Read Библия Церковнославянская Премѹ́дрости соломѡ́ни 4 Bible Online

Премѹ́дрости соломѡ́ни 4 - Библия Церковнославянская bible

Премѹ́дрости соломѡ́ни 4

¹Лѹ́чше безча́дство со добродѣ́телїю: безсме́ртїе бо є҆́сть въ па́мѧти є҆ѧ̀, ѩ҆́кѡ и҆ пред̾ бг҃омъ позна́етсѧ и҆ пред̾ человѣ҄ки:

²присѹ́щѹю бо подража́ютъ ю҆̀ и҆ жела́ютъ ѿше́дшїѧ, и҆ въ вѣ́цѣ вѣнцено́снѡ чти́тсѧ нескве́рныхъ по́двигѡвъ бра́нь ѡ҆долѣ́вши.

³Многопло́дно же нечести́выхъ мно́жество неключи́мо бѹ́детъ, и҆ прелюбодѣ҄йнаѧ насаждє́нїѧ не дадѹ́тъ коре́нїѧ въ глѹбинѹ̀, нижѐ крѣ́пко стоѧ́нїе сотворѧ́тъ:

⁴а҆́ще бо и҆ вѣ҄тви на вре́мѧ процвѣтѹ́тъ, не крѣ́пкѡ возше́дше ѿ вѣ́тра поколе́блютсѧ и҆ ѿ ѕѣ́лныхъ вѣ́трѡвъ и҆скоренѧ́тсѧ:

⁵сокрѹша́тсѧ вѣ҄тви несовершє́нны, и҆ пло́дъ и҆́хъ неключи́мь, ѡ҆ско́менъ въ снѣ́дь, и҆ ни во что̀ потре́бенъ.

⁶Ѿ беззако́нныхъ бо снѡ́въ ча҄да ражда́ємаѧ свидѣ́телїе сѹ́ть лѹка́вствїѧ на роди́тєли во и҆спыта́нїи и҆́хъ.

⁷Првдникъ же а҆́ще пости́гнетъ сконча́тисѧ, въ поко́и бѹ́детъ:

⁸ста́рость бо честна̀ не многолѣ́тна, нижѐ въ числѣ̀ лѣ́тъ и҆зчита́етсѧ:

⁹сѣди́на же є҆́сть мѹ́дрость человѣ́кѡмъ, и҆ во́зрастъ ста́рости житїѐ нескве́рно.

¹⁰Бл҃гоѹго́денъ бг҃ови бы́въ, возлю́бленъ бы́сть, и҆ живы́й посредѣ̀ грѣ́шныхъ преста́вленъ бы́сть:

¹¹восхище́нъ бы́сть, да не ѕло́ба и҆змѣни́тъ ра́зѹмъ є҆гѡ̀, и҆лѝ ле́сть прельсти́тъ дѹ́шѹ є҆гѡ̀.

¹²Раче́нїе бо ѕло́бы помрача́етъ дѡ́браѧ, и҆ паре́нїе по́хоти премѣнѧ́етъ ѹ҆́мъ неѕло́бивъ.

¹³Сконча́всѧ вма́лѣ и҆спо́лни лѣ҄та дѡ́лга:

¹⁴ѹ҆го́дна бо бѣ̀ гд҇еви дѹша̀ є҆гѡ̀, сегѡ̀ ра́ди потща́сѧ ѿ среды̀ лѹка́вствїѧ:

¹⁵лю́дїе же ви́дѣвше и҆ не разѹмѣ́вше, нижѐ поло́жше въ помышле́нїи таково́е, ѩ҆́кѡ блгдть и҆ мл҇ть въ прпдбныхъ є҆гѡ̀ и҆ посѣще́нїе во и҆збра́нныхъ є҆гѡ̀.

¹⁶Ѡ҆сѹ́дитъ же првдникъ ѹ҆мира́ѧй живы́хъ нечести́выхъ, и҆ ю҆́ность сконча́вшаѧсѧ ско́рѡ долголѣ́тнѹю ста́рость непра́веднагѡ.

¹⁷Ѹ҆́зрѧтъ бо кончи́нѹ премѹ́драгѡ и҆ не ѹ҆разѹмѣ́ютъ, что̀ ѹ҆совѣ́това ѡ҆ не́мъ и҆ во что̀ ѹ҆твердѝ є҆го̀ гд҇ь:

¹⁸ѹ҆́зрѧтъ и҆ ѹ҆ничижа́тъ є҆го̀, гд҇ь же посмѣе́тсѧ и҆̀мъ:

¹⁹и҆ бѹ́дѹтъ посе́мъ въ паде́нїе безче́стно и҆ во ѹ҆кори́знѹ въ ме́ртвыхъ въ вѣ́къ: ѩ҆́кѡ расто́ргнетъ и҆̀хъ безгла҄сны ни́цъ и҆ поколе́блетъ и҆̀хъ ѿ ѡ҆снова́нїй, и҆ да́же до послѣ́днихъ ѡ҆пѹстѣ́ютъ и҆ бѹ́дѹтъ въ болѣ́зни, и҆ па́мѧть и҆̀хъ поги́бнетъ:

²⁰прїи́дѹтъ въ помышле́нїе грѣхѡ́въ свои́хъ боѧзли́вїи, и҆ ѡ҆блича́тъ и҆̀хъ проти́вѹ беззакѡ́нїѧ и҆́хъ.