Read Библия Церковнославянская Премѹ́дрости соломѡ́ни 18 Bible Online

Премѹ́дрости соломѡ́ни 18 - Библия Церковнославянская bible

Премѹ́дрости соломѡ́ни 18

¹Преподѡ́бнымъ же твои҄мъ превели́къ бѣ̀ свѣ́тъ: и҆́хже ѹ҆́бѡ гла́съ слы́шаше, ѡ҆́браза же не ви́дѧще, зане́же ѹ҆́бѡ и҆ ѻ҆нѝ (тогѡ́жде) не страда́хѹ, ѹ҆блажа́хѹ.

²А҆ ѩ҆́кѡ не па́коствѹютъ пред̾ѡби́димїи, благодарѧ́хѹ, и҆ є҆́же пронести́сѧ, благода́ти молѧ́хѹ.

³Си́хъ ра́ди сто́лпъ ѻ҆гнегорѧ́щь, вожда̀ ѹ҆́бѡ невѣ́домагѡ пѹтьше́ствїѧ, со́лнце же невреди́телное любоче́стнагѡ стра́нствованїѧ по́далъ є҆сѝ.

⁴Досто́йни бо ѻ҆нѝ лиши́тисѧ свѣ́та и҆ блюсти́сѧ во тмѣ̀, и҆̀же заключе́ныхъ стрежа́хѹ сынѡ́въ твои́хъ, и҆́миже и҆мѧ́ше нетлѣ́нный зако́на свѣ́тъ вѣ́кѹ да́тисѧ.

⁵Совѣ́товавшихъ же и҆́хъ ѹ҆бива́ти младе́нцы преподо́бныхъ, и҆ є҆ди́номѹ ѿложе́нѹ ча́дѹ и҆ спасе́нѹ, во ѡ҆бличе́нїе и҆́хъ ѿѧ́лъ є҆сѝ мно́жество ча҄дъ, и҆ кѹ́пнѡ погѹби́лъ є҆сѝ въ водѣ̀ ѕѣ́лнѣй.

⁶Ѻ҆́наѧ бо но́щь пред̾ѹвѣ́дѣна бы́сть ѻ҆тцє́мъ на́шымъ, да тве́рдѡ вѣ́дѹще, и҆̀мже клѧ́твамъ вѣ́роваша, возблагодѹ́шествѹютъ.

⁷Воспрїѧ́то же бы́сть ѿ люді́й твои́хъ спасе́нїе ѹ҆́бѡ пра́ведныхъ, врагѡ́въ же и҆стребле́нїе:

⁸и҆́мже бо наказа́лъ є҆сѝ сѹпоста́ты на́шѧ, си́мъ на́съ призва́въ просла́вилъ є҆сѝ.

⁹Сокрове́ннѡ бо жрѧ́хѹ преподо́бнїи ѻ҆́троцы благи́хъ, и҆ зако́нъ бж҇твенный є҆диномы́слїемъ завѣща́ша, та҄ѧжде подо́бнѡ, блага҄ѧ же и҆ бѣ́дствєннаѧ воспрїима́ти ст҃ы҄мъ, ѻ҆тцє́мъ ѹ҆жѐ предвоспѣва́ющымъ хвалѹ̀.

¹⁰Противогласѧ́ше же несогла́сный врагѡ́въ во́пль, и҆ плаче́вный слы́шашесѧ гла́съ пла́чѹщихъ младе́нцєвъ.

¹¹Подо́бною же ме́стїю ра́бъ кѹ́пнѡ съ господи́номъ казне́нъ бы́сть, и҆ просты́й человѣ́къ съ царе́мъ та҄ѧжде пострада̀:

¹²є҆динодѹ́шнѡ же всѝ во є҆ди́нѣмъ и҆́мени сме́ртнѣмъ ме́ртвыхъ и҆мѣ́ѧхѹ безчи́сленныхъ: ниже́ бо ко погребе́нїю живі́и бѧ́хѹ дово́лни, поне́же во є҆ди́нѣмъ мгнове́нїи честнѣ́йшїй ро́дъ и҆́хъ и҆стребле́нъ бы́сть.

¹³Ѡ҆ всѣ́хъ бо не вѣ́рѹюще ра́ди чародѣѧ́нїй, а҆ ра́ди пе́рвенцєвъ и҆стребле́нїѧ, и҆сповѣ́даша люді́й сынѡ́въ бж҃їихъ бы́ти.

¹⁴Ти́хомѹ бо молча́нїю содержа́щѹ всѧ҄, и҆ но́щи во свое́мъ тече́нїи преполовлѧ́ющейсѧ,

¹⁵всемогѹ́щее сло́во твоѐ, (гд҇и,) съ нб҃съ ѿ пр҇то́лѡвъ цр҇кихъ же́стокъ ра́тникъ въ среди́нѹ поги́бельныѧ землѝ сни́де.

¹⁶Ме́чь ѻ҆́стръ нелицемѣ́рное повелѣ́нїе твоѐ носѧ́й, и҆ ста́въ и҆спо́лни всѧ҄ сме́рти: и҆ небесѐ ѹ҆́бѡ каса́шесѧ, стоѧ́ше же на землѝ.

¹⁷Тогда̀ внеза́пѹ привидѣ҄нїѧ ѹ҆́бѡ снѡ́въ лю́тѣ смѹти́ша и҆̀хъ, стра́си же наидо́ша неча́ѧнни,

¹⁸и҆ и҆́нъ и҆на́мѡ ве́рженъ є҆́ле жи́въ, є҆ѧ́же ра́ди вины̀ ѹ҆мира́ше, ѡ҆б̾ѧвлѧ́ше:

¹⁹сѡ́нїѧ бо, смѹти́вше и҆̀хъ, сїѐ предвозвѣсти́ша: да не вѣ́дѧще, є҆гѡ́же ра́ди ѕлѣ̀ стра́ждѹтъ, поги́бнѹтъ.

²⁰Прикоснѹ́сѧ же нѣ́когда и҆ пра́ведныхъ и҆скѹше́нїе сме́рти, пораже́нїе во пѹсты́ни бы́сть мно́жества: но не до́лгѡ пребы́сть гнѣ́въ.

²¹Потща́всѧ бо мѹ́жъ непоро́ченъ предпобо́рствова, своеѧ̀ слѹ́жбы ѻ҆рѹ́жїе, моли́твѹ и҆ ѳѷмїа́ма ѹ҆милостивле́нїе прине́съ, сопроти́въ ста̀ гнѣ́вѹ и҆ коне́цъ положѝ бѣ́дствованїю, показа́въ, ѩ҆́кѡ тво́й є҆́сть ра́бъ.

²²Ѡ҆долѣ́ же поража́ющаго не си́лою тѣле́сною, нижѐ ѻ҆рѹ́жїѧ дѣ́йствїемъ, но сло́вомъ покорѝ наказѹ́ющаго, клѧ҄твы ѻ҆тцє́въ и҆ завѣ́ты воспомѧнѹ́въ.

²³Грома́дами бо ѹ҆жѐ па́дшымъ дрѹ́гъ на дрѹ́га мє́ртвымъ, посредѣ̀ ста́въ, пресѣчѐ гнѣ́въ и҆ раздѣлѝ къ живы҄мъ пѹ́ть.

²⁴На ѻ҆де́жди бо поди́ра бѣ̀ ве́сь мі́ръ, и҆ ѻ҆тцє́въ сла҄вы на и҆зваѧ́нїи четырерѧдова́гѡ ка́менїѧ, и҆ вели́чество твоѐ на дїади́мѣ главы̀ є҆гѡ̀.

²⁵Си҄мъ ѹ҆стѹпи́лъ и҆скоренѧ́ѧй и҆ си́хъ ѹ҆страши́сѧ: бѣ́ бо то́кмѡ и҆скѹше́нїе гнѣ́ва дово́лно.