Read Библия Церковнославянская Премѹ́дрости соломѡ́ни 2 Bible Online

Премѹ́дрости соломѡ́ни 2 - Библия Церковнославянская bible

Премѹ́дрости соломѡ́ни 2

¹Реко́ша бо въ себѣ̀ помышлѧ́ющїи непра́вѡ: ма́лъ є҆́сть и҆ печа́ленъ живо́тъ на́шъ, и҆ нѣ́сть и҆зцѣле́нїѧ въ кончи́нѣ человѣ́честѣ, и҆ нѣ́сть позна́нъ возврати́выйсѧ ѿ а҆́да.

²ѩ҆́кѡ самослѹча́йнѡ рожде́ни є҆смы̀, и҆ по се́мъ бѹ́демъ ѩ҆́коже не бы́вше: поне́же ды́мъ дыха́нїе въ но́здрехъ на́шихъ, и҆ сло́во и҆́скра въ движе́нїи се́рдца на́шегѡ:

³є҆́йже ѹ҆га́сшей пе́пелъ бѹ́детъ тѣ́ло, и҆ дѹ́хъ на́шъ разлїе́тсѧ ѩ҆́кѡ мѧ́гкїй воздѹ́хъ,

⁴и҆ и҆́мѧ на́ше забве́но бѹ́детъ во вре́мѧ, и҆ никто́же воспомѧне́тъ дѣ́лъ на́шихъ: и҆ пре́йдетъ живо́тъ на́шъ ѩ҆́кѡ слѣды̀ ѡ҆́блака, и҆ ѩ҆́кѡ мгла̀ разрѹши́тсѧ, разгна́наѧ ѿ лѹ҄чь со́лнечныхъ и҆ теплото́ю є҆гѡ̀ ѡ҆тѧгчи́вшисѧ.

⁵Стѣ́ни бо прехо́дъ житїѐ на́ше, и҆ нѣ́сть возвраще́нїѧ кончи́ны на́шеѧ: ѩ҆́кѡ запеча́тана є҆́сть, и҆ никто̀ возвраща́етсѧ.

⁶Прїиди́те ѹ҆̀бо и҆ наслади́мсѧ настоѧ́щихъ благи́хъ, и҆ ѹ҆потреби́мъ созда́нїѧ, ѩ҆́кѡ въ ю҆́ности ско́рѡ:

⁷вїна̀ дража́йшагѡ и҆ мѵ́ра (благово́нна) и҆спо́лнимсѧ, и҆ да не пре́йдетъ на́съ цвѣ́тъ житїѧ̀:

⁸ѹ҆вѣнча́имъ на́съ ши́пковыми цвѣ́ты, пре́жде не́же ѹ҆вѧ́нѹтъ:

⁹ни є҆ди́нъ ѿ на́съ лише́нъ да бѹ́детъ на́шегѡ наслажде́нїѧ, вездѣ̀ ѡ҆ста́вимъ зна́менїе весе́лїѧ, ѩ҆́кѡ сїѧ̀ ча́сть на́ша и҆ жре́бїй се́й.

¹⁰Наси́лїе сотвори́мъ ѹ҆бо́гѹ првдномѹ, не пощади́мъ вдови́цы, нижѐ ста́рца ѹ҆стыди́мсѧ сѣди́нъ многолѣ́тныхъ.

¹¹Да бѹ́детъ же на́мъ крѣ́пость зако́нъ пра́вды: некрѣ́пкое бо неполе́зно ѡ҆брѣта́етсѧ.

¹²Ѹ҆лови́мъ же (ле́стїю) првднаго, ѩ҆́кѡ непотре́бенъ на́мъ є҆́сть и҆ проти́витсѧ дѣлѡ́мъ на́шымъ, и҆ поно́ситъ на́мъ грѣхѝ зако́на и҆ ѕлосла́витъ на́мъ грѣхѝ ѹ҆че́нїѧ на́шегѡ:

¹³возвѣща́етъ на́мъ ра́зѹмъ и҆мѣ́ти бж҃їй, и҆ ѻ҆́трока гд҇нѧ себѐ и҆менѹ́етъ:

¹⁴бы́сть на́мъ на ѡ҆бличе́нїе помышле́нїй на́шихъ:

¹⁵тѧ́жекъ є҆́сть на́мъ и҆ къ видѣ́нїю, ѩ҆́кѡ неподо́бно (є҆́сть) и҆ны҄мъ житїѐ є҆гѡ̀, и҆ ѿмѣ҄нны (сѹ́ть) стєзѝ є҆гѡ̀:

¹⁶въ порѹга́нїе вмѣни́хомсѧ є҆мѹ̀, и҆ ѹ҆далѧ́етесѧ ѿ пѹті́й на́шихъ ѩ҆́кѡ ѿ нечисто́тъ: блажи́тъ послѣ҄днѧѧ првдныхъ и҆ сла́витсѧ ѻ҆ц҃а̀ и҆мѣ́ти (себѣ̀) бг҃а.

¹⁷Ѹ҆ви́димъ, а҆́ще словеса̀ є҆гѡ̀ и҆́стинна, и҆ и҆скѹ́симъ ѩ҆̀же сбѹ́дѹтсѧ є҆мѹ̀.

¹⁸А҆́ще бо є҆́сть и҆́стинный сы́нъ бж҃їй, защи́титъ є҆го̀ и҆ и҆зба́витъ є҆го̀ ѿ рѹкѝ проти́вѧщихсѧ.

¹⁹Досажде́нїемъ и҆ мѹ́кою и҆стѧ́жимъ є҆го̀, да ѹ҆вѣ́мы кро́тость є҆гѡ̀ и҆ и҆скѹ́симъ безѕло́бство є҆гѡ̀:

²⁰сме́ртїю поно́сною ѡ҆сѹ́димъ є҆го̀, бѹ́детъ бо є҆мѹ̀ разсмотре́нїе ѿ слове́съ є҆гѡ̀.

²¹Сїѧ҄ помы́слиша и҆ прельсти́шасѧ: ѡ҆слѣпи́ бо и҆̀хъ ѕло́ба и҆́хъ,

²²и҆ не ѹ҆вѣ́дѣша та҄инъ бж҃їихъ, нижѐ мзды̀ ѹ҆пова́ша преподо́бїѧ, нижѐ присѹди́ша че́сти дѹша́мъ непорѡ́чнымъ.

²³ѩ҆́кѡ бг҃ъ созда̀ человѣ́ка въ неистлѣ́нїе и҆ во ѡ҆́бразъ подо́бїѧ своегѡ̀ сотворѝ є҆го̀:

²⁴за́вистїю же дїа́волею сме́рть вни́де въ мі́ръ: вкѹша́ютъ же ю҆̀, и҆̀же ѿ є҆ѧ̀ ча́сти сѹ́ть.