Read Библия Церковнославянская Премѹ́дрости соломѡ́ни 14 Bible Online

Премѹ́дрости соломѡ́ни 14 - Библия Церковнославянская bible

Премѹ́дрости соломѡ́ни 14

¹Плы́ти па́ки кто̀ помы́сливъ и҆ сверѣ҄пыѧ вѡ́лны преходи́ти, носѧ́щагѡ є҆го̀ кораблѧ̀ тлѣ́ннѣйшее дре́во призыва́етъ:

²ѻ҆́ное бо жела́нїе пристѧжа́нїй ѹ҆мы́сли, хитре́цъ же мѹ́дростїю содѣ́ла:

³тво́й же, ѻ҆́ч҃е, ѹ҆строѧ́етъ про́мыслъ: ѩ҆́кѡ да́лъ є҆сѝ и҆ въ мо́ри пѹ́ть и҆ въ волна́хъ стезю̀ крѣ́пкѹю,

⁴показѹ́ѧ, ѩ҆́кѡ си́ленъ є҆сѝ ѿ всѧ́кагѡ сп҇тѝ, а҆́ще и҆ без̾ хѹдо́жества кто̀ взы́детъ.

⁵Хо́щеши же, да не бѹ́дѹтъ пра҄здна дѣла̀ премдрости твоеѧ̀: сегѡ̀ ра́ди и҆ малѣ́йшемѹ дре́вѹ ввѣрѧ́ютъ человѣ́цы дѹ́шы (своѧ҄), и҆ преходѧ́ще вѡ́лны кораблеце́мъ и҆зба́влени сѹ́ть.

⁶И҆ ѿ нача́ла бо, є҆гда̀ погиба́хѹ го́рдїи и҆споли́ни, ѹ҆пова́нїе мі́ра въ кораблецѣ̀ и҆збѣжа́вшее, ѡ҆ста́ви вѣ́кѹ сѣ́мѧ рожде́нїѧ, рѹко́ю твое́ю ѹ҆стро́ено.

⁷Благослове́но бо дре́во, и҆́мже быва́етъ пра́вда.

⁸Рѹкотворе́нное же про́клѧто є҆́сть, и҆ сотвори́вый є҆̀: ѩ҆́кѡ ѻ҆́въ ѹ҆́бѡ содѣ́ла, сїе́ же тлѣ́нное бо́гомъ и҆менова́сѧ.

⁹Въ ра́внѣ бо ненави҄дима сѹ́ть бг҃ѹ и҆ нече́ствѹѧй, и҆ нече́стїе є҆гѡ̀:

¹⁰и҆́бо сотворе́ное съ сотво́ршимъ мѹ́чимо бѹ́детъ.

¹¹Сегѡ̀ ра́ди и҆ во їдѡлѣхъ ѩ҆зы́ческихъ бѹ́детъ ка́знь, ѩ҆́кѡ въ созда́нїи бж҃їи въ ме́рзость сотворе́ни сѹ́ть и҆ въ собла́зны дѹша́мъ человѣ́чєскимъ и҆ въ сѣ́ть нога́мъ бѹ́ихъ.

¹²Нача́ло бо блѹже́нїѧ ѹ҆мышле́нїе їдѡлѡвъ: и҆з̾ѡбрѣ́тенїе же и҆́хъ тлѣ́нїе живота̀.

¹³Ниже́ бо бы́ша ѿ нача́ла, нижѐ бѹ́дѹтъ во вѣ́ки:

¹⁴тщесла́вїемъ бо человѣ́ческимъ внидо́ша въ мі́ръ, и҆ сегѡ̀ ра́ди кра́токъ и҆́хъ коне́цъ вмѣни́сѧ.

¹⁵Го́рькимъ бо пла́чемъ сѣ́тѹѧ ѻ҆те́цъ ско́рѡ восхище́нагѡ ча́да ѡ҆́бразъ сотвори́въ, є҆го́же тогда̀ человѣ́ка ме́ртва, нн҃ѣ ѩ҆́кѡ бо́га почтѐ: и҆ предадѐ подрѹ҄чнымъ та҄йны и҆ жє́ртвы:

¹⁶пото́мъ вре́менемъ возмо́гшїй нечести́вый ѡ҆бы́чай, а҆́ки зако́нъ храни́мь бы́сть, и҆ мѹчи́телей повелѣ́нїемъ почита́єма бѧ́хѹ и҆зва҄ѧннаѧ:

¹⁷и҆̀хже въ лицѐ не могѹ́ще чествова́ти человѣ́цы да́льнагѡ ра́ди ѡ҆бита́нїѧ, и҆здале́ча лицѐ и҆з̾ѡбрази́вше, ѩ҆́вный ѡ҆́бразъ почита́емагѡ царѧ̀ сотвори́ша, ѩ҆́кѡ да ѿстоѧ́щаго а҆́ки бли́з̾ сѹ́щаго ласка́ютъ со прилѣжа́нїемъ.

¹⁸Въ продолже́нїе же ѕлоче́стїѧ и҆ не разѹмѣ́ющихъ принѹ́ди хѹдо́жниково любоче́стїе.

¹⁹Се́й бо хотѧ̀ ѹ҆годи́ти держа́вствѹющемѹ, произведѐ хи́тростїю (свое́ю) подо́бїе на лѹ́чшее:

²⁰мно́жество же человѣ҄къ, привлече́но благоѡбра́зїемъ дѣ́ла, пре́жде вма́лѣ чествова́наго человѣ́ка нн҃ѣ въ бо́га вмѣни́ша.

²¹И҆ сїѐ бы́сть житїю̀ въ прельще́нїе, ѩ҆́кѡ и҆лѝ ѕлоключе́нїю, и҆лѝ мѹчи́телствѹ послѹжи́вше человѣ́цы, несоѻ́бщно и҆́мѧ ка́менїю и҆ древа́мъ ѡ҆бложи́ша.

²²Посе́мъ не дово́лно бѣ̀ прельща́тисѧ ѡ҆ бж҃їи ра́зѹмѣ, но и҆ въ вели́цѣй живѹ́ще безѹ́мїѧ бра́ни, толи҄каѧ ѕла҄ѧ мі́ръ и҆менѹ́ютъ.

²³И҆́бо и҆лѝ дѣтоѹбі́йствєнныѧ жє́ртвы, и҆лѝ сокровє́нныѧ та҄йны, и҆лѝ неи́стѡвныѧ ѿ и҆ны́хъ зако́нѡвъ пи́ршєства творѧ́ше,

²⁴нижѐ житїѧ̀, нижѐ бра́кѡвъ чи́стыхъ є҆щѐ хранѧ́тъ: є҆ди́нъ же дрѹга́го и҆лѝ навѣ́томъ ѹ҆бива́етъ, и҆лѝ блѹдѧ̀ ѡ҆скорблѧ́етъ.

²⁵Всѧ҄ же смѣ́шєна сѹ́ть, кро́вь и҆ ѹ҆бі́йство, татьба̀ и҆ ле́сть, растлѣ́нїе, невѣ́рство, смѧте́нїе, заклина́нїе, молва̀ благи́хъ,

²⁶благода́ти забве́нїе, дѹша́мъ ѡ҆скверне́нїе, рожде́нїю премѣне́нїе, бра́кѡвъ безчи́нїе, прелюбодѣѧ́нїе и҆ стѹдодѣѧ́нїе.

²⁷Недосто́йныхъ бо и҆́мене їдѡлѡвъ слѹже́нїе нача́ло всѧ́кагѡ ѕла̀, и҆ вина̀ и҆ коне́цъ є҆́сть:

²⁸и҆́бо и҆лѝ веселѧ́щесѧ неи́стовствѹютъ, и҆лѝ проро́чествѹютъ лѡ́жнаѧ, и҆лѝ живѹ́тъ непра́веднѣ, и҆лѝ кленѹ́тсѧ ско́рѡ.

²⁹На бездѹ҄шныѧ бо їдѡлы надѣ́ющесѧ, ѕлѣ̀ кленѹ́щесѧ казни́ми бы́ти не ча́ютъ.

³⁰За ѻ҆боѧ́ же на ни́хъ прїи́детъ сѹ́дъ: поне́же ѕлѣ̀ мѹ́дрствоваша ѡ҆ бз҃ѣ, вне́млюще їдѡлѡмъ, и҆ непра́веднѡ клѧ́шасѧ ле́стїю, презрѣ́вше преподо́бїе.

³¹Не бо̀ си́ла кленѹ́щихъ, но согрѣша́ющымъ сѹ́дъ нахо́дитъ всегда̀ на престѹпле́нїе непра́ведныхъ.