Read Библия Церковнославянская Премѹ́дрости соломѡ́ни 12 Bible Online

Премѹ́дрости соломѡ́ни 12 - Библия Церковнославянская bible

Премѹ́дрости соломѡ́ни 12

¹Нетлѣ́нный бо дх҃ъ тво́й є҆́сть во всѣ́хъ.

²Тѣ́мже заблѹжда́ющихъ пома́лѹ ѡ҆блича́еши, и҆ въ ни́хже согрѣша́ютъ, воспомина́ѧ ѹ҆чи́ши, да премѣни́вшесѧ ѿ ѕло́бы вѣ́рѹютъ въ тѧ̀, гд҇и.

³И҆ дре́внихъ бо ѡ҆бита́телей землѝ ст҃ы́ѧ твоеѧ̀ возненави́дѣвъ,

⁴ра́ди дѣѧ́нїй ѕлы́хъ волшве́нїй, ѩ҆̀же творѧ́хѹ, и҆ же́ртвъ непреподо́бныхъ,

⁵и҆ чадоѹбі́йцъ неми́лостивыхъ, и҆ ѹ҆тробоѧ́дцєвъ человѣ́ческихъ пло́тей, и҆ кровопі́йцєвъ ѿ среды̀ ст҃ы́ни твоеѧ̀,

⁶и҆ роди́телей ѹ҆би́вшихъ дѹ́шы безпомѡ́щныѧ, восхотѣ́лъ є҆сѝ погѹби́ти рѹка́ми ѻ҆тє́цъ на́шихъ:

⁷да досто́йное прїи́метъ преселе́нїе ѻ҆трокѡ́въ бж҃їихъ, ѩ҆́же ѹ҆ тебє̀ всѣ́хъ дража́йшаѧ землѧ̀.

⁸Но и҆ си́хъ ѩ҆́кѡ человѣ́кѡвъ пощади́лъ є҆сѝ, посла́лъ же є҆сѝ предтекѹ́щыѧ во́инства твоегѡ̀ ѻ҆́сы, ѩ҆́кѡ да тѣ́хъ пома́лѹ и҆стребѧ́тъ.

⁹Не неси́ленъ є҆сѝ во бра́ни покори́ти нечести́выхъ пра́вєднымъ, и҆лѝ ѕвѣ́ремъ свирѣ҄пымъ, и҆лѝ сло́вомъ же́стокимъ до є҆ди́нагѡ потреби́ти:

¹⁰сѹдѧ́щь же пома́лѹ дава́лъ є҆сѝ мѣ́сто покаѧ́нїю, не невѣ́дѧй, ѩ҆́кѡ лѹка́въ ро́дъ и҆́хъ и҆ є҆сте́ственнаѧ ѕло́ба и҆́хъ, и҆ ѩ҆́кѡ не премѣни́тсѧ помышле́нїе и҆́хъ во вѣ́къ.

¹¹Сѣ́мѧ бо бѣ̀ про́клѧто ѿ нача́ла: нижѐ боѧ́йсѧ когѡ̀, ѿпѹще́нїе даѧ́лъ є҆сѝ грѣхѡ́мъ и҆́хъ.

¹²Кто́ бо рече́тъ (тебѣ̀): что̀ сотвори́лъ є҆сѝ; И҆лѝ кто̀ ста́нетъ проти́вѹ сѹдѹ̀ твоемѹ̀; кто́ же и҆стѧ́жетъ тѧ̀ ѡ҆ ѩ҆зы́цѣхъ поги́бшихъ, и҆̀хже ты̀ сотвори́лъ є҆сѝ; и҆лѝ кто̀ въ предста́телство тебѣ̀ прїи́детъ, ѿмсти́тель на непра́вєдныѧ человѣ́ки;

¹³Нѣ́сть бо и҆́нъ бг҃ъ ра́звѣ тебє̀, и҆́же ради́ши ѡ҆ всѣ́хъ, да пока́жеши, ѩ҆́кѡ не непра́вѡ сѹди́лъ є҆сѝ.

¹⁴Нижѐ ца́рь, и҆лѝ мѹчи́тель проти́вѹ тебє̀ воззрѣ́ти мо́жетъ, ѡ҆ и҆́хже погѹби́лъ є҆сѝ.

¹⁵Првднъ же сы́й, првднѡ всѧ҄ ѹ҆правлѧ́еши, недо́лжнаго же мѹ́читисѧ ѡ҆сѹди́ти чѹ́ждо мни́ши твоеѧ̀ си́лы.

¹⁶Крѣ́пость бо твоѧ̀ пра́вды нача́ло и҆ є҆́же над̾ всѣ́ми твоѐ влдчество, всѣ́хъ щадѣ́ти твори́тъ.

¹⁷Крѣ́пость бо показѹ́еши невѣ́рѹющымъ ѡ҆ соверше́нствѣ си́лы, а҆ въ вѣ́дѹщихъ де́рзость ѡ҆блича́еши.

¹⁸Ты́ же влдчествѹѧй си́лою въ кро́тости сѹ́диши и҆ съ вели́кимъ щадѣ́нїемъ разсмотрѧ́еши на́съ: съ тобо́ю бо є҆́сть, є҆гда̀ хо́щеши, є҆́же мощѝ.

¹⁹Наѹчи́лъ же є҆сѝ лю́ди твоѧ҄ сицевы́ми дѣ́лы, ѩ҆́кѡ подоба́етъ пра́ведномѹ бы́ти человѣколю́бцѹ, и҆ благонадє́жны сотвори́лъ є҆сѝ сн҃ы твоѧ҄, ѩ҆́кѡ дае́ши ѡ҆ грѣсѣ́хъ покаѧ́нїе.

²⁰А҆́ще бо врагѝ ѻ҆трокѡ́въ твои́хъ и҆ до́лжныхъ сме́рти съ толи́кимъ мѹ́чилъ є҆сѝ внѧ́тїемъ и҆ щадѣ́нїемъ, даѧ́й времена̀ и҆ мѣ́сто, и҆́миже бы и҆змѣни́лисѧ ѿ ѕло́бы:

²¹съ коли́кимъ прилѣжа́нїемъ сѹди́лъ є҆сѝ сн҃ы твоѧ҄, и҆́хже ѻ҆тцє́мъ клѧ҄твы и҆ завѣ́ты да́лъ є҆сѝ благи́хъ ѡ҆бѣща́нїй.

²²На́съ ѹ҆̀бо наказѹ́ѧ, врагѝ на́шѧ тма́ми бїе́ши, да бл҃госты́ню твою̀ помышлѧ́емъ сѹдѧ́ще, сѹди́ми же ча́емъ ми́лости.

²³Ѿѻнѹ́дѹже и҆ непра́ведныхъ, во безѹ́мїи пожи́вшихъ живо́тъ, сво́йственными и҆́хъ ме́рзостьми мѹ́чилъ є҆сѝ,

²⁴и҆́бо въ пѹте́хъ заблѹжде́нїѧ должа́е заблѹди́ша, бо́ги мнѧ́ще, ѩ҆̀же и҆ во живо́тныхъ вра́жїихъ безчє́стна, а҆́ки младе́нцы безѹ́мнїи прельсти́вшесѧ.

²⁵Сегѡ̀ ра́ди ѩ҆́кѡ ѻ҆трокѡ́мъ несмы́слєннымъ сѹ́дъ въ порѹга́нїе посла́лъ є҆сѝ:

²⁶и҆̀же порѹга́ньми преще́нїѧ не наказа́вшесѧ, досто́йна сѹда̀ бж҃їѧ и҆скѹ́сѧтъ.

²⁷Въ ни́хже бо ті́и стра́ждѹще негодова́хѹ, въ си́хъ, и҆̀хже мнѧ́хѹ бы́ти бо́ги, въ тѣ́хъ мѹ́чими, ви́дѧще є҆го́же пре́жде ѿмета́хѹсѧ зна́ти,

²⁸бг҃а и҆́стиннаго позна́ша: тѣ́мже и҆ коне́цъ ѡ҆сѹжде́нїѧ прїи́де на нѧ̀.