Read Библия Церковнославянская Премѹ́дрости соломѡ́ни 16 Bible Online

Премѹ́дрости соломѡ́ни 16 - Библия Церковнославянская bible

Премѹ́дрости соломѡ́ни 16

¹Сегѡ̀ ра́ди ѿ подо́бныхъ пострада́ша досто́йнѣ, и҆ мно́жествомъ ѕвѣре́й казне́ни бы́ша.

²Вмѣ́стѡ мѹче́нїѧ бла́го сотвори́лъ є҆сѝ лю́демъ твои҄мъ, въ похотѣ́нїе жела́нїѧ стра́нное вкѹше́нїе, пи́щѹ ѹ҆гото́валъ є҆сѝ кра́стєли,

³да ѻ҆́ни ѹ҆́бѡ вожделѣ́вшїи пи́щи, показа́нїемъ по́сланыхъ, и҆ ѿ нѹ́жнагѡ хотѣ́нїѧ ѿвратѧ́тсѧ, сі́и же вма́лѣ скѹ́дни бы́вше, и҆ стра́нна приѡбща́тсѧ вкѹше́нїѧ.

⁴Подоба́ше бо на ѻ҆́ныхъ ѹ҆́бѡ неизбѣ́жнѣй нищетѣ̀ наитѝ мѹчи́телствѹющихъ, си҄мъ же то́кмѡ показа́ти, ка́кѡ вразѝ и҆́хъ мѹ́чишасѧ.

⁵И҆́бо є҆гда̀ тѣ҄мъ на́йде же́стокъ ѕвѣре́й гнѣ́въ, и҆ ѹ҆грызе́ньми сверѣ́пыхъ и҆стреблѧ́хѹсѧ ѕмїє́въ,

⁶но не до конца̀ пребы́сть гнѣ́въ тво́й: въ наказа́нїе же вма́лѣ смѹще́ни бы́ша, зна́менїе и҆мѣ́юще спасе́нїѧ, на воспомина́нїе за́повѣди зако́на твоегѡ̀:

⁷ѡ҆брати́выйсѧ бо не (ве́щїю) зри́мою цѣлѧ́шесѧ, но тобо́ю всѣ́хъ сп҃си́телемъ.

⁸И҆ въ се́мъ же показа́лъ є҆сѝ врагѡ́мъ на́шымъ, ѩ҆́кѡ ты̀ є҆сѝ и҆збавлѧ́ѧй ѿ всѧ́кагѡ ѕла̀:

⁹тѣ́хъ бо а҆крї҄ды и҆ мѹ҄хи поби́ша ѹ҆грызе́нїемъ, и҆ не ѡ҆брѣ́тесѧ цѣльба̀ дѹша́мъ и҆́хъ, ѩ҆́кѡ досто́йни бѧ́хѹ ѿ таковы́хъ мѹ́читисѧ.

¹⁰Сынѡ́въ же твои́хъ нижѐ ѩ҆дови́тыхъ ѕмїє́въ зѹ́бы ѡ҆долѣ́ша: мл҇ть бо твоѧ̀ прихожда́ше и҆ и҆зцѣлѧ́ше и҆̀хъ.

¹¹Въ па́мѧть бо слове́съ твои́хъ бѧ́хѹ ѹ҆сѣ́чени и҆ ско́рѡ и҆зцѣлѧ́хѹсѧ, да не во глѹбинѹ̀ впа́дше забве́нїѧ ѿлѹча́тсѧ твоегѡ̀ бл҃годѣѧ́нїѧ:

¹²ниже́ бо ѕе́лїе, нижѐ ѡ҆бѧза́нїе и҆зцѣлѝ и҆̀хъ, но сло́во твоѐ, гд҇и, и҆зцѣлѧ́ющее всѧ҄.

¹³Ты́ бо живота̀ и҆ сме́рти вла́сть и҆́маши, и҆ низво́диши да́же до вра́тъ а҆́да, и҆ возво́диши.

¹⁴Человѣ́къ же ѹ҆бива́етъ ѹ҆́бѡ ѕло́бою свое́ю: и҆зше́дшагѡ же дѹ́ха не возврати́тъ, нижѐ па́ки призыва́етъ дѹ́шѹ взѧ́тѹю.

¹⁵Твоеѧ́ же рѹкѝ и҆збѣжа́ти невозмо́жно є҆́сть:

¹⁶ѿмета́ющїисѧ бо тебѐ вѣ́дѣти нечести́вїи, въ крѣ́пости мы́шцы твоеѧ̀ бїе́ни бы́ша стра́нными дождьмѝ и҆ гра́дами, и҆ бѹ́рѧми гони́ми неизбѣ́жнѡ, и҆ ѻ҆гне́мъ растаева́еми.

¹⁷Пресла́вное бо, въ водѣ̀ всѧ҄ ѹ҆гаша́ющей мно́жае дѣ́йствоваше ѻ҆́гнь: спобо́рникъ бо є҆́сть мі́ръ ѡ҆ пра́ведныхъ.

¹⁸Ѻ҆вогда́ бо ѹ҆́бѡ ѹ҆кроща́шесѧ пла́мень, да не сожже́тъ по́сланныхъ живо́тныхъ на нечєсти́выѧ: но сі́и зрѧ́ще да вѣ́дѧтъ, ѩ҆́кѡ ѿ бж҃їѧ сѹда̀ стра́ждѹтъ гоне́нїе.

¹⁹Ѻ҆вогда́ же и҆ междѹ̀ водо́ю вы́ше си́лы ѻ҆́гненныѧ палѧ́ше, да беззакѡ́нныѧ землѝ порождє́нїѧ растли́тъ.

²⁰Вмѣ́стѡ же си́хъ а҆́гг҃лскою пи́щею пита́лъ є҆сѝ лю́ди твоѧ҄, и҆ ѹ҆гото́ванъ хлѣ́бъ съ небесѐ посла́лъ є҆сѝ и҆̀мъ без̾ трѹда̀, всѧ́кое ѹ҆слажде́нїе въ себѣ̀ и҆мѣ́ющь и҆ ко всѧ́комѹ сли́чный вкѹше́нїю.

²¹Сѹщество́ бо твоѐ сла́дость твою̀ ко сынѡ́мъ пока́зоваше, и҆ ѹ҆гожда́ѧ є҆ди́нагѡ коегѡ́ждо во́ли, ѩ҆́коже кто̀ хотѧ́ше, превраща́шесѧ.

²²Снѣ́гъ же и҆ ле́дъ терпѧ́хѹ ѻ҆́гнь и҆ не растаѧва́хѹ: да ѹ҆вѣ́дѧтъ, ѩ҆́кѡ плоды̀ врагѡ́въ и҆стреблѧ́ше ѻ҆́гнь горѧ́щь во гра́дѣ и҆ въ дожде́хъ блиста́ющь:

²³то́йже па́ки, да пита́ютсѧ пра́веднїи, (ѻ҆́гнь) и҆ свою̀ забы̀ си́лѹ.

²⁴Творе́нїе бо, тебѣ̀ творцѹ̀ всѣ́хъ слѹжа́щее, распростира́етсѧ на мѹ́кѹ проти́вѹ непра́ведныхъ и҆ легча́е твори́тсѧ во благодѣѧ́нїе ра́ди на тѧ̀ надѣ́ющихѧ.

²⁵Сегѡ̀ ра́ди и҆ тогда̀ во всѧ҄ преѡбразѹ́емое всѣ́хъ корми́телницѣ блгдти твое́й слѹжа́ше къ во́ли тре́бѹющихъ:

²⁶да наѹча́тсѧ сы́нове твоѝ, и҆̀хже возлюби́лъ є҆сѝ, гд҇и, ѩ҆́кѡ не рождє́нїѧ плодѡ́въ пита́ютъ человѣ́ка, но сло́во твоѐ тебѣ̀ вѣ́рѹющихъ соблюда́етъ.

²⁷Е҆́же бо ѻ҆гне́мъ нерастлѣ́но ско́рѡ ѿ ма́лыѧ лѹчѝ со́лнечныѧ грѣ́емое растаѧва́шесѧ:

²⁸да зна́емо бѹ́детъ (всѣ҄мъ), ѩ҆́кѡ подоба́етъ предвари́ти со́лнце на благодаре́нїе тебѣ̀ и҆ къ восто́кѹ свѣ́та тебѣ̀ поклони́тисѧ.

²⁹Неблагода́рнагѡ бо ѹ҆пова́нїе ѩ҆́кѡ зи́мный и҆́ней раста́етъ, и҆ и҆злїе́тсѧ ѩ҆́кѡ вода̀ неключи́ма.