Read Библия Церковнославянская Премѹ́дрости соломѡ́ни 19 Bible Online

Премѹ́дрости соломѡ́ни 19 - Библия Церковнославянская bible

Премѹ́дрости соломѡ́ни 19

¹Нечєсти́вымъ же до конца̀ без̾ ми́лости ѩ҆́рость на́йде: предвѣ́дѣ бо и҆́хъ и҆ бѹ҄дѹщаѧ,

²ѩ҆́кѡ ті́и ѿпѹсти́вшїи, є҆́же ѿитѝ, и҆ со тща́нїемъ предпосла́вше и҆̀хъ, поженѹ́тъ в̾слѣ́дъ раска́ѧвшесѧ:

³є҆ще́ бо въ рѹка́хъ и҆мѣ́юще рыда҄нїѧ и҆ сѣ́тѹюще над̾ гроба́ми ме́ртвыхъ, и҆́нъ себѣ̀ взѧ́ша по́мыслъ безѹ́мїѧ, и҆ и҆̀хже молѧ́ще и҆згна́ша, си́хъ а҆́ки бѣглецє́въ гонѧ́хѹ.

⁴Влеча́ше бо и҆̀хъ къ семѹ̀ концѹ̀ досто́йнаѧ нѹ́жда, и҆ приклю́чшихсѧ забы́тїе вложѝ, да и҆ про́чѹю къ мѹче́нїємъ принапо́лнѧтъ ка́знь:

⁵и҆ лю́дїе ѹ҆́бѡ твоѝ пресла́вное пѹтьше́ствїе пре́йдѹтъ, ѻ҆ни́ же стра́ннѹ ѡ҆брѧ́щѹтъ сме́рть.

⁶Все́ бо творе́нїе во свое́мъ є҆мѹ̀ ро́дѣ па́ки свы́ше преѡбразова́шесѧ, слѹжа́щее сво́йствєннымъ твои҄мъ повелѣ́нїємъ, да ѻ҆́троцы твоѝ сохранѧ́тсѧ неврежде́ни.

⁷Ѡ҆́блакъ ѡ҆сѣнѧ́ѧй по́лкъ и҆́хъ, и҆ и҆з̾ преждебы́вшїѧ воды̀ ѿкры́тїе сѹхі́ѧ землѝ ѩ҆ви́сѧ, и҆ и҆з̾ мо́рѧ чермна́гѡ пѹ́ть невозбра́ненъ, и҆ по́ле ѕла́чное ѿ волне́нїѧ ѕѣ́лнагѡ:

⁸и҆́мже ве́сь ѩ҆зы́къ про́йде, твое́ю рѹко́ю покрове́ни, ви́дѧще ди҄внаѧ чѹдеса̀.

⁹ѩ҆́коже бо ко́ни насы́тишасѧ, и҆ ѩ҆́кѡ а҆́гнцы взыгра́шасѧ, хва́лѧще тѧ̀, гд҇и, и҆зба́вльшаго и҆̀хъ:

¹⁰воспомѧнѹ́ша бо є҆щѐ, ѩ҆̀же во ѡ҆бита́нїи и҆́хъ, ка́кѡ ѹ҆́бѡ вмѣ́стѡ рожде́нїѧ живо́тныхъ и҆зведѐ землѧ̀ скнї҄пы, вмѣ́стѡ же ры́бъ и҆зры́гнѹ рѣка̀ мно́жество жа́бъ.

¹¹Послѣди́ же ви́дѣша и҆ но́вое рожде́нїе пти́цъ, є҆гда̀ похотѣ́нїемъ подви́гшесѧ, проси́ша сла́достныѧ пи́щи.

¹²Во ѹ҆тѣше́нїе бо взыдо́ша и҆̀мъ ѿ мо́рѧ кра́стєли: и҆ мѹчє́нїѧ грѣ҄шнымъ наидо́ша, не без̾ бы́вшихъ зна́менїй си́лою мо́лнїй: пра́веднѣ бо пострада́ша за своѧ҄ ѕлѡ́бы,

¹³и҆́бо лютѣ́йшее ненавидѣ́нїе стра́нныхъ соверши́ша: и҆ні́и ѹ҆́бѡ незна́емыхъ не прїе́млѧхѹ прише́лцєвъ, сі́и же благодѣ́телей стра́нныхъ порабоща́хѹ.

¹⁴И҆ не то́кмѡ, но а҆́ще ко́е разсмотре́нїе бѹ́детъ и҆́хъ: занѐ вражде́бнѡ прїе́млѧхѹ чѹжды́хъ.

¹⁵Сі́и же съ пра́зднествами прїе́мше приѡбщи́вшихсѧ ѹ҆жѐ и҆́хъ ѡ҆бы́чаємъ, жесточа́йшими ѡ҆ѕло́биша трѹда́ми.

¹⁶Побїе́ни же бы́ша и҆ ѡ҆слѣпле́нїемъ, ѩ҆́коже ѻ҆́нїи при две́рехъ пра́ведника, є҆гда̀ вели́кою ѡ҆бложе́ни тмо́ю, кі́йждо свои́хъ две́рїй прохо́да и҆ска́ше.

¹⁷Са́ми бо собо́ю стїхї҄и премѣнѧ́ємы, ѩ҆́коже въ гѹ́слехъ гла́сы сли́чїѧ и҆́мѧ премѣнѧ́ютъ, всегда̀ хранѧ́ще звѹ́къ: є҆́же є҆́сть ви́дѣти ѿ зра́ка бы́вшихъ и҆звѣ́стнѡ.

¹⁸Земна҄ѧ бо въ вѡ́днаѧ прелага́хѹсѧ, и҆ пла҄вающаѧ прехожда́хѹ на зе́млю.

¹⁹Ѻ҆́гнь возмога́ше въ водѣ̀ вы́шше своеѧ̀ си́лы, и҆ вода̀ ѹ҆гаша́ющѹю си́лѹ забы̀.

²⁰Пла́мень вопрекѝ ѹ҆доботлѣ́нныхъ живо́тныхъ не вредѝ пло́тей въ не́мъ ходѧ́щихъ, нижѐ таѧ́ше ледови́дный ѹ҆добота́ѧй ро́дъ сла́достныѧ пи́щи.

²¹По всемѹ́ бо, гд҇и, возвели́чилъ є҆сѝ лю́ди твоѧ҄ и҆ просла́вилъ є҆сѝ, и҆ не презрѣ́лъ є҆сѝ, во всѧ́цѣмъ вре́мени и҆ мѣ́стѣ предстоѧ́й.