹю.

¹⁵Сїѧ̀ люде́й преподо́бныхъ и҆ сѣ́мѧ непоро́чное и҆зба́ви ѿ ѩ҆зы҄къ ѡ҆скорблѧ́ющихъ:

¹⁶вни́де въ дѹ́шѹ раба̀ гд҇нѧ и҆ воста̀ проти́вѹ царе́й стра́шныхъ въ чѹдесѣ́хъ и҆ зна́менїихъ.

¹⁷Воздадѐ преподѡ́бнымъ мздѹ̀ трѹдѡ́въ и҆́хъ, наста́ви и҆̀хъ въ пѹ́ть ди́венъ и҆ бы́сть и҆̀мъ въ покро́въ дне́мъ и҆ въ пла́мень ѕвѣ́здъ въ нощѝ.

¹⁸Преведѐ и҆̀хъ но мо́рю чермно́мѹ и҆ проведѐ и҆̀хъ сквозѣ̀ во́дѹ мно́гѹ:

¹⁹враги́ же и҆́хъ потопѝ и҆ и҆з̾ глѹбины̀ бе́здны и҆зри́нѹ и҆̀хъ.

²⁰Сегѡ̀ ра́ди пра́веднїи взѧ́ша кѡры́сти нечести́выхъ и҆ воспѣ́ша, гд҇и, и҆́мѧ ст҃о́е твоѐ, и҆ ѡ҆долѣ́телницѹ рѹ́кѹ твою̀ похвали́ша є҆динодѹ́шнѣ:

²¹ѩ҆́кѡ премѹ́дрость ѿве́рзе ѹ҆ста̀ нѣмы́хъ и҆ ѧ҆зы́ки младе́нцємъ сотворѝ ѩ҆́сны.