Read Библия Церковнославянская Премѹ́дрости соломѡ́ни 11 Bible Online

Премѹ́дрости соломѡ́ни 11 - Библия Церковнославянская bible

Премѹ́дрости соломѡ́ни 11

¹Ѹ҆пра́ви дѣла̀ и҆́хъ рѹко́ю про҇ро́ка ст҃а́гѡ:

²проидо́ша пѹсты́ню неѡбита́ннѹю и҆ въ непроходи́мыхъ водрѹзи́ша кѹ́щы,

³сопроти́вишасѧ сѹпоста́тѡмъ и҆ ѿмсти́ша врагѡ́мъ:

⁴возжада́ша и҆ призва́ша тебѐ, и҆ дана̀ бы́сть и҆̀мъ вода̀ ѿ ка́мене несѣко́магѡ и҆ и҆зцѣле́нїе жа́жды ѿ ка́мене же́стока.

⁵И҆́миже бо нака́зани бы́ша вразѝ и҆́хъ,

⁶си́ми сі́и во ѡ҆скѹдѣ́нїи сѹ́ще благодѣ́телствовани бы́ша:

⁷за и҆сто́чникъ ѹ҆́бѡ пр҇нотекѹ́щїѧ рѣкѝ, кро́вїю и҆злїѧ́нною смѧте́нныѧ,

⁸во ѡ҆бличе́нїе младенцеѹбі́йственнагѡ повелѣ́нїѧ, да́лъ є҆сѝ и҆̀мъ и҆з̾ѻби́лнѹ во́дѹ безнаде́жнѡ,

⁹показа́въ тогда̀ жа́ждею, ка́кѡ проти́вныхъ ѹ҆мѹ́чилъ є҆сѝ.

¹⁰Е҆гда́ бо и҆скѹше́ни бы́ша и҆ въ ми́лости нака́зани, позна́ша, ка́кѡ во гнѣ́вѣ сѹди́мїи нечести́вїи мѹ́чишасѧ:

¹¹си́хъ бо ѩ҆́кѡ ѻ҆ц҃ъ ѹ҆ча́щь и҆скѹси́лъ є҆сѝ, ѻ҆́нѣхъ же ѩ҆́кѡ же́стокъ цр҃ь ѡ҆сѹжда́ѧ и҆стѧза́лъ є҆сѝ.

¹²Ѿстоѧ́щїи же и҆ присѹ́тствѹющїи та́кожде мѹ́чишасѧ:

¹³сѹгѹ́ба бо и҆̀хъ прїѧ́тъ печа́ль и҆ стена́нїе съ па́мѧтїю минѹ́вшихъ.

¹⁴Е҆гда́ бо слы́шахѹ свои́ми мѹчє́нїи благодѣ́йствѹемыхъ ѻ҆́ныхъ, познава́хѹ гд҇а:

¹⁵є҆го́же бо дре́вле во ѿложе́нїи ѿве́ржена ѿреко́шасѧ смѣю́щесѧ, при концы̀ собы́тїѧ ѹ҆диви́шасѧ, неподо́бною пра́вєднымъ томи́ми жа́ждею.

¹⁶За помышлє́нїѧ же безѹ҄мнаѧ непра́вды и҆́хъ, въ ни́хже заблѹди́вше почита́хѹ безсловє́снаѧ пресмыка҄ющаѧсѧ и҆ ѕвѣре́й хѹды́хъ, посла́лъ є҆сѝ и҆̀мъ мно́жество безслове́сныхъ живо́тныхъ во ѿмще́нїе,

¹⁷да позна́ютъ, ѩ҆́кѡ и҆́миже кто̀ согрѣша́етъ, си́ми и҆ мѹ́читсѧ.

¹⁸Не неможа́ше бо всеси́льнаѧ рѹка̀ твоѧ̀, ѩ҆́же сотворѝ мі́ръ ѿ без̾ѡбра́знагѡ вещества̀, посла́ти на ни́хъ мно́жество медвѣ́дей, и҆лѝ лю́тыхъ львѡ́въ,

¹⁹и҆лѝ новосозда́нныхъ ѩ҆́рости и҆спо́лненыхъ ѕвѣре́й незна́емыхъ, и҆лѝ ѻ҆́гненнымъ ды́шѹщихъ дѹ́хомъ, и҆лѝ ѕлосмра́дный произносѧ́щихъ ды́мъ, и҆лѝ стра҄шныѧ и҆з̾ ѻ҆че́й и҆́скры и҆спѹска́ющихъ:

²⁰и҆́хже не то́кмѡ вре́дъ можа́ше и҆стреби́ти ѧ҆̀, но и҆ зра́къ ѹ҆страша́ющь погѹби́ти.

²¹И҆ без̾ тѣ́хъ, є҆ди́нымъ дѹ́хомъ па́сти мого́ша, ѿ сѹда̀ гони́ми и҆ развѣ́ѧни ѿ дх҃а си́лы твоеѧ̀: но всѧ҄ мѣ́рою и҆ число́мъ и҆ вѣ́сомъ расположи́лъ є҆сѝ.

²²Е҆́же бо мно́гѡ мощѝ, присѹ́тствѹетъ тебѣ̀ всегда̀, и҆ держа́вѣ мы́шцы твоеѧ̀ кто̀ сопроти́витсѧ;

²³Поне́же, ѩ҆́коже стра́жикъ въ превѣ́сѣхъ, (та́кѡ) ве́сь мі́ръ пред̾ тобо́ю, и҆ ѩ҆́кѡ ка́плѧ росы̀ ѹ҆́треннїѧ, сходѧ́щїѧ на зе́млю.

²⁴Ми́лѹеши же всѣ́хъ, ѩ҆́кѡ всѧ҄ мо́жеши, и҆ презира́еши грѣхѝ человѣ́кѡмъ въ покаѧ́нїе.

²⁵Лю́биши же сѹ҄щаѧ всѧ҄, и҆ ни чесогѡ́же гнѹша́ешисѧ, ѩ҆̀же сотвори́лъ є҆сѝ: ниже́ бо ненави́дѧ что̀ ѹ҆стро́илъ є҆сѝ.

²⁶Ка́кѡ же пребы́ло бы что̀, а҆́ще бы ты̀ не и҆зво́лилъ є҆сѝ; и҆лѝ, є҆́же не нарѣче́но ѿ тебє̀, сохрани́лосѧ бы;

²⁷Щади́ши же всѧ҄, ѩ҆́кѡ твоѧ҄ сѹ́ть, влдко дш҃елю́бче!