Read Библия Церковнославянская Премѹ́дрости соломѡ́ни 6 Bible Online

Премѹ́дрости соломѡ́ни 6 - Библия Церковнославянская bible

Премѹ́дрости соломѡ́ни 6

¹Слы́шите ѹ҆̀бо, ца́рїе, и҆ разѹмѣ́йте: наѹчи́тесѧ, сѹдїи҄ концє́въ землѝ:

²внѹши́те, содержа́щїи мнѡ́жества и҆ гордѧ́щїисѧ ѡ҆ наро́дѣхъ ѩ҆зы́кѡвъ:

³ѩ҆́кѡ дана̀ є҆́сть ѿ гд҇а держа́ва ва́мъ и҆ си́ла ѿ вы́шнѧгѡ, и҆́же и҆стѧ́жетъ дѣла̀ ва҄ша и҆ помышлє́нїѧ и҆спыта́етъ:

⁴ѩ҆́кѡ слѹзѝ сѹ́ще цр҇тва є҆гѡ̀ не сѹди́сте пра́вѡ, ни сохрани́сте зако́на, нижѐ по во́ли бж҃їей ходи́сте.

⁵Стра́шнѡ и҆ ско́рѡ ѩ҆ви́тсѧ ва́мъ: ѩ҆́кѡ сѹ́дъ жесточа́йшїй преимѹ́щымъ быва́етъ,

⁶и҆́бо ма́лый досто́инъ є҆́сть ми́лости, си́льнїи же си́льнѣ и҆стѧ́зани бѹ́дѹтъ.

⁷Не щади́тъ бо лица̀ всѣ́хъ влдка, нижѐ ѹ҆срами́тсѧ вельмо́жи, ѩ҆́кѡ ма́ла и҆ вели́ка се́й сотворѝ, подо́бнѣ же проразѹмѣва́етъ ѡ҆ всѣ́хъ:

⁸держа҄внымъ же крѣ́пко настои́тъ и҆спыта́нїе.

⁹Къ ва́мъ ѹ҆̀бо, ѽ, ца́рїе, словеса̀ моѧ҄, да наѹчи́тесѧ премѹ́дрости и҆ не паде́те:

¹⁰и҆́бо сохранѧ́ющїи преподо́бнѣ преподѡ́бнаѧ преподо́бни бѹ́дѹтъ, и҆ и҆̀же наѹчи́вшїисѧ си҄мъ, ѡ҆брѧ́щѹтъ ѿвѣ́тъ.

¹¹Возжелѣ́йте ѹ҆̀бо слове́съ мои́хъ, возлюби́те и҆ накажи́тесѧ.

¹²Свѣтла̀ и҆ не ѹ҆вѧда́ема є҆́сть премѹ́дрость, и҆ ѹ҆до́бнѡ ви́дитсѧ ѿ лю́бѧщихъ ю҆̀, и҆ ѡ҆брѧ́щетсѧ ѿ и҆́щѹщихъ ю҆̀:

¹³предварѧ́етъ жела́ющымъ пред̾ѹвѣ́дѣтисѧ.

¹⁴Ѹ҆́треневавый къ не́й не ѹ҆трѹди́тсѧ: присѣдѧ́щѹю бо ѡ҆брѧ́щетъ при вратѣ́хъ свои́хъ.

¹⁵Е҆́же бо мы́слити ѡ҆ не́й, ра́зѹма (є҆́сть) соверше́нство, и҆ бдѧ́й є҆ѧ̀ ра́ди вско́рѣ без̾ печа́ли бѹ́детъ:

¹⁶ѩ҆́кѡ досто́йныхъ є҆ѧ̀ сама̀ ѡ҆бхо́дитъ и҆́щѹщи, и҆ на стезѧ́хъ показѹ́етсѧ и҆̀мъ благопрїѧ́тнѡ, и҆ во все́мъ провидѣ́нїи срѣта́етъ и҆̀хъ.

¹⁷Нача́ло бо є҆ѧ̀ и҆́стиннѣйшее наказа́нїѧ возжелѣ́нїе,

¹⁸попече́нїе же наказа́нїѧ любы̀, любы́ же хране́нїе зако́нѡвъ є҆ѧ̀,

¹⁹хране́нїе же зако́нѡвъ ѹ҆твержде́нїе нерастлѣ́нїѧ (є҆́сть), нерастлѣ́нїе же твори́тъ бли́з̾ бы́ти бг҃а:

²⁰возжелѣ́нїе ѹ҆̀бо премѹ́дрости возво́дитъ къ цр҇твѹ (вѣ́чномѹ).

²¹А҆́ще ѹ҆̀бо наслажда́етесѧ престо́лами и҆ ски҄птры, ѽ, ца́рїе люді́й, почти́те премѹ́дрость, да во вѣ́ки ца́рствѹете.

²²Что́ же є҆́сть премѹ́дрость, и҆ ка́кѡ бы́сть, возвѣщѹ̀,

²³и҆ не ѹ҆таю̀ ѿ ва́съ та҄инъ, но ѿ нача́ла рожде́нїѧ и҆зслѣ́ждѹ,

²⁴и҆ положѹ̀ на свѣ́тъ ра́зѹмъ є҆ѧ̀ и҆ не преминѹ́ю и҆́стины,

²⁵нижѐ за́вистїю та́ющемѹ спѹ́тьствѹю, ѩ҆́кѡ се́й не бѹ́детъ прича́стникъ премѹ́дрости.

²⁶Мно́жество же премѹ́дрыхъ спасе́нїе мі́рѹ, и҆ ца́рь премѹ́дръ ѹ҆твержде́нїе лю́демъ.

²⁷Сегѡ̀ ра́ди прїими́те наказа́нїе по словесє́мъ мои҄мъ, и҆ поле́зно бѹ́детъ ва́мъ.