Read Библия Церковнославянская Премѹ́дрости соломѡ́ни 17 Bible Online

Премѹ́дрости соломѡ́ни 17 - Библия Церковнославянская bible

Премѹ́дрости соломѡ́ни 17

¹Вели́цы бо сѹ́ть сѹдѝ твоѝ, (гд҇и,) и҆ неизглаго́ланни: сегѡ̀ ра́ди ненака҄занныѧ дѹ́ши заблѹди́ша.

²Возмнѣ́вше бо наси́льствовати ѩ҆зы́къ ст҃ы́й беззако́ннїи, ѹ҆́зницы тмы̀ и҆ до́лгою но́щїю свѧ́зани, заключе́ни под̾ кро́вы, бѣглецы̀ вѣ́чнагѡ провѣ́дѣнїѧ лежа́ша.

³Ѹ҆таи́тисѧ бо мнѧ́ще въ сокрове́нныхъ грѣсѣ́хъ, мра́чнымъ забве́нїѧ покрыва́ломъ расточе́ни бы́ша, ѹ҆жаса́ющесѧ лю́тѣ и҆ страши́лищами возмѹще́ни:

⁴ниже́ бо содержа́й и҆̀хъ верте́пъ без̾ стра́ха сохранѝ, шѹ́мы же сходѧ́ще возмѹща́хѹ и҆̀хъ, и҆ привидѣ҄нїѧ дрѧ҄хлаѧ печа́льными ли́цами ѩ҆влѧ́хѹсѧ.

⁵И҆ ѻ҆́гненнаѧ ѹ҆́бѡ ни є҆ди́на си́ла можа́ше ѡ҆свѣща́ти, нижѐ ѕвѣ́здъ свѣ́тлїи пла́менїе просвѣти́ти можа́хѹ въ тѹ̀ но́щь стра́шнѹю.

⁶ѩ҆влѧ́шесѧ же и҆̀мъ то́кмѡ внеза́пный ѻ҆́гнь стра́ха и҆спо́лнь: ѹ҆страша́еми же неви́димымъ ѻ҆́нымъ призра́комъ, мнѧ́хѹ гѡ́ршаѧ бы́ти ви҄димаѧ.

⁷Волше́бнагѡ же хѹдо́жества предлежа́хѹ посмѣѧ҄нїѧ, и҆ ѡ҆ премѹ́дрости велича́нїѧ ѡ҆бличе́нїе ѹ҆кори́зненно:

⁸ѡ҆бѣща́ющїисѧ бо и҆згна́ти стра́хи и҆ смѹщє́нїѧ ѿ дѹшѝ болѧ́щїѧ, сі́и посмѣѧ́телнымъ стра́хомъ болѧ́хѹ.

⁹И҆́бо а҆́ще и҆ ничто́же и҆̀хъ мѧте́жное ѹ҆страша́ше, ѕвѣре́й прехо́дами и҆ ѕмїє́въ звизда́ньми подви́жени погиба́хѹ тре́петни, и҆ а҆́ера ѿню́дъ неизбѣ́жнагѡ ѿрица́ющесѧ ви́дѣти.

¹⁰Боѧзли́ваѧ бо ѕло́ба, свои́мъ свидѣ́телствомъ ѡ҆сѹжда́ема, вы́нѹ прїе́млетъ во ѹ҆́мъ лю҄таѧ, содержи́ма со́вѣстїю.

¹¹Ничто́же бо є҆́сть стра́хъ, то́кмѡ лише́нїе по́мощей сѹ́щихъ ѿ помышле́нїѧ.

¹²Внѹ́трь же ме́нше сѹ́щее ча́ѧнїе, бо́лшее мни́тъ невѣ́дѣнїе вины̀ подаю́щїѧ мѹ́кѹ.

¹³А҆ и҆̀же въ немощнѹ́ю пои́стиннѣ но́щь, и҆ ѿ немощна́гѡ а҆́да верте́пѡвъ наше́дшѹю, сно́мъ тѣ́мже спѧ́щїи,

¹⁴ѻ҆́во ѹ҆́бѡ страши́лищами мечта́нїй гони́ми бѧ́хѹ, ѻ҆́во же дѹшѝ и҆зчеза́хѹ преда́нїемъ: внеза́пный бо и҆̀мъ и҆ неча́ѧнный стра́хъ на́йде.

¹⁵Пото́мъ та́кѡ, кто́ либо когда̀ бѣ̀ ѻ҆на́мѡ, низпады́й хранѧ́шесѧ въ темни́цѣ без̾ желѣ́за заключе́нъ:

¹⁶а҆́ще бо земледѣ́латель кто̀ бы́сть, и҆лѝ па́стырь, и҆лѝ трѹдѡ́въ пѹсты́нныхъ дѣ́латель, пред̾ѧ́тъ бы́въ, неизбѣ́жнѹю терпѧ́ше нѹ́ждѹ:

¹⁷є҆ди́нымъ бо ѹ҆́жемъ тмы̀ всѝ бѧ́хѹ свѧ́зани. А҆́ще дѹ́хъ звизда́ѧй, и҆лѝ междѹ̀ ча́стыхъ древе́сныхъ вѣ́твей пти́чїй гла́съ сладкопѣ́снивый, и҆лѝ си́ла водна́ѧ текѹ́щи ѕѣ́лнѣ,

¹⁸и҆лѝ шѹ́мъ ѕѣ́лный низпа́дающихъ ка́менїй, и҆лѝ и҆гра́ющихъ живо́тныхъ тече́нїе неви́димое, и҆лѝ рыка́ющихъ лю́тыхъ ѕвѣре́й гла́съ, и҆лѝ ѿзыва́ющьсѧ ѿ де́брей го́рскихъ гла́съ, разслаблѧ́хѹ ѻ҆́ныхъ ѹ҆страша́юще.

¹⁹Всѧ́ бо вселе́ннаѧ свѣ́тлымъ просвѣща́шесѧ свѣ́томъ, и҆ невозбра́нными дѣ́лы содержа́шесѧ:

²⁰на є҆ди́ныхъ же ѻ҆́ныхъ простира́шесѧ тѧ́жкаѧ но́щь, ѡ҆́бразъ бѹ́дѹщагѡ и҆́хъ воспрїѧ́тїѧ тмы̀: са́ми же себѣ̀ бы́ша тмы̀ тѧжча́йшїи.