Read Библия Церковнославянская Премѹ́дрости соломѡ́ни 15 Bible Online

Премѹ́дрости соломѡ́ни 15 - Библия Церковнославянская bible

Премѹ́дрости соломѡ́ни 15

¹Ты́ же бг҃ъ на́шъ бл҃гъ и҆ и҆́стиненъ, долготерпѣли́въ и҆ въ мл҇ти ѹ҆правлѧ́ѧй всѧ҄.

²И҆́бо а҆́ще согрѣши́мъ, твоѝ є҆смы̀, вѣ́дѹще держа́вѹ твою̀: и҆ а҆́ще не согрѣши́мъ, вѣ́мы, ѩ҆́кѡ тебѣ̀ вмѣни́хомсѧ.

³Е҆́же бо зна́ти тебѐ, всесоверше́на (є҆́сть) пра́вда, и҆ вѣ́дѣти держа́вѹ твою̀, ко́рень є҆́сть безсме́ртїѧ.

⁴Ниже́ бо прельстѝ на́съ человѣ́ческое ѕлохи́трое ѹ҆мышле́нїе, нижѐ сѣннопи́саныхъ трѹ́дъ безпло́дный, ви́дъ и҆зва́ѧнъ разли́чными ша҄ры,

⁵и҆́хже зра́къ безѹ҄мнымъ прихо́дитъ въ похотѣ́нїе, и҆ лю́бѧтъ ме́ртвагѡ ѡ҆́браза ви́дъ бездѹ́шный.

⁶Ѕлы́хъ люби́телїе досто́йнїи таковы́хъ наде́ждъ и҆ творѧ́щїи, и҆ лю́бѧщїи, и҆ чествѹ́ющїи.

⁷И҆́бо скѹде́льникъ, мѧ́гкѹю зе́млю мнѹ́щь со трѹдо́мъ, дѣ́лаетъ ко слѹже́нїю на́шемѹ ко́еждо: но ѿ тогѡ́жде бре́нїѧ созда̀ и҆ ѩ҆̀же чи́стыхъ дѣ́лъ слѹжє́бныѧ сосѹ́ды, и҆ сопроти҄вныѧ, всѧ҄ подо́бнѣ: си́хъ же ѻ҆бои́хъ коегѡ́ждо є҆́сть ѹ҆потребле́нїе, сѹдїѧ̀ є҆́сть бренодѣ́латель.

⁸И҆ ѕлотрѹ́дникъ бо́га сѹ́етна ѿ тогѡ́жде твори́тъ бре́нїѧ, и҆́же ма́лѡ пре́жде ѿ землѝ сотворе́нъ бы́въ, по ма́лѣ и҆́детъ, и҆з̾ неѧ́же взѧ́тъ бы́сть, и҆стѧ́занъ ѡ҆ дѹше́внѣмъ долзѣ̀.

⁹Но є҆́сть є҆мѹ̀ прилѣжа́нїе, не ѩ҆́кѡ и҆́мать трѹди́тисѧ, нижѐ ѩ҆́кѡ краткоконе́чно житїѐ и҆́мать: но ревнѹ́етъ златодѣ́лателємъ и҆ сребролїѧ́телємъ, и҆ мѣ́ди дѣ́лателємъ подража́етъ, и҆ сла́вѹ мни́тъ, ѩ҆́кѡ сквє́рнаѧ дѣ́лаетъ.

¹⁰Пе́пелъ бо є҆́сть се́рдце є҆гѡ̀, и҆ землѝ хѹ́ждше ѹ҆пова́нїе є҆гѡ̀, и҆ бре́нїѧ безче́стнѣе живо́тъ є҆гѡ̀:

¹¹ѩ҆́кѡ не ѹ҆вѣ́дѣ созда́вшагѡ є҆го̀, и҆ вдохнѹ́вшагѡ є҆мѹ̀ дѹ́шѹ дѣйстви́тельнѹю, и҆ вдѹ́нѹвшагѡ дѹ́хъ живо́тный.

¹²Но вмѣни́ша и҆гра́лище бы́ти живо́тъ на́шъ, и҆ житїѐ всѐ ѹ҆пражне́но на приѡбрѣ́тенїе: и҆́бо глаго́лютъ, ѩ҆́кѡ подоба́етъ ѿкѹ́дѹ либо, а҆́ще и҆ ѿ ѕла̀, приѡбрѣта́ти.

¹³Се́й бо па́че всѣ́хъ вѣ́сть, ѩ҆́кѡ согрѣша́етъ, ѿ вещества̀ землена́гѡ ѹ҆дѡ́бныѧ къ сокрѹше́нїю сосѹ́ды и҆ и҆зваѧ҄нїѧ содѣва́ѧй.

¹⁴Вси́ же пребезѹ́мнѣйшїи и҆ ѡ҆каѧ́ннѣйшїи, па́че дѹшѝ младе́нческїѧ, вразѝ люді́й твои́хъ ѡ҆блада́вшїи и҆́ми:

¹⁵ѩ҆́кѡ всѧ҄ їдѡлы ѩ҆зы́чєски вмѣни́ша въ бо́ги, и҆̀мже нижѐ ѻ҆че́съ ѹ҆потребле́нїе ко зрѣ́нїю, нижѐ но́здри въ привлече́нїе а҆́ера, нижѐ ѹ҆́ши слы́шати, нижѐ пе́рсты рѹ́къ во ѡ҆сѧза́нїе, и҆ но́ги и҆́хъ пра҄здны ко хожде́нїю.

¹⁶Человѣ́къ бо сотворѝ и҆̀хъ, и҆ дѹ́ха взаи́мъ взѧ́въ созда̀ и҆̀хъ: ни є҆ди́нъ бо человѣ́къ мо́жетъ себѣ̀ подо́бна бо́га созда́ти:

¹⁷сме́ртенъ же сы́й ме́ртва дѣ́лаетъ рѹка́ма беззако́нныма: лѹ́чшїй бо є҆́сть їдѡлѡвъ свои́хъ: (ѩ҆́кѡ) се́й ѹ҆́бѡ поживѐ, ѻ҆́нїи же никогда̀.

¹⁸И҆ живо́тныхъ ме́рзкихъ чтѹ́тъ: безѹ҄мнаѧ бо сравнѧ́ємаѧ и҆ны́хъ сѹ́ть хѹ́ждша.

¹⁹Нижѐ є҆ли́кѡ вожделѣ́ти ѩ҆́кѡ въ лицы̀ живо́тныхъ бла҄га сѹ́ть, ѿбѣго́ша же и҆ бж҃їѧ хвалы̀ и҆ блг҇ве́нїѧ є҆гѡ̀.