Read Библия Церковнославянская Премѹ́дрости соломѡ́ни 3 Bible Online

Премѹ́дрости соломѡ́ни 3 - Библия Церковнославянская bible

Премѹ́дрости соломѡ́ни 3

¹Првдныхъ не дѹ́ши въ рѹцѣ̀ бж҃їей, и҆ не прико́снетсѧ и҆́хъ мѹ́ка.

²Непщева́ни бы́ша во ѻ҆́чїю безѹ́мныхъ ѹ҆мре́ти, и҆ вмѣни́сѧ ѡ҆ѕлобле́нїе и҆схо́дъ и҆́хъ,

³и҆ є҆́же ѿ на́съ ше́ствїе сокрѹше́нїе: ѻ҆ни́ же сѹ́ть въ ми́рѣ.

⁴И҆́бо пред̾ лице́мъ человѣ́ческимъ а҆́ще и҆ мѹ́кѹ прїи́мѹтъ, ѹ҆пова́нїе и҆́хъ безсме́ртїѧ и҆спо́лнено:

⁵и҆ вма́лѣ нака́зани бы́вше, вели́кими благодѣ́телствовани бѹ́дѹтъ, ѩ҆́кѡ бг҃ъ и҆скѹсѝ и҆̀хъ и҆ ѡ҆брѣ́те и҆̀хъ достѡ́йны себѣ̀:

⁶ѩ҆́кѡ зла́то въ горни́лѣ и҆скѹсѝ и҆̀хъ, и҆ ѩ҆́кѡ всепло́дїе же́ртвенное прїѧ́тъ ѧ҆̀.

⁷И҆ во вре́мѧ посѣще́нїѧ и҆́хъ возсїѧ́ютъ, и҆ ѩ҆́кѡ и҆́скры по сте́блїю потекѹ́тъ:

⁸сѹ́дѧтъ ѩ҆зы́кѡмъ и҆ ѡ҆блада́ютъ людьмѝ, и҆ воцр҃и́тсѧ въ ни́хъ гд҇ь во вѣ́ки.

⁹Надѣ́ющїисѧ на́нь ѹ҆разѹмѣ́ютъ и҆́стинѹ, и҆ вѣ́рнїи въ любвѝ пребѹ́дѹтъ є҆мѹ̀, ѩ҆́кѡ блгдть и҆ мл҇ть въ прпдбныхъ є҆гѡ̀ и҆ посѣще́нїе во и҆збра́нныхъ є҆гѡ̀.

¹⁰Нечести́вїи же, ѩ҆́кѡ помы́слиша, прїи́мѹтъ запреще́нїе, и҆̀же неради́вшїи ѡ҆ првднѣмъ и҆ ѿ гд҇а ѿстѹпи́вше.

¹¹Премѹ́дрость бо и҆ наказа́нїе ѹ҆ничижа́ѧй ѡ҆каѧ́ненъ, и҆ пра́здно ѹ҆пова́нїе и҆́хъ, и҆ трѹды̀ безплѡ́дны, и҆ неключи҄ма дѣла̀ и҆́хъ:

¹²жєны̀ и҆́хъ безѹ҄мны и҆ лѹка҄ва ча҄да и҆́хъ, про́клѧто рожде́нїе и҆́хъ.

¹³ѩ҆́кѡ блаже́на є҆́сть непло́ды неѡскверне́наѧ, ѩ҆́же не позна̀ ло́жа во грѣсѣ̀, и҆мѣ́ти бѹ́детъ пло́дъ въ посѣще́нїи дѹ́шъ:

¹⁴и҆ є҆ѵнѹ́хъ, и҆́же не содѣ́ла въ рѹкѹ̀ (своє́ю) беззако́нїѧ, нижѐ помы́сли на гд҇а лѹка҄ваѧ, да́стсѧ бо є҆мѹ̀ вѣ́ры благода́ть и҆збра́нна и҆ жре́бїй во хра́мѣ гд҇ни ѹ҆го́днѣйшїй.

¹⁵Благи́хъ бо трѹдѡ́въ пло́дъ благосла́венъ, и҆ не ѿпа́дающь ко́рень ра́зѹма.

¹⁶Ча҄да же прелюбодѣ́євъ несовершє́на бѹ́дѹтъ, и҆ ѿ законопрестѹ́пнагѡ ло́жа сѣ́мѧ и҆зче́знетъ:

¹⁷а҆́ще бо долгоживо́тни бѹ́дѹтъ, ни во что́же вмѣнѧ́тсѧ, и҆ безче́стна на послѣ́докъ ста́рость и҆́хъ:

¹⁸а҆́ще же ско́рѡ сконча́ютсѧ, не бѹ́дѹтъ и҆мѣ́ти ѹ҆пова́нїѧ, нижѐ въ де́нь сѹда̀ ѹ҆тѣше́нїѧ:

¹⁹ро́да бо непра́веднагѡ лю҄таѧ ѡ҆конча҄нїѧ.