Read Библия Церковнославянская Премѹ́дрости соломѡ́ни 13 Bible Online

Премѹ́дрости соломѡ́ни 13 - Библия Церковнославянская bible

Премѹ́дрости соломѡ́ни 13

¹Сѹ́етни ѹ҆̀бо всѝ человѣ́цы є҆сте́ственнѣ, въ ни́хже ѡ҆брѣта́етсѧ невѣ́дѣнїе ѡ҆ бз҃ѣ, и҆ ѿ ви́димыхъ бла҄гъ не возмого́ша ѹ҆разѹмѣ́ти сѹ́щаго, ни дѣлѡ́мъ вне́млюще позна́ша хитреца̀:

²но и҆лѝ ѻ҆́гнь, и҆лѝ дѹ́хъ, и҆лѝ ско́ръ воздѹ́хъ, и҆лѝ крѹ́гъ ѕвѣ́здный, и҆лѝ ѕѣ́лнѹю во́дѹ, и҆лѝ свѣти҄ла небє́снаѧ, строи́тєли мі́рѹ бо́ги (бы́ти) возмнѣ́ша.

³И҆́хже а҆́ще ѹ҆́бѡ красото́ю ѹ҆слажда́ющесѧ, сїѧ҄ бо́ги возмнѣ́ша, да ѹ҆вѣ́дѧтъ, коли́кѡ си́хъ влдка є҆́сть лѹ́чшїй: красоты́ бо родонача́лникъ созда̀ ѧ҆̀.

⁴А҆́ще же си́лѣ и҆ дѣ́йствїю ѹ҆диви́шасѧ, да ѹ҆разѹмѣ́ютъ ѿ ни́хъ, коли́кѡ сотвори́вый сїѧ҄ си́льнѣйшїй є҆́сть:

⁵ѿ вели́чества бо красоты̀ созда́нїй сравни́телнѡ рододѣ́латель и҆́хъ познава́етсѧ.

⁶Но ѻ҆ба́че на си́хъ є҆́сть ѹ҆ничиже́нїе ма́ло, и҆́бо са́ми сі́и не́гли прельща́ютсѧ, бг҃а и҆́щѹще и҆ хотѧ́ще ѡ҆брѣстѝ:

⁷въ дѣ́лѣхъ бо є҆гѡ̀ живѹ́ще и҆зслѣ́дѹютъ и҆ ѹ҆вѣщава́ютсѧ зра́комъ, ѩ҆́кѡ бла҄га ви҄димаѧ.

⁸Па́ки нижѐ сі́и проще́нїѧ досто́йни:

⁹а҆́ще бо толи́кѡ возмого́ша вѣ́дѣти, да возмо́гѹтъ ѹ҆разѹмѣ́ти вѣ́къ, си́хъ же влдкѹ ка́кѡ скорѣ́е не ѡ҆брѣто́ша;

¹⁰Ѡ҆каѧ́нни же сѹ́ть, и҆ въ ме́ртвыхъ ѹ҆пова҄нїѧ и҆́хъ, и҆̀же назва́ша бо́ги дѣла̀ рѹ́къ человѣ́ческихъ, зла́то и҆ сребро̀, хи́трости ѹ҆мышле́нїе, и҆ подѡ́бїѧ живо́тныхъ, и҆лѝ ка́менїе неключи́мо, дѣ́ло рѹкѝ дре́внїѧ.

¹¹А҆́ще же кто̀ дровосѣ́чецъ тектѡ́нъ, ѹ҆го́дное дре́во ѿсѣ́къ, ѡ҆те́шетъ благохѹдо́жнѣ всю̀ корѹ̀ є҆гѡ̀, и҆ хи́трствѹѧ благолѣ́пнѣ сотвори́тъ ѹ҆го́денъ сосѹ́дъ во ѹ҆потребле́нїе житїѧ̀,

¹²ѡ҆ста́нки же дѣ́ла на ѹ҆гото́ванїе бра́шна и҆знѹри́въ насы́тисѧ:

¹³ѡ҆ста́нокъ же и҆́же ѿ ни́хъ ни во что̀ благопотре́бенъ, дре́во кри́во и҆ сѹ́чїѧ по́лно, прїи́мъ и҆зваѧ̀ съ прилѣжа́нїемъ пра́здности своеѧ̀ и҆ и҆скѹ́сствомъ ра́зѹма и҆з̾ѡбразѝ є҆го̀, и҆ ѹ҆подо́би є҆го̀ ѡ҆́бразѹ человѣ́чѹ,

¹⁴и҆лѝ нѣ́коемѹ живо́тномѹ ничто́жномѹ ѹ҆подо́би є҆го̀, пома́завъ ша́рами разли́чными и҆ ѡ҆червлени́въ ви́дъ є҆гѡ̀, и҆ всѧ́къ поро́къ, и҆́же на не́мъ є҆́сть, и҆зма́завъ,

¹⁵и҆ сотвори́въ є҆мѹ̀ досто́йное є҆гѡ̀ ѡ҆бита́нїе, на стѣнѣ̀ поста́ви є҆̀, ѹ҆крѣпи́въ желѣ́зомъ.

¹⁶Да не ѹ҆́бѡ паде́тъ, пред̾ѹмы́сли ѡ҆ не́мъ, вѣ́дый, ѩ҆́кѡ не мо́жетъ помощѝ себѣ̀: и҆́бо їдѡлъ є҆́сть и҆ тре́бѹетъ по́мощи.

¹⁷Ѡ҆ стѧжа́нїихъ же и҆ ѡ҆ бра́цѣхъ и҆ ча́дѣхъ свои́хъ молѧ́сѧ, не стыди́тсѧ къ бездѹ́шномѹ глаго́лѧ,

¹⁸и҆ ѡ҆ здра́вїи ѹ҆́бѡ немощно́е призыва́етъ, и҆ ѡ҆ животѣ̀ ме́ртвое мо́литъ, и҆ въ по́мощь неключи́мое призыва́етъ,

¹⁹и҆ ѡ҆ пѹтеше́ствїи (про́ситъ) нижѐ ходи́ти могѹ́щаго, и҆ ѡ҆ притѧжа́нїи и҆ дѣѧ́нїи и҆ ѡ҆ рѹ́къ подтвержде́нїи некрѣ́пкаго рѹка́ми, мѹ́жества про́ситъ ѿ тогѡ̀, є҆́же всѣ́хъ є҆́сть немощнѣ́йшее.